alproffesur
New Member
السلام عليكم ورحمة الله وبركاته
وكل عام وانتم بخير وعافية ولا حول ولا قوة إلا بالله وإنا لله وإنا إليه راجعون وعيدكم مبارك
في عصر اليوم الرابع من رمضان عام 1429 هـ
جان اتصال من ابوي يقول ترى حنا وعمومتك راح نفطر " بالمستوي – بالشماسية " قلت خلاص بجيكم
دخلت الشماسية يوم طلعت مع طلعة " النبقي " كان الخط سايدين بطول 300 متر ثم يصير الشارع سايد واحد
كنت امشي بسرعة 70 كلم تقريبا مستمتع برؤية البر والتطورات في الشماسية شوارع جميلة بس ما دريت ان هذا التطور خلفه تخلف كبير
يوم انتهى السايدين ما دريت الا قدامي كفرات متفرقه كحاجز وخلفهم سلك لمبات وبعدهن بخمسة امتار بالضبط حفرة قطرها تقريبا عشرين متر وبعمق متر ونصف
قمت على الفرااااااااااااااااااااااااااااااااامل لكن ما ينفع انك تمسك فرامل قدام حفره بهذا الحجم محفورة بوسط الشارع وبدون أي علامات تنبيه سوى كفرين وسلك لمبات قدام هالحفره كما اسلفت بخمس امتار فقط وكان البلدية تقول " أهل مكة أدرى بشعابها "
يوم مسكت فرامل صار كفر سيارتي فوق الكفر اللي حاطينه قدام الحفرة كعلامة تنبيه وهذا الكفر سبب مزيد من الانزلاق
ما اذكر الا اني اقول وانا مساك فراااامل بسم الله بسم الله
ثم بانت لي الحفرة " خندق الشماسية ضد زحف جيوش التتار " وهي تبتسم بهذا الطعم اللذيذ
وهه وهه وكح كح والسيارة ماسطة بوسط هالحفرة
وبعد ما انتشر الغبار واشوف المساحات شغاله وانا على قيد الحياة
نزلت من السيارة واجد نفسي معافى سليما بحمد الله وفضله ولكنني بوسط خندق كبير عانيت كثيرا للخروج منه
وفي ظرف دقيقة جاني كم واحد من الكشاته الذين سمعوا صوت الفرااامل مع اذان المغرب
الحمد لله على السلامه سلامات سلامات وراك ما تشوف عمى انت ؟ قلت ايه عمى
قلت لهم وين الفطور؟
رحت معهم وافطرت وابوي يتصل وهو حمق لاخر شيء وينك وينك فشلتنا عند عمومتك
قلت له والله يا بوي انا طايحن بوسط جفره وافطرت فيها اذا خلصتوا تعالوا
ما قعدت دقيقة الا وكل عمومتي وعيالهم جاييين وهم يضحكون علي
تبون الصج صرااااحة فشيلة هالطيحة بهالجفرة
بعدين جاء المرور وكتب لي تقرير يفيد بانه لايوجد أي علامات تنبيه وووو
بعدين جت البلديه وردموا هالحفرة بالشيول وطلعوا سياراتي
ومن العجائب بهذا الحادث العجيب ان سيارتي ما جاها أي شيء سوى سفطة بسيطة بالصدام وانكسرت علبه ماء المساحات
فحمد لله على سلامتي وسلامة سيارتي الصغيره المخصصة للهروب من الزحمات والوقوع في حفر البلديات
عاد الله يعين البلدية على الشكوى
بطالب بتعويض مليون مقابل بس روعتي
وبطالب بأرش الفرق بين قيمة سيارتي قبل الحادث وبعده
وبطالب بتصليح سيارتي بيكلف 7000 ريال كل تحتيها طلع خربان وهذا تعديل مني اليوم على هذا الموضوع اللي كتبته بنفس يوم الحادث
من الطرائف سالت الشباب وشوله حاطين هالجفره ؟
قالوا بيحطونها دوار !
قلت كيف دوار بشارع مافيه تقاطع ؟ وبعدين كيف دوار تحت الارض ؟
لا اكيد هذا خندق محفور ضد التتار لانه موضوع بطريقة حيله ومكر بدهاء عجيب
ما ندري متى البلديات بالسعودية ترسي المشاريع على مقاولين يملكون كل مقومات اقامة المشاريع على الطرق ؟
اترككم الان مع صور الحادث الطريف
وهذه صور صوّرت نهاراً :
.
.
التعديل الأخير بواسطة المشرف:
