.::: [ مستلزمات الرحلات والمكاشيت ] :::.

[قرناس]

.::: [ مستلزمات الرحلات والمكاشيت ] :::.

السلام عليكــم ,,
حياكــــم الله جميعاً

بما أن الجو في تحسن ولله الحمد وموسم الصيف بدأ ينصرم ..
فأحببت أن أضع بين أيديك وأعينكم
قائمة بحوائج الكشتات والرحلات والفلات :) :)..

هذه الأغراض هي حصيلة نواقص تأتيني في كل رحلة من أيام الثانوي
سجلتهن بورقة .. وعززتهن بمواضيع اهتمت بهذا الشأن في الشبكة العنكبوتية ..

وراح أخليهن على ستة أقسام /

بســم الله ,,,

القسم الأول : عدة القهوة والشاهي
دلة قهوة + ملقمة قهوة + ليفة دلة + ابريق شاهي + ابريق تفويح +
إبريق حليب + بيز + كبريت أو ولاعة + ولاعة ( كوفيا ) أيضاً
+ طاسة أو سطل + شنطة بيالات وفناجيل + كيسان ورق +
سكينة ، ملعقة ، مفك صلصة + ملقاط + فوطة صغيرة للتنشيف
+ غضارة للشرب + دافور + مركاب للضو + ذراية

* طلبات القهوة والشاهي :
قهوة + هيل + زعفران + مسمار + تمر
شاهي تلقيمة + سكر + نعناع + زنجبيل + ملح ..
... ولـراعين الكيف ,, يضاف .. النجر والمحماس :) .

_ _ _ _ _ _ _ _ _ _ _ _ _ _ _ _ _ _ _ _ _

القسم الثاني : عدة الطبخ
كـاتم + قدر عادي + صحون + سكاكين + ملاعق + مقلاة + صاجة حديد +
ملاس + صحون بلاستيك + شبك شوي وأسياخ + قـز + غاز + لي غاز + صابون , ليفة +
سفرة + قصدير + أكياس نفايات

* طلبات الطبخ:-
رز + مكرونة + بهارات + زيت أو زبدة أو سمن + لحم أودجاج أوسمك + بصل +
طماطم , صلصة + ملح + ليمون اسود + فلفل أسود + بهارات مشكله + طحين
+ عسل + ثلج + ماء بارد + فاكهة + خبز .

_ _ _ _ _ _ _ _ _ _ _ _ _ _ _ _ _ _ _ _ _

القسم الثالث : أغراض الكشتة عموماً
جالون ماء + لي ماء + فرشات + مراكي + رواق + حافظة ثلج ( في الصيف )
+ حطب + جراكل للوضوء + ترمس + حبل + ماطور كهرباء مع الأ سلاك واللمبات + كشاف .

_ _ _ _ _ _ _ _ _ _ _ _ _ _ _ _ _ _ _ _ _

القسم الرابع : في حالة التخييم :
خيمة + أعمدة + أطناب + أروقه + أشرعه زرقاء بلاستيك
+ فأس + منشار + كريك + مسحاة + مطرقة + واير + شطرطون لمبات

_ _ _ _ _ _ _ _ _ _ _ _ _ _ _ _ _ _ _ _ _

القسم الخامس : لرحلات الصيد
السلاح ( أم صتمة 17 أو 35 للدخل ، شوزن أم خمس أو خرازة للقميري )
+ الفشق + مشرط للذبح+ علاقة لجمع الصيد

_ _ _ _ _ _ _ _ _ _ _ _ _ _ _ _ _ _ _ _

القسم السادس : أغراض السيارة
عدة كاملة + ماطور هواء + عيار + رقع تيوبلس + بلف +
سيور احتياطية + كنود + قارمن + دربيل .

____________________

إذا كان فيه شي ناقص فلاتحرمنا تعقيبك لتكتمل الفائدة ..
بالتوفيق للجميـــــــع

قرنـاس
29 / 9 / 1428 هـــ
8:20 صباحاً


و هنا ملف متكامل فيه أبرز مستلزمات الرحلات البرية
http://www.buraydahcity.org/upload/1...1192113842.zip

[الفـــارس]

حلو عليك يا أبو سليمان ..

موضوع متعوب عليه ..

تسلم يديك يالغالي .. :)

[al7nooooon]

موضوع خطير عاد عزبتي حقت البر به كل هاللي قلتهن سبحان الله!!!!!!!!!!!!!!!!!!!
>>>>>>إيه هين :d

[A N A S]

المستلزمات والله وافيه وكافيه .



مشكور

[عمر الصمعاني]

بعدي والله ..
في المفضلة لحين التجهيز : )
دمت وعشت وبارك الله فيك

[أبوسعودالقصيمي]

جاري الحفظ في ملف وورد .. همن نحطحه في سطح المكتب الكمبيوتري .. :113:

مهبول .. تأبرني على هيك مواضيع ..

س ق و

[ابوشظاف]

اقول ياشباب وش آخر الطيور القميري .. يقولون باقي شوي .. إذا فيه واحد طالع للبر يعلمنا .. تكفون ودي اكشت ومشتاق للصيد .. من قبل رمضان ما كشت ..

ودي بعد أسأل بكم وصل صندوق الفشق ... وبكم وصل سعر ام خمس سوبر بانلي :41

وآسف على الإزعاج...


لكم تحياتي,,,,,,,,,,,,,,

[وحيد الخلان]

الله يعطيك العافية يابوسليمان على الموضوع ..


والله يجعل ما تقدم يكون في ميزان حسناتك ..



على اني ما نب راعي طلعات واجد بس يجوزن لي هالمواضيع ..


وين ابوآدم يعطينا بس ختم التميّز ..



:)

[abo suliman]

ويلومونن .. بحبك يأبو سليمان ..

وهـ بس ...

عاشت أيامك يالغالي ... أيه تسذا اللي على ماقال ...

ممكن طلب يأبو سليم ..

( ممكن تسير تبع أدوات العدة خابرن لك محل بجنب التسبريت http://www.raffe3.com/uploads/d32a4da860.gif )

صراحة ..

تجهيز .. مايحتاج .

ولو تسمح لي ياقلب قلبي ..

عندي .. ملف ورود .. به تجهيز الرحلات من إلى ...

وتطبعه .. وتكتب عند اللي تبيه ( صح )

وهي من إعداد الأخ ( أيمن )
المشرف في منتدى مكشات


وهاذي صورة للملف ..

http://www.buraydahcity.org/upload/13144_01192113940.gif



وهنا رابط التحميل
http://www.buraydahcity.org/upload/13144_01192113842.zip



ولعيون حبيب ألبي .. أبو عاصم http://www.raffe3.com/uploads/d32a4da860.gif
هذا الختم

http://www.buraydahcity.org/upload/13144_01190377702.gif



مع التحية
ooo1

[قرناس]

الفارس
الحلو حضورك يابعدي ,, يا أهلا وسهلا

al7nooooo
هلا ابراهيم ,, مير كلك بركة ذكرتن بغرض مهم ماكتبته
وهي الكاميرا :) .. شاكر ومقدر

بريدة city
حياك يا الغالي
والشكرلكـ

عمر الصمعاني
متشكر يابوعبدالله ,,,


رواق .. س ق و
تأبرني أنت

ابوشظاف
القميري ماحولك الحين الا حثاريب ,,
اللي بالساحل صادو هالأسبوع على خمس وقليل يتعدونه ,, وأتوقع بالعيد يبي يكبون العالم
فأخاف يابعدي تعني لهناك همن تصفى بالأخير على دجاج الوطنية :D
,, صندوق الفشق من 1700 الى 2000 تقريباً به عشرين دستة ..
والأم خمس السوبر مدري والله عنه بس غااااالية ,,
خذلك بس بلجيكية استعمال نظيف بـ 5000 تقريباً ومامثله ..
ولا إزعاج ولاشي بالعكس فرحنابك ,, يامليون هلا

وحيد الخلان
ياهلابك أبوعصص ,,
الله يقبل دعاك ويسعدك بالدنيا والآخرة

الجني العبد
هلا أبو آدم ,, تم حفظ الملف والصراحة جازلي ترتيبه مريح جداً
لاهنت يا الدقري .. تسيف أني أحبك :)

_______________

أيضاً من الأغراض المهمة جداً ونسيت أكتبه
( حسن اختيار الصحبة ) وهذي لحاله يبيله موضوع
لأن غالباً ماينكد الكشتات ألا ردي الطبايع

[مجنونة قيس]

ذبحتونا بالبر

[الـصـمـصـام]

..


يا قلبي أنت يابو سليمان ، والله ما عمري طلعت الظاهر و العزبة كاملة ، و الحمد لله ما شين بالبركة ، أصلاً إذا نسيت شيء من أغراضك فهذا يفتح لك مجال للاختراعات و الابتكارات <== تدري أنه نكبة بتلة يجيب العيد ..

[(<*أبولجين*>)]

أيضاً من الأغراض المهمة جداً ونسيت أكتبه
( حسن اختيار الصحبة ) وهذي لحاله يبيله موضوع
لأن غالباً ماينكد الكشتات ألا ردي الطبايع


لالالا تكلف روحك .. قل صحبة شروى قرناس والصمصام :p

[قصيمي محترم]

يمال العافية يابو سليمان ،، كفيت ووفيت
عسى الله يجيب الربيع والأمطار

[الكاشت]

مشكور أبو سليمان ماخليت شي احب اظيف الكامرة للتوثيق

[وحـيــد الـجـزيـرة]

كفيت ووفيت

[المستشار]

مضووووع و لا أروع ، بارك الله فيك يا أبو حصة ،،
و يستاهل التثبيت إليييييييييين يجي الحر الجاي :):):)

[قرناس]

مجنونة قيس
شكراً

الـصـمـصـام
حلو ,, النكبة تفتح مجال للإختراع بس به أشياء ماتترقع
يعني تخيل أنك كاشتن للصمان وناسين السكر وش الإبتكار بالحالة هذي:confused:
شكراً عبدالعزيز :D


(<*أبولجين*>)
شرواك الطيب يابعد الشهامة والمرجلة حبيب ألبي فادي ,,
الصمصام عز الله أنه نعم الرجل والصاحب ولا أنـا كمالة عدد ..

المغوار
اللهم آمين .. الله يجيب الخير ويغيث البلاد والعباد
حياك الله يابوعمر

الكاشت
إضافة في محله . . الكاميراً تخلد الذكرى
بارك الله فيك يا الغالي

وحـيــد الـجـزيـرة
ياهلابك .. وألف شكر على مرورك

المستشار
وشولوه الكلافة يابو محمد :D:D
ياحبيلك بعد .. متشكرين على المسامير يامطقة قلبي ويا أبو جلمبو شراييني

__________________

غداً الإثنين ستقام صلاة الإستسقاء
نسأل الله أن يغيث قلوبنا بالإيمان وبلادنــا باالصيب النافع

[الصباخ]

لالالا تكلف روحك .. قل صحبة شروى قرناس والصمصام :p

وأنا معكم :p .،






:113: تشكر أبوسليمان على هالموضوع .، <==== يبي يبيع سيارته ويشتري هايلوكس غمارة :D .،

[A N A S]

أيضاً من الأغراض المهمة جداً ونسيت أكتبه
( حسن اختيار الصحبة ) وهذي لحاله يبيله موضوع
لأن غالباً ماينكد الكشتات ألا ردي الطبايع


والله عشت :41


مشكور

[قرناس]

الصباخ
يابعدي يابو ريم .. رجولتك وشهامتك ماتحتاج لشهادة أحد
وصحبة شرواك يا الغالي مكسب وغنيمة .. الله لايحرمنا من خشيشك

بريدة city
عاشت أيامك . . وأتمنى يكون الموضوع نال إعجابك
متشكر يا الغالي

[أبو محمد النجدي]

هلا بييييييييك يا أبا سلمان
والله هالموضوعقصر عنوه ناخذ قلم ونبدأ نكتب اللي نذكره :)

بعدي والله

وكثر لنا من هيك يالبي
وباحتراء الموضوع القادم ويكون مصور:41


كفو والله

[سليمان العقيل]

الله يعطيك العافية...

[أبورائـــــــــد]

سلام عليك يابوسليمــــان ،،


من الأشياء الحلوة بالطلعات انك تاخذ كاميرة معك ، التوثيق مهم ..

والله ياهي وناسة اذا اجتمعتوا بعد الطلعة بأسبوع وقعدتوا تشوفون الصور بالمحمول وخذا ياضحك وتعليق ..

شكرا ابوسليمـــان ، وترى أحسن موتر للبر هي الديزووووووووول ..
الإعتراض ممنوع .. :(

[:: السامي ::]

نسيت شيء مهم بالعزبة , وهو

واحد قرم ,يسخن لك الماء الفجر بعز الشتاء
ويقطع عنك البصل , وعلى دربة يغسل الكاتم معه

ماصار قرم , صار شغاله :)

وصح نسيت شيء مهم هو


شاي ربيع تلقيمه

بدينا بالدعده

وش عندوه سامي الجراد :D

[الليــ الأبيض ـث]

.

ماشاء الله ..

بصدق مــبــدع .. :)

يعطيك ألف عافية على الموضوع الراائع ..


الليـ الأبيض ـث

.

[حسم]

http://www.t7leeh.com/mnwa/mnwa20.gif

[عطر الرياض]

وفيت وكفيت

[dim106]

بيض الله وجيهكم على هالموضوع اللي لا بد منه حتى للي يبي يكشت ورى المزارع..
ولا أنسى (غضارة) ماسبب التسمية بهذا الاسم؟

[محلق توليت]

ماشاء الله عليك

ماخليت لنا شي نذكره

بس كن العجرا مهيب معكم

[أبو سليمان 2005]

مشكور على التذكير .. :41

[عيودي]

والله تمام عليك تم الحفظ في الملف الخاص

[دندون]

الله يعطيك الف عافيه اخوي ماااااقصرت والله

[الوافي .]

السلام عليكم ورحمة الله وبركاته



جزاك الله خير ياقرناس

تبي الصراحة موضوعك

استفدت منه ..

كثييييييييييييييييييييييير مرة مرة مرة


وأرجوالتواصل معي ياقرناس بأميلي التالي


مع تحيات /
الوافي غريب الذوق
y.m.s-2008@hotmail.com
y.m.s-spchil@hotmail.com

[هايلكس بريداوي]

مشكور:d

[ابو ايوب]

الله يعافيك ابو سليمان صراحه انا اول مرة اشوف لوازم كذا للبر ليه ما تكتب يأخذ جميع ما في المنزل ويرتاح . هههههههه بس صراحه مشكور على الجهد الي سويته ....

[عيودي]

http://file9.9q9q.net/local/thumbnail/52848282/600x600.gif

[لد ابن صبيح]

باقي الي على باب يمين (ســـــــــــــــــــــــــــــــــــداح)

[فتى الرابيه]

الله يبشرك بالخير وللمسلمين اجمعين

[مَــهــَجــٌوُرَ]

مشكور وماقصرت يا قرناس
الله يذكرك بالشهده انشالله ذكرتن اخذ اهم شي
:d عود أذان :d

[قائد الأمجاد]

كفيت ووفيت أخوي

[أبو فـــــوزيه]

الله يعطيك العافيه كفيت ووفيت

[أبو جـــهـــاد]

سلمك ربي يا قرناس ..

تم الحفظ ..