دهران
New Member
كنت امس في هالمحطة الزينة في الطريق المؤدي للمطار وأنا طالع من بريدة وبالتحديد قبل إشارة البصر
صراحة قاهرتني البلدية أو هي وزارة النقل ليش صاكين على هالمحطة ولا أحد يقدر يجيها من الطريق العام ؟
مع إنها أحسن محطة على الخط في المقابل فيه كم محطة على نفس المسار ( مخيسة ) بما تعني الكلمة من معنى ولا فيها إلا يمانيين ما يعرفون أي شي عن التطوير كل همهم الفلوس وبس ومع ذلك المحطة على الشارع مباشرة !!!!!!
المهم هذا ماهوب موضوعنا
المحطة هذي اللي أنا أحبها ومعجبتن فيها بنغالي ماهوب مزبوط , أعتقد والله اعلم إنه غشاش
على قولة الوالد الله يرحمة ( أنا ما أتهمه بس ما أبريه )
وصلت من حفر الباطن بالسيارة ( جمس 2005 ) والبنزين فيه أقل من الربع شوي
قلت عب 91 فل
المهم حولت أمغّط ظهري ولا والله إنتبهت له
يوم خلص قلت كم الحساب ؟
قال 52 ريال
قلت ويش ؟
قال 52 صديق
قلت أنت معبي 91 وإلا 95 ؟
قال 91
قلت كم سعر اللتر هنا
قال 45 هللة
قلت أجل وش المشكلة ؟
قال مافي مشكل صديق خزان فاضي
قلت لا ياشيخ ؟
لعنبو إبليسك للسيارة معي 6 سنين ماعمري عبيت بأكثر من 45 ريال حتى لو سعر اللتر 49 هللة ( في الطرق السريعة اللي ما يخافون الله في المسلمين )
المهم شكيت إنه مخلي العداد وفيه مثلاً 10 ريال وعلى طول حطه في التانكي وزاد علي هالعشرة مثله مثل باقي هالسملق اللي يستغفلون الناس
ويوم قلت له كذ
وهو يطير بي ويطير عيونه علي
قلت بعد طقوع ونزرة ؟
باكلم الشرطة
قال كلم اللي تبي لكن 52 ريال بتنقدها ويدك فوق رقبتك
أنا والله مستعجل ولا عندي وقت للمشاكل وإلا والله مانيب قليل شر
عطيته 52 ريال وطلعت من عنده وانا أتحسب
وصورته وصورت كل شي
واللي صار حدى أمرين يا إنه غشاش ولعب علي وهذا هو غالب الظن
يا إن الطرنبة اللي تعبي البنزين خربانه والعداد ما يعطي قراءة صحيحية
وفي كلتا الحالتين صاحب المحطة لازم يكون عنده خبر
ولا احد يقول لي يمكن السيارة فاضيةأو يمكن أو يمكن
السيارة سيارتي واعرفها والله ما عمري عبيت بهالقيمة في حياتي حتى لو وصل اللتر 50 هللة , كيف عاد والبنزين بسعر 45 هللة
نصيحة لوجه الله لصاحب المحطة ( إنتبه لمحطتك ) ترى اللي مستاجرينها خربوا سمعتها ( وما ودي أتكلم عن السوق عاد واليمنين اللي فيه خلونا على البنزين بس
والله من وراء القصد
أخوكم ابو فارس
التعديل الأخير بواسطة المشرف:
