بريدة






عـودة للخلف بريدة ستي » بريدة ستي » سـوالـيـف كـشكـولـيـة » ::: سواليف مدرس .. الخبرة ( سنة ) واحدة فقط لا غير ::: ( جزمت ..يالله دورك يادعساوي)

سـوالـيـف كـشكـولـيـة الطرائف و الألغاز - يمنع مشاركة النساء

إضافة رد
 
أدوات الموضوع طريقة العرض
قديم(ـة) 18-08-2010, 04:57 PM   #15
الـصـمـصـام
عبدالله
 
صورة الـصـمـصـام الرمزية
 
تاريخ التسجيل: Jun 2004
البلد: [ الرياض ]
المشاركات: 9,738
:::: عدنا ::::




أول موقف صار لي مع طالب بهالفصل ، كنت انا أتكلم عن انفلونزا الخنازير ، و عن أي موضوع ثاني ، المهم إني أقضي وقت الحصة بأي طريقة ، و الحمد لله ما كان عندي رهبة إلا إذا جلست ما أعرف أتكلم زين ، أما إذا وقفت حسيت إني (سنشيروا) <==== خاص لمواليد 1406 فما قبل

لفت انتباهي طالب ورا ، كان من أول ما بديت أتكلم وهو يوزع ابتسامات ، شكله مكثر جبن البقرة الظاحكة ، و إذا ناظرته ركد، همن لا ناظرت غيره رجع يضحك ، وهو و معه ورقه هي سبب الضحك ، طبعا اشتغلت الشرافة لازم أشوف وش هو راسم بدا أبو الشباب يناظر الورقة اللي معه ، و يناظر خويه اللي جنبه ( دب ) و يفطس ضحك ..

و الله و أمشي بشويش ، و أممممعط الورقة منه ، أثر العفريت رسام خطير ، أخذت الورقة و حطيته بوسط الكتاب اللي معي ، و ناديته قدام ربعه من باب التفشيل شوي .. قلت وش ذا ، قال راسم عبدالرحمن ( الدب ) اللي جنبه اللي يضحك عليه من اليوم .. و أشوف ولاا فعلاً ماشاء الله نفس الشكل والله ..! بس أنه آخر شي خربه و حط ( جديلتين ) ( قرنين ) والله يابي ضحك بس مالها داعي نحطم الدب .. !

الطالب هذا الرسام أول شيء ما كنت أعرف اسمه صرت أسميه ( الهليّل ) الرسام بتوع جريدة الرياض .
وورقته عندي إلى هالحين مجدوعة ..


طبعا الطلاب عفاريت ، إذا صار المدرس شديد طلعوا ريحته ، و إذا صار حبيب قالوا مخفة ، و لازم أول سؤال ( وش اسمك ) ( كم عمرك ) ( أنت متزوج ولالا ) و ( أنت من وين ) سبحان الله ما أدخل فصل إلا تجين هالأسئلة الأربعة .. طبعًا الاسم نعطيهم ، و الباقيات أنواع المخارج ..

طلعنا من الفصل الأول بسلام ، و الله و ندخل الفصل الثاني ، ولاهم بعارين والله .. شكلهم رابين مع دجاج الوطنية ، و مافيه إلا قوة كيماوي .. أول ما دخلت الفصل وقف جنبي طالب زرافة من جد قلت له وش اسمك قال عبدالرحمن .. قلت لا عمرك توقف جنبي ولا تراك راسب بالتفسير شكل الولد حقد علي ..


ولا فيه واحد بريداوي بالزاوية ، هاكـ الآدمي حفلة بلحاله .. بس أن عليه هرج و حركات ماش تبي توضيب ، طبعا المطالبات كله بعدم أخذ درس .. يبون( تعارف ) هههه و اللي يجيك دافور فاصل عداده يسألك ( بتحدد لنا كلمات بالاختبار النهائي ) ياعفاريت قريح تونا بأول يوم ما شرحنا شيء ..

و طبعا شرشحة بمدرس التفسير اللي قبلي ، و أنهم كرهوا التفسير بسبته ، عاد ماندري صحيح كلامهم ولالا ، لكن والله شكله واطي عليهم وطي ، و مرت أول الأيام بسلام .. و سلكنا معهم ..

طبعا الطريقة ( شرح ثلث ساعة ) و الباقي سواليف بس أهم شيء لحد يقوم واقف <=== دايم يتطنزون بالكلمة ذي ( لحد يقوم واقف ) يقولون أكيد بيقوم واقف أجل بيقوم جالس الفضاوة لها دور ..


ياشين الفصل لا دخلته عقب فسحة و أنت جاي بدري ، بس خلك ور الباب و شف طريقة الدخول و اضحك على العالم الدايخة ، واحد يدخل بجلنط ، و الثاني شكله مع رابطة مشجعي الإتي ، و الثالث أول ما يدخل يرقى على الطاولات و يمترهن حبه حبه تختيم بالنعال ونتم بكرامة .. و عالم منتهي صحيح ..

مرة دخلت فصل عقب حصة رياضة ، و ريحة الفصل خياس تقول زريبة غنم ، و ابلش بالتحليل الرياضي حقهم ، و ياااولد خلاص أقطع الصوت .. التنكة اللي يتكلم يسكت .. التزم الصمت <=== خبركم تنويع الأساليب مطلب ملح <== ملح ولا بهارات

فيه طالب متفاعل معي ومقدر شعوري وهو عريف الفصل ، جا عندي و قال تبي أسكتهم يا أستاذ ، قلت يالله كثر خيركـ قال يافلان اسكت .. و الله و محد عطاه وجه ، و أنا ساكت أبشوف وشلون بيسكتهم ..

مرة ثانية : يافلان بلا مبزرة الاستاذ بيتكلم ولا فيه أي تجاوب ، إلين طلعت الأساليب اللي مش كويسة وهو في شدة الغضب ، ياشباب على (طوووووط) أنت وياه .. الاستاذ بيتكلم هههههههه أبوك يالعربجي ... اشوى أنك منتب مدرس و لا الثاني متحمس يسكت خويه يقول ( ياااخي عيب عليك ترا ذا كبر أبوك ) يأشر علي طبعًا هههه وييين كبر أبوك ... والله ما مسكت نفسي من الضحك ..

فيه فصل تحفة .. أنت عندهم دايم يوم السبت الحصة الأولى .. مخمخة ذولاكـ .. نعطيكم علومهم عقبين .
__________________




ياربي ..افتح على قلبي ..
و طمئنه بالإيمان و الثبات و السلوة بقربك ..
[عبدالله]

من مواضيعي :
آية الحجاب من سورة الأحزاب ( أحكام و إشراقات )
::: كيف نقاوم التشويه ضد الإسلام و ضد بلادنا:::(مداخلتي في ساعة حوار مكتوبة و مشاهدة)

الـصـمـصـام غير متصل   الرد باقتباس
قديم(ـة) 18-08-2010, 05:13 PM   #16
الـصـمـصـام
عبدالله
 
صورة الـصـمـصـام الرمزية
 
تاريخ التسجيل: Jun 2004
البلد: [ الرياض ]
المشاركات: 9,738
اقتباس
المشاركة الأساسية كتبها نسيت اسمي
الله يكون بعونك
و أكيد بيصيرون مشاغبين
دافعين فلوس
ياالله كمل تراااااي تحمست

إي والله مشاغبين بس والله ما تأذيت منهم ..
و الله لا ينفع معهم لا إدارة ولا درجات ، مالك إلا الأسلوب و الأخلاق
و تخليهم يحبونك ،، بعدها كيف والله ترتاح ..

اقتباس
المشاركة الأساسية كتبها برنس بريدهـ
شكلك بديت تستخدم هذيك اللي تمرن الكتف ..
الصزز إنه قلق الكتابه على السبورة ..
لاتصير سبورتهم طباشير بعد ..


نحتريكا أبو عزيز ..

ههههه طباشير ,, بلا كلاسيكيين أولاه ..
فيه عطي الله البروجكتر مرزوز بكل فصل ..


اقتباس
المشاركة الأساسية كتبها كايدهمـ
ما شاء الله وش ذا الزين اجل مدرس تفسير

برنس بريدة الان يقولك مدرسة من المعروفات بالرياض تقولي
طباشير شرط انه برجكتر ولا يتعدا الطلاب بالفصل 20 واحد

إي والله .. صحيح كلام سليم . بس عدد الطلاب يتراوح من 17 إلى 24 بالفصل الواحد ..
و البروجكتور بكل فصل ، بس اشبك جهازك و اشتغل ..

شكرا .


اقتباس
المشاركة الأساسية كتبها خوي السرور
لن يمر عليك طالباً في نجابتهـ وهدوءه وحسن سمتهـ ووقارهـ مثلي

متابع

أكيد .. لأنك من جيل كمبيوتر العائلة و سيقا جانا هالجيلا مدري منين طالع ..


اقتباس
المشاركة الأساسية كتبها أبو غــلا
وااااااااوك .. 12 فصل ؟؟؟

لو أنا منك كان اقعد بقاعه والطلاب يجون لمي .. حتى ما أكتب كل شوي

الحمد لله منب أكتب إلا الدرس و عنوانه .. عشان التنك ما يسألون صفحة كم .. و مع ذلك يٍسألون ..
آخر شي صرت إذا كتبت العنوان و رقم الصفحة أكتب ( لا يجي دلخ و يسأل صفحة رقم كم ) و مع ذلك يجي دلخ و يسأل تبلى ..

اقتباس
المشاركة الأساسية كتبها إبراهــــــيم
بعدي والله كمل حبيبي
بس لا تخلي الكتب شوي نبي قرق كثر قريح


+ تميز

تسلم حبيبي على التميز .. و ليته ما حطيته .. عشان لو بنسحب بأي لحظة ولا فيه مجال

اقتباس
المشاركة الأساسية كتبها مخاوي 7 الصمت
أجل صرت فضيلة الشيخ المفسر

أكمل نحنو بالإحتراء

إيه .. الشعرواي على غفلة ههه
حياك الله يابو غلا ..


اقتباس
المشاركة الأساسية كتبها أبو رزان
أبو عزا الكثيري نحتريك لاتبطي علينا لإنك ماقضبتنا علمٍ إلى هالحين



و حنا وش قاعدين نسوي من اليوم هب ياوجهه ..

حياك . <=== وش عقبه

اقتباس
المشاركة الأساسية كتبها GIVENCHY
استعجل ..
12 فصل والراتب 1000 <== الخ بنقالي ؟


بالرياض تراي مهب ببريدة .. وييين 1000 و الله يبطون ..
الراتب حليل مقارنة بغيره الحمد لله ..


اقتباس
المشاركة الأساسية كتبها مخفي
حنى بإحترائك لاتأخر ياخال ..

جايين في الطريق .

اقتباس
المشاركة الأساسية كتبها الــمــفــتــرس
Buraydah City
ܓܢܚܛܓܢܚܛܓܢܚܛܓܢܚܛܓܢܚܛܓܢܚܛ




يذكرون إنه زي مدرسة الدعيسة بالظبط
أكمل يا مدرس طلاب المستقبل




ܓܢܚܛܓܢܚܛܓܢܚܛܓܢܚܛܓܢܚܛܓܢܚܛ
Al moftares

بالله عرف لي الدعيسة لغة و شرعا ..

شكرا .


اقتباس
المشاركة الأساسية كتبها [ لــمّــآح ]
هههههههههههههههههه ..
ننطرك ..

جايينك في الطريق .


شكرا ليكم .
__________________




ياربي ..افتح على قلبي ..
و طمئنه بالإيمان و الثبات و السلوة بقربك ..
[عبدالله]

من مواضيعي :
آية الحجاب من سورة الأحزاب ( أحكام و إشراقات )
::: كيف نقاوم التشويه ضد الإسلام و ضد بلادنا:::(مداخلتي في ساعة حوار مكتوبة و مشاهدة)

الـصـمـصـام غير متصل   الرد باقتباس
قديم(ـة) 18-08-2010, 05:56 PM   #17
مخاوي الصمت
قد ثلمت من الإســلام ثلمة
 
صورة مخاوي الصمت الرمزية
 
تاريخ التسجيل: Sep 2001
البلد: اللهم ........................... إغفر لي ما لا يعلمون............. واجعلني خيراً مما يظنون......... ولا تؤاخذني بما يقولون..............
المشاركات: 3,720
أجل لا عمرك تآقف بجنبي هههههههههه

حسيت يا أبو صم

يا حبيلك بص
__________________
" والله يا إخوة بقدر ما تعطي أي قضية من وقتك بقدر ما تكون هناك نتائج
إذا تعطي أي قضية فضلة الوقت أيضا أنت تأخذ فضلة من النتائج
أما أن تعطيها كل وقتك وتعيشها تعطيك كل شي "

القائد الشهيد خطاب تقبله الله في الشهداء
مخاوي الصمت غير متصل   الرد باقتباس
قديم(ـة) 18-08-2010, 06:10 PM   #18
ŔǺỶĀЙ
عـضـو
 
صورة ŔǺỶĀЙ الرمزية
 
تاريخ التسجيل: Oct 2009
البلد: 20/10/2010 تآريخ مهم . . .| | كونو على الموعد | |
المشاركات: 1,548
اجل مدرس اهليه...


الله يعينك عليهم ...


اقتباس
قلت لا عمرك توقف جنبي ولا تراك راسب بالتفسير

شكلك طويل ..


__________________
.
_____________

الصورة مخالفة . !

[اللهم فك اسر حميدآن التركي ]
ŔǺỶĀЙ غير متصل   الرد باقتباس
قديم(ـة) 18-08-2010, 06:14 PM   #19
[ لــمّــآح ]
مُــدَانْ
 
صورة [ لــمّــآح ] الرمزية
 
تاريخ التسجيل: Apr 2008
البلد: هُـنَـآكْ حَيْثُ الأًلَمْـ '
المشاركات: 5,629
اقتباس
أما إذا وقفت حسيت إني (سنشيروا)

أجل سنشيرو هههههههههههههههههه إلآ سنشيرو بالألف وإلآ بدون ..

اقتباس
والله يابي ضحك بس مالها داعي نحطم الدب .. !

ههههههههههههههههههههههههههههههههههه ذكرتن بوآحد معي بالفصل قبل كمين سنة ..
عندنا مدرس شكله تووحفة .. ويجيك يرسمه رسمة بنت كلف ومير يطيح بوه ويرسله للوكيل
يوم شآفه الوكيل ومير يضحك ويقول له لآ تعود له ههههههههههههههههههههههههههههه

اقتباس
طبعًا الاسم نعطيهم ، و الباقيات أنواع المخارج ..

ممكن تعطينا المخآرج ومنك نستفيد ..

اقتباس
ياشباب على (طوووووط) أنت وياه .. الاستاذ بيتكلم هههههههه أبوك يالعربجي

ههههههههههههههههههههههههههههههههههههههههه فسحة هالطآلب .. أو الله تدريس يا أبو عزوز

اقتباس
أنت عندهم دايم يوم السبت الحصة الأولى

الحصة الأولى يوم السبت حتى أنت دخت وأنت تكتبه .. أنت عندهم دآيم
__________________
صباح الجرح يا أمتي ..
صباح الأمل بـ عينيّ قتيل ،
صباح القتيل بـ عينيّ صغير ،
صباح الفجعة بقلب أرملة ،
بصدر ثكلى وحقد حنظلة
صباح الشتات !
[ لــمّــآح ] غير متصل   الرد باقتباس
قديم(ـة) 18-08-2010, 06:26 PM   #20
إبراهيم الضبيعي
عضو اللجنة الإعلامية
مـشـرف أفراح واحتفالات
 
تاريخ التسجيل: Jul 2004
البلد: بريدة
المشاركات: 6,638
ايه هذولي المواضيع ولا بلاش
ترى منافسه بينك وبين الدعساوي ايهم احسن موضوع

اقتباس
عشان لو بنسحب بأي لحظة ولا فيه مجال

هين ذي لا تفكر به
__________________
.

لتصوير الحفلات والزواجات والإجتماعات والمناسبات
المراسلة على الخاص
0505435500

.
إبراهيم الضبيعي غير متصل   الرد باقتباس
قديم(ـة) 18-08-2010, 08:45 PM   #21
هاوي الربع
Guest
 
تاريخ التسجيل: Feb 2010
البلد: بـــــريــــــــدة
المشاركات: 851
شكرآ ابو صمصام الله يسعدك

بإنتضار التكمله هذاي احتري .. تحياتي لكـ يالغلاآآ
هاوي الربع غير متصل   الرد باقتباس
قديم(ـة) 19-08-2010, 12:21 AM   #22
الـصـمـصـام
عبدالله
 
صورة الـصـمـصـام الرمزية
 
تاريخ التسجيل: Jun 2004
البلد: [ الرياض ]
المشاركات: 9,738
::: نواصل :::


الصراحة ياجماعة ودي أذكر اشياء واجد بس خايفن يطيحون بي ، لأنهم ما خلوا شي بالأنترنت ، واحدن منهم ذاك اليوم قالي تعال يا أستاذ أبيك بموضوع .. رحت له و مير يطلع جواله ، ولا الأخ ضافن كل صور الفيس بوكـ ، و حاطهن ، طبعًا أنا معطيهم الحرية بالجوالات داخل الفصل بس ياويل اللي يطلع جواله و أنا أشرح ، و الحمد لله ماشين معي تمام التمام ...

مالنا و مال الجوالات و القوانين .. نرجع لسالفة فصل البعارين ( اللي أجيهم يوم السبت الحصة الاولى ) طبعًا تعرفون الوضع بمثل هالحالة ، لا مدرسين ولا طلاب ، لكن وش نسوي عاد .. أكاليوم بعد حدى الإجازات دخلت السبت الحصة الأولى ولاي مقابلهم ..

قلت لهم : السبت .. الحصة الأولى .. و المدرس يقابلكم ... قرف صح .؟ قالوا : إيه قلت ما ودي أجاملكم ، و الله لا شفت وجيهكم جان نفس الشعور لكن يالله صباح خير و المشكلة كل شوي داخلن علينا واحد من الطلاب المتأخرين ، لأن الإدارة مثل ما تعرفون أهليه ما يدققون بالتأخرات الدعوى سايبة هذا وهي من اكثر المدارس الأهلية حزم و شدة .. لكن ما بالفار فارن طاهر ..

فيه طالب الله يذكره بالخير أسميه ( أبو علي ) ، سبحان الله شكله تقل سيرلانكية و لا بنقالي عمره 17 لكنه طويل ، و عليه سيقان ماشاء الله ، كراعين ، و إذا دخل و أنا أشرح سوا زحمة و رفع إيديه للسلام و جا يحب راسي و خشمي و يسوي طقوس و عادات و تقاليد مدري وش تبي ، المهم إني أتمنى أنه ما يدخل و أنا أشرح ، اعرفوا انه من قوة القلق اللي يسوي منب أبدأ بالشرح إلين يشرفنا الطالب العزيز ( أبو علي ) حتى لو تأخرت الحصة عادي ، المهم اننا انفتك من دخلاته اللي تقل دخلة مصارعين WF .

و إذا جلس بدا يتكلم على اللي قدامه ، و ياخذ علوم اللي و راه ، و يدور طاولته إن كانها مسروقة ، و طبعًا أنا اتفرج عليه .. مرتن من المرات بعد ما طيح اللي براسه ، قلت خلاص ياشباب نبدأ بالشرح ، و ملزوم تسكيت الطلاب ، ياولد اسكت ، ياولد لو سمحت ما أبي صوت ، يا ولد انطم ، ياتنكة انكتم ...إلخ <=== مالها داعي نقول الباقيات


لعل الجميع اسكت ، و بقى ( أبو علي ) يقرق ، إلا و يرتفع الإيمان عنده ، و يقول لي أسكتهم ياستاذ ، وهم ساكتين المشكلة ، بس ليته يتبرع لي و يسكت هو إلا والله و يبدا يلج بلحاله ( يااااااولد أسكت ) <== نسيت أقولكم أنه يرشك بالسعابيل وهو يهرج ، ( ياااااااولد مابي صوت ياملاعين اسكتوا )

بسم الله الرحمن الرحيم ..!!! وش جاوهـ الولد ، حاله هستيرية براسه هواش ما طلعه من أمس ، و جاي هنا عندي يلج على أخوياه اللي ساكتين ، عاد قعدت اناظره إلين خلصت الحالة مير أقول : ( و مُطعمةِ الأيتامِ من كدِّ فرجها **** لكِ الويل لا تزني ولا تتصدقي ) .. مير ينط علي ( إيييش ) .. <=== رش سعابيل خفيف قلت أبد سلامك .. ههه بس الله يذكره بالخير ، مع أنه دجة و دمار بس يعجبن ان عنده مراجل و علوم سنع و فزعة و نخوة ..

سالن أبوه عنه قلت والله ولدك هاجتن به ، بس بالمرجلة سلم لي عليه والله ..


أما الطالب الثاني معه بنفس الفصل ، و هو وياه الملح و النار ، تقل جارات يادافع البلى ، لازم نقل تأديبي واحد بزاوية و الثاني بالزاوية الثانية ... ولا الله يعين على لجتهم و هوشاتهم ، الثاني ( بريداوي ) عليه لسان ولد الذينا آمنوا مدري منين جايبه ، شكله محرج بسوق التمر ولا شيء ..!

أذكر أول درس شرحته لهم ، سألن سؤال ( ظاهرهُ البراءة ) ، و لكن الباطن مش كويس بتاتًا البتة ، مالها داعي عاد نجيب زود تفاصيل ، المهم أن مقصد هالعفريت غير شريف أبداً أبداً ، لكن يحسبن ما فهمت ، طبعًا جاوبته على قدر السؤال ( على أنه سؤال شريف عادي ) ..

يوم صار بعد ثلاث أسابيع ، و أناديه .. و أقوله ( الظاهر أنا جاي من المريخ .. و لا من بنقلادش ) قال وش السالفة ؟؟ قلت أبد .. و اذكره بالسؤال ، و طبعا فيه اسئلة ثانية غيره ، بس صعبه تفتح الموضوع قدام الطلاب ، لأن به ناس مساكين ما لعب بروسهم الشيطان .، ما ودك تفتح روسهم على الشر ...

المهم ذكرته بأسئلته اللي زي خشته ، همن قلت له ( أنت مقصدك من هالأسئلة شريف و لا ابن كلب و غير شريف ) قال ( ابن كلب و غير شريف ) عطيته كلمتين على الطاير ، و راح هههه .. بس والله قبل كم يوم ضحكت عليه ضحك .. دق علي يبي يبارك لي برمضان .. قال هلا أبو عزوز .. بالله وش أخبار الإسلام و المسلمين قلت له شكلك عايش بكنيسة ياوليدي ..؟ قال لا بس ما أعرف إلا أنت مطوع قلت أبسألك الله يخلف .. آدمي منزوع المكينة <=== خبرت آدمي بمكينة أصلاً ..


::: نكمل عقبين ::
__________________




ياربي ..افتح على قلبي ..
و طمئنه بالإيمان و الثبات و السلوة بقربك ..
[عبدالله]

من مواضيعي :
آية الحجاب من سورة الأحزاب ( أحكام و إشراقات )
::: كيف نقاوم التشويه ضد الإسلام و ضد بلادنا:::(مداخلتي في ساعة حوار مكتوبة و مشاهدة)

الـصـمـصـام غير متصل   الرد باقتباس
قديم(ـة) 19-08-2010, 12:45 AM   #23
أبو ريّـان
.
 
تاريخ التسجيل: Jul 2007
البلد: .
المشاركات: 3,309
واحد من الشباب مدرس بمدرسة أهليّة , يقول دخلت فصـل بعاريـن ( زي سالفة فصلك السابق ) .. ويقوم طالب ملوووسـن
وقال : أستاذ أبسألك , كم راتبك ؟! 800 ريـال صح ..
خلاص خلاص , حنا الطلاب نبي نتدافع ونتقاط .. ونعطيك 800 كل شهر
بس لاتجي عندنا بالفـصل :s
>>
__________________

أبو ريّـان غير متصل   الرد باقتباس
قديم(ـة) 19-08-2010, 01:04 AM   #24
الجادي المدوف
كاتب مميّز
 
صورة الجادي المدوف الرمزية
 
تاريخ التسجيل: Mar 2010
البلد: الرياض ~ بريدة
المشاركات: 2,699
أبو عزوز ..
بما إنك مدرس تفسير يجوز أقول "عزوز"
موضوع رائع، وقصص جميلة، شكرًا عبودي
__________________




الجادي المدوف غير متصل   الرد باقتباس
قديم(ـة) 19-08-2010, 01:19 AM   #25
الـصـمـصـام
عبدالله
 
صورة الـصـمـصـام الرمزية
 
تاريخ التسجيل: Jun 2004
البلد: [ الرياض ]
المشاركات: 9,738
اقتباس
المشاركة الأساسية كتبها سواق تريلهـ !
أبو عزوز ..
بما إنك مدرس تفسير يجوز أقول "عزوز"
موضوع رائع، وقصص جميلة، شكرًا عبودي

هلا حبيبي .. أنا منب مفتي .. و فعلاً فيه علماء تكلموا فيها ..
و فيه علماء أجازوا .. و ميلي للثاني ، و الأول للاحتياط ..
و هذا أذكره قديم .. لكن لعلك تبحث لنا موضوع بالساحة عن الحكم الشرعي ( بحث ) مهب نقل

شكراً ليك .. معليش على نطة الردود ..
__________________




ياربي ..افتح على قلبي ..
و طمئنه بالإيمان و الثبات و السلوة بقربك ..
[عبدالله]

من مواضيعي :
آية الحجاب من سورة الأحزاب ( أحكام و إشراقات )
::: كيف نقاوم التشويه ضد الإسلام و ضد بلادنا:::(مداخلتي في ساعة حوار مكتوبة و مشاهدة)

الـصـمـصـام غير متصل   الرد باقتباس
قديم(ـة) 19-08-2010, 02:06 AM   #26
ْْْXXXراكب بورشXXX
عـضـو
 
صورة ْْْXXXراكب بورشXXX الرمزية
 
تاريخ التسجيل: Jun 2010
البلد: في قلب النملة
المشاركات: 1,007
اجل تحرين اهون عن الاهليه مفكر به هالسنه

تنصحن به ولا اهون؟ ادرس ماجستير ابرك لي ؟
__________________

واحد واحد واحد الراجحي احسن واحد
ْْْXXXراكب بورشXXX غير متصل   الرد باقتباس
قديم(ـة) 19-08-2010, 02:17 AM   #27
الجادي المدوف
كاتب مميّز
 
صورة الجادي المدوف الرمزية
 
تاريخ التسجيل: Mar 2010
البلد: الرياض ~ بريدة
المشاركات: 2,699
^
طالب ولا مدرس ؟ ذذ
__________________




الجادي المدوف غير متصل   الرد باقتباس
قديم(ـة) 19-08-2010, 02:19 AM   #28
أبو رزان
** B a d e r **
 
صورة أبو رزان الرمزية
 
تاريخ التسجيل: May 2005
البلد: Oo buraydah city oO
المشاركات: 4,079
أبو صم وشو " سنشيرو " يعني حنا اللي من مواليد 1410هـ وفوق نطلع برا
طيب وش يقرب سنشيرو لبرغشه >> إسأل بدر العبد الله

وأما أبو علي ,, شكله ذا عادّن روحه مع المدرسين ( توووحفه هالولد )


بإنتظآر البقية
أبو رزان غير متصل   الرد باقتباس
إضافة رد

الإشارات المرجعية

أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق

انتقل إلى


الساعة الآن +4: 10:01 AM.


Powered by vBulletin® Version 3.8.6
Copyright ©2000 - 2017, Jelsoft Enterprises Ltd

المنشور في بريدة ستي يعبر عن رأي كاتبها فقط
(RSS)-(RSS 2.0)-(XML)-(sitemap)-(HTML)