المساعد الشخصي الرقمي

مشاهدة نسخة كاملة : كلمة بالعامية وحوليها الى الفصحى: بتعجبكم ان شاء الله بس ردوا

@صاحبه السمو@
12/9/1428 هـ, 01:52 مساءً
كلمة بالعامية وحوليها الى الفصحى: بتعجبكم ان شاء الله بس ردوا

--------------------------------------------------------------------------------

انا جايبه لكم لعبه اتمنى تعجبكم


وهي ... اكتبي جمله او كلمه باالعاااميه والي بعدك تقول نفسهااا بالفصحى

وتكتب جمله عاااميه للي بعده


وهـــــــــــكذاا







مثاااال


وين تبي تطس له


الترجمه

الى اين ستذهب



<<< اتمنى تعجبكم



ـــــــــــــــــ


وراكم ساكتين اهرجووووو
أسطورة الأي ــام
12/9/1428 هـ, 03:38 مساءً
الله تهبل لعبتس
يالله انا اببدأ

ترجمي التالي...
ادزلبي وجهتس ولا ترى ابعطيتس كف
@صاحبه السمو@
12/9/1428 هـ, 03:52 مساءً
ههه مشكوره
تعني إذهبي عني وإلا صفعتك
طيب :
وراه الدنيا دردبيس
ملاكي وقليبه
12/9/1428 هـ, 05:48 مساءً
وشو دردبيس ؟؟؟

حسب استنتاجي يعني حوسه << يمكن مو اكييييييييييد ..
يعني لماذا الدنيا فوضى ؟؟

واذا كنتي تعنين دردبيس = شقى
لماذا الدنياا مشقيه ؟؟ << وش رايكم بالنحو شكلي بنشاات على هاللغه ,,

تحيتـــــــــــــــــــــــــــاااتي ,,
@صاحبه السمو@
12/9/1428 هـ, 07:44 مساءً
برافو عليك يعني حوسه طيب عطينا جمله يالحلوه
*دلـ(ماما)ـوعة*
12/9/1428 هـ, 08:12 مساءً
خذي هذي طيب...
وراتس مرجهنه = ماذا بك صامته..
أولاه =أرجوك..

واذا نبطت براسي جمله ثانية أكتبة ان شاء الله..
مشكوره يهبل موضوعتس = رائع موضوعك:D
وبيص مسك
12/9/1428 هـ, 08:46 مساءً
اتحدى اي وحده تعرف ذي
تدحوس
ملاكي وقليبه
12/9/1428 هـ, 10:19 مساءً
تغبى او تلزق تدخل وتنشب انااااااااا اعرفه بس مدري اي تعبير يعبر عنها وبالعريه

هذه الفتاة اشغلتنا ماغير تلزق << وش رايكم باللغه عارفه بنخقل بس معلييييش ,,

وكلمتي مامعناة التسلب الاجرب ؟؟ << سهله بس احب هالكلمه

تحيــــــــــــــــــــــــــــــــااتي ..

قص قص ..
.ღ> سـنـــكـرس <ღ.
13/9/1428 هـ, 12:04 صباحاً
طيب عطينا علفجة كلمه؟
تقرفعي ====>طسي
ترآي أبلوحتس====>أبلحطك
أبخمس بوجهتس====>أبضرب وجهك الين يصير خرائط
ابعفجتس====>ابضربك حتى تصبحين سيارتن منعفجتن
ابدربيتس====>ابخليك تلوين و تدربين و تفنقسين يعني مدري شلون اشرح لك معناه
ابطعجتس====>سيم سيم ابعفجتس

***شكريات ع الموزوع
@صاحبه السمو@
13/9/1428 هـ, 12:50 صباحاً
طيب:
أبتسعس
*دلـ(ماما)ـوعة*
13/9/1428 هـ, 02:01 صباحاً
أجعفتس..أمطختس>>كلاهما تعني البوسة أي :أبوسك أو أقبلك..
تنكة >>تقال لشديدي الذكاء سريعوا البديهه ..العكس صحيح...
*دلـ(ماما)ـوعة*
13/9/1428 هـ, 02:02 صباحاً
أبتسعس...
ايس هادا كلام ..
آنا مافي يفهم ايس هادا؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟
؟؟؟؟
؟؟
الحين صرت تنكة ..مثال واقعي
رتوج
13/9/1428 هـ, 02:40 صباحاً
أبتسعس
إن كاني جيدة وشاطرة ولا قريته خطأ فإن معناه >> أصفعك!!
وبيص مسك
13/9/1428 هـ, 02:58 صباحاً
طيب وش معنى تعلفج
رتوج
13/9/1428 هـ, 03:06 صباحاً
تعلفج حسب معلوماتي بالجغرافيا= تمضغ بصعوبة
هل هي صحيحة أرجوا إفادتي>>عاد احسب كل الدعوى هرج عربي
وبيص مسك
13/9/1428 هـ, 03:38 صباحاً
علييييييييك كبس
حسب معلوماتي بالرياضيات انه تلوج الخبزه (ايقالي ترجمت):dيعني تعلك و تقطع اللقمه سنتين بثمه خاصه اذا كان ماله سنون:096:ياحليلك تصدقين انا عجزت افسره هههههههههه
@صاحبه السمو@
13/9/1428 هـ, 03:58 صباحاً
إفهتزيلي غداء
وبيص مسك
13/9/1428 هـ, 05:19 صباحاً
الله ياخد
ذبليسك اخذتي كلمتي
هههههههههههههه والله اني كنت تو بكتبه
معناه خللولي عشا
طيب وش معناى الكلمات التايه
ابقطيه
ادردب
@صاحبه السمو@
13/9/1428 هـ, 06:56 صباحاً
هههههههههههههههههههههههاي
معناه إقطعيه والثانيه أشرب
"الأسلاك متلولسه
**هند**
13/9/1428 هـ, 05:03 مساءً
الله يقطع بليسكم والله اني صرت كاني سوريه توها طابة ببريدة

منين جايبين هالالفاظ الغريبة ؟؟؟؟

المهم انا جبتلكم كلمة نطلتها من مرة اخوي

ابكشخ عليكم الكلمة هي متشرذمة؟

يلا وروني شطارتكم
**هند**
13/9/1428 هـ, 05:05 مساءً
اتوقع معنى كلمة متلولسة نظرا لانها جت بعد كلمة اسلاك.....

(( شكلي صدقت اني سوريه ))

يعني متشابكة
درة القصيم
13/9/1428 هـ, 05:14 مساءً
طيب يابنات وش معني كلمة يدعدع
سمعته من اخواني ولا ادري وش قصته:bad
**هند**
13/9/1428 هـ, 05:16 مساءً
يدعدع يعني يدعي المعرفة لكل شيئ

ليش ماجبتي معنى كلمتي :(
درة القصيم
13/9/1428 هـ, 05:17 مساءً
شكله موب كلمه قديمه شكله ولاديه <<يعني كلمة عيال:D
بس ميخالف قولن لي وش معناه
درة القصيم
13/9/1428 هـ, 05:25 مساءً
يدعدع يعني يدعي المعرفة لكل شيئ

ليش ماجبتي معنى كلمتي :(
هههههههههههههههههههههههههه
شكلتس صدز حمقه علي:p
خلاص ولا يهمك بجيب معناه بس ماعرف بسوي بحث اوكي:D
نيران
13/9/1428 هـ, 09:39 مساءً
متشرذمة >>> تعني متقطعة بإعوجاج .. حسب معلوماتي المتواضعة

والكلمة للي بعدي :

<هجـــــي الباب >
حنين الاندلس
13/9/1428 هـ, 10:01 مساءً
هجي الباب

معناه افتحي الباب

طيب وش معنى كلمة (مقصعر)
نيران
13/9/1428 هـ, 10:16 مساءً
مقصعر >>> منطوي على نفسه من الحياء أو من البرد وغالبا مايكون في الزوايا >> شرايك ؟؟؟


والكلمة للي بعدي :

<تشــــــــــــــــــاقلوا الدوشق >
.ღ> سـنـــكـرس <ღ.
14/9/1428 هـ, 12:41 صباحاً
777777777
يعني امسكوه كلكم
تعاونوا عليه


(طايرتن بوهته)؟
وبيص مسك
14/9/1428 هـ, 01:00 صباحاً
ياصاحبه السمو خطا ابقطيه يعني اقطعيه
له معنى ثاني
وشو؟؟؟؟؟؟؟؟؟؟؟؟؟؟
@صاحبه السمو@
14/9/1428 هـ, 03:42 صباحاً
طيب يمكن تكون إكمخيه مع راسه
وطايرتن بوهته يعني مستغربه
"وش معنى تحرينوه
رهف المشاعر
14/9/1428 هـ, 04:27 صباحاً
:094:تحرينوه يعني توقعينه ... وش معنى انتي قرمة .؟؟
@صاحبه السمو@
14/9/1428 هـ, 05:15 صباحاً
يعني سنعه <<<<<<<<<<طيب وش معنى سنعه:D
أم جديده
14/9/1428 هـ, 08:12 صباحاً
سنعه معناه قرمه
وش معنى
إنزلعي
مير
قط
يه
إنفهز
إحييه
أراسيل سلمان
14/9/1428 هـ, 08:21 صباحاً
إنزلعي
أغربي عن وجهي :d
مير
تصل بين الكلام :d
قط

هذي فصحى>> لم اره قط
يعني لم اره ابداااا
يه
كلمة تضجر واللبيب اذا سمعها يندزلع عن وجه القائل قبل يجيه بقس
إنفهز
وسع المكان ..أبعد
إحييه
تدل على ان الشي شديد مثل احيه حار احيه بارد احيه يوجع
يعني تراي اتألم

اللي بعدي وش معنى ؟؟
شالتس ولبطبتس ومسطبتس ونسفتس:113:
شهد العسل
14/9/1428 هـ, 08:48 صباحاً
شالتس : رفعك
لبطبتس : جدعك أو طيحك
مسطبتس : يعني نفس اللي فوق .. جدعك أو طيحك
نسفبتس : وشلون تنطق هذي .. :09: !


تبون كلمة .. أممممممممم
والله ماعندي .. :D !
لعل اللي تحتي تجيب .. :) !
أسطورة الأي ــام
14/9/1428 هـ, 08:56 صباحاً
طيب ياحلوات وش معنى
زيطه
ياعله ينكس لي

واتحدى احد يجيب لي معنى هالكلمه.. عريتسيبات(هي من اعضاء الجسم بس وييييييين؟؟؟؟)
أراسيل سلمان
14/9/1428 هـ, 09:02 صباحاً
يعني كوع :cool:
او ركب
اهم شي انهن مفاصل .


زايطه يعني خاربه او منهبله

يمكن 8

اللي بعدي وش معنى
اشوه ؟
@صاحبه السمو@
14/9/1428 هـ, 10:11 صباحاً
يعني أشوه :d
يعني الحمدالله ماصار هالشي
وش معنى"يهيل العقل"
بسمات دامعة
14/9/1428 هـ, 02:59 مساءً
يعني أشوه :d
يعني الحمدالله ماصار هالشي
وش معنى"يهيل العقل"

أي رائع جداً :41


طيب وش معنى ( مدرعم )
أسطورة الأي ــام
14/9/1428 هـ, 11:59 مساءً
مدرعم
تطلق على من يدخل فجأه بدون سابق إنذار وبذلك ينز(يتفاجأ) الشخص المدخول عليه<<<تعبير ميه ميه
مثال// هذا الشاب لا يستحي على وجهه لقد درعم على البنات

طيب وش معنى كلمة (((لقسه)))
وبيص مسك
15/9/1428 هـ, 12:41 صباحاً
يعني ثيابه وشعره حوسه
اوملطخات بمرق مع لبن


ماتلاجظن يابنات القصمان ان حتسينا نقوله ولا نقدرنترجمه؟؟؟؟؟؟؟؟؟؟؟؟؟؟؟؟؟؟؟؟؟:02


يحول ولاوحده اعرفت معنى ابقطيه؟؟؟؟؟؟؟؟
أراسيل سلمان
15/9/1428 هـ, 01:17 صباحاً
ابقطيه يعني ابعطيك مثال
انا اقولك لبسي انكب عليه عصير تقولين ابقطيه
وروحي اغسليه
ولا ابقطيه يعني اقطعيه

ماعندي كلمة اللي بعدي تحط
الجامده
15/9/1428 هـ, 01:26 صباحاً
هههههه ياحليلكن توي أدري انكن خبوبيات:D

طيب وش معناة ( انلطسي لاأحوس مريرتس:mad:)===>> قويه صح

أتحداكن تعرفنه:040:
وبيص مسك
15/9/1428 هـ, 02:37 صباحاً
يعني انطمي لقوم وافقع مرارتك
:
D:d:d:d
@صاحبه السمو@
15/9/1428 هـ, 05:15 صباحاً
طيب وش معنى تسبدي طعنن تقل سكاتسين
أراسيل سلمان
15/9/1428 هـ, 07:54 صباحاً
طيب وش معنى تسبدي طعنن تقل سكاتسين

يعني احس بوخزات ألم في كبدي <<ياعيني على اللغه اللي انما ايه

هع

اللي بعدي
تسني اوقد على نار
أم جديده
15/9/1428 هـ, 08:14 صباحاً
معناه إني منقهره مررررررررره

وش معنى:
يقالنه
تفغين
تفنكين
تلطين
أراسيل سلمان
15/9/1428 هـ, 09:00 صباحاً
وش معنى:

يقالنه
تطلق على الشخص اللي يدعي كثير
تفغين
توجعين وتزعجين

تفنكين
اول مره بحياتي اسمع به مع اني معجم متنقل للكلمات هذي يعني خبيره بس مادري هذي اول مره يمكنه مب كلمة بريداويه ؟؟!
تلطين
تلطينه بي يعني تلزقينه بي ...

وش معنى


أكسمر عراتسيبه لما يبدأ يخاتسي :113:
**هند**
15/9/1428 هـ, 11:09 صباحاً
ههههههههههه يمه والله انها كلمة توحش
لكن بجيبها وانا بنت ابوي

اكسمر يعني اكسر
عراتسيبه جمع عرقوب وهو تلك المنطقه من القدم اللتي تكون بالخلف
يخاتسي يعني يحكي بس شكلك كتبتيها وانتي تعطسين :d
**هند**
15/9/1428 هـ, 11:13 صباحاً
:41 وش رايك فيني؟؟؟؟؟؟؟
بسمات دامعة
15/9/1428 هـ, 11:51 صباحاً
يعني ثيابه وشعره حوسه
اوملطخات بمرق مع لبن


ماتلاجظن يابنات القصمان ان حتسينا نقوله ولا نقدرنترجمه؟؟؟؟؟؟؟؟؟؟؟؟؟؟؟؟؟؟؟؟؟:02


يحول ولاوحده اعرفت معنى ابقطيه؟؟؟؟؟؟؟؟

معنى ابقطيه اي اغسليه بقليل من الماء أي الجزء المتسخ فقط : 12

طيب وش معنى جلف
أراسيل سلمان
15/9/1428 هـ, 10:09 مساءً
ههههههههههه يمه والله انها كلمة توحش
لكن بجيبها وانا بنت ابوي

اكسمر يعني اكسر
عراتسيبه جمع عرقوب وهو تلك المنطقه من القدم اللتي تكون بالخلف
يخاتسي يعني يحكي بس شكلك كتبتيها وانتي تعطسين :d

ههههههههههههه

صح عراتسب يعني عراكيب
ام يخاتسي يعني يهذي وهو نايم بكلام غير مفهوم :D

وش معنى

تسيف تسطي ؟؟
وبيص مسك
15/9/1428 هـ, 11:14 مساءً
يعني كيف مااستحت على روحه

وش معنى منشبن
أسطورة الأي ــام
16/9/1428 هـ, 03:39 مساءً
منشبن اي عالق وملتصق بالشيء

طيب وش معنى
تحرولت
بلبطت
اندفق عقله
افهدزي لي
بسمات دامعة
17/9/1428 هـ, 12:06 صباحاً
طيب وش معنى
تحرولت
أصيبت بالشلل
بلبطت
سقطت يعني طاحت
اندفق عقله
أي خاف بشدة
افهدزي لي
خذي جزء لي


طيب وش معنى فرقعين جدي
*سفــانــا*
17/9/1428 هـ, 02:27 صباحاً
:D
تجنن اللعبة

فرقى عين جدي < كذا تكتب ههههههه شفتي الثقافة وش لون ؟

معناه ياللهول إنه كفراق عين جدي:113:

شقرن لصاحبة اللعبة
اللي بعدي

وش معنى

تسيف تسذاااااا ؟
وبيص مسك
17/9/1428 هـ, 03:17 صباحاً
كلمه خطيره
ما اظن ولا وحده تعرفه
اتحداكن



منصطغه
احس انه تحك الاذن
الجامده
17/9/1428 هـ, 07:23 صباحاً
تسيف تسذا ===>> كيف كذا
وتعني : ياربيه الى هاالحد وصلت هالمسأله :oo ===>د الوجه المعبر عن قائل تلك الكلمه

اما الكلمه الثانيه
منصطغه
اول مره اسمعه بحياتي لكن يبدو ان معناته وش بلاه هاجده مسكته ماله حس او نيمه
او ان اللي قاله عنده مشكله بحرف الراء يبي يقول منسطره يعني مسطره ومكفخه

طيب وش معناة ( منلفزه)
أراسيل سلمان
17/9/1428 هـ, 07:49 صباحاً
متخبية

وش معنى قطع يقطعك وارض تبلعك :d؟
أسطورة الأي ــام
17/9/1428 هـ, 04:20 مساءً
هذه الجمله تقال لمن أخطأ خطأ فااادح جداً والعياذ بالله
قطع يقطعك : يعني عساك تنقطع <<< احلفي والله ياانتي خطييييرة
وارض تبلعك : يعني تموت وتدفن بالأرض <<< صدز عاد

طيب وش معنى
بردزي به
يبربس ( تطلق على الأطفال غالباً)
امسطت
تمحوق
رثه (لقب)
بسمات دامعة
17/9/1428 هـ, 06:22 مساءً
هذه الجمله تقال لمن أخطأ خطأ فااادح جداً والعياذ بالله
قطع يقطعك : يعني عساك تنقطع <<< احلفي والله ياانتي خطييييرة
وارض تبلعك : يعني تموت وتدفن بالأرض <<< صدز عاد

طيب وش معنى
بردزي به
انظري اليه جيداً
يبربس ( تطلق على الأطفال غالباً)
يلعب بالماء او اي شيء سائل
امسطت
اي سقطت
تمحوق
تقريبا نفس معنى يبربس
رثه (لقب)
ما اعرف ذي اول مره اسمعه


وش معنى تمطرس
تزرط
تقحن
فروووحه
19/9/1428 هـ, 02:20 صباحاً
يؤ يؤ الصراحه عندكم كلمات مافيه امل تنفهم<<<<<<< 'طيب وش دخلس معنا
تراني رياضيه يعني من الرياض
بتقولون ليه جايه لمنتدانا خاص بالقصيم ؟؟ اقولكم اصلي قصيميه ساكنة بالرياض فهمتوا
واحب القصيم ولو اني مأجي الا ماندر
وسلامتكم
قلتلكم قصت حياتي
乂♥ متفائلة ♥乂
19/9/1428 هـ, 04:37 صباحاً
تمحوق >> تدلع
تمطرس >> !!!!
تزرط >> تأكل بدون مضغ
تقحن>> تشرب بكثره ودفعه واحده!!

وش معنى بكيستس>>من هي الذكيه!!
وبيص مسك
19/9/1428 هـ, 04:40 صباحاً
كان انا قريته صحيح
يعني شريتي هالشي من حسابك اومن فلوسك صح؟
manal
23/9/1428 هـ, 04:31 صباحاً
غلط عليك ياوبيص مسك
هاذي جدتي دايم تقوله صح يامتفائله
معناااااه.......بكيفك أوعلى راحتك
مثال:الجده: يا........تبين عشاء؟
أنا:لا يمه ماأبي
الجده:بكيستس

إن شاءالله فهمتوا الدرس
ايـ ق ـاع الزم ـن
23/9/1428 هـ, 04:56 صباحاً
مب بكيفتس يا..منولة.................؟!!والا...؟!!!



وش معنى ::

اتمردغه...؟!!

ربيتسه...؟!!

متراول...؟!!!

آراسيل أكيد عنده العلم...

موسوعة على ماقالوا..!!
قباصة من القباصات
23/9/1428 هـ, 06:57 صباحاً
هع هوووووووووووووووووع .. المفروض يحطون برنامج .. الوافي القصيمي ..ههههههههههههه


;)
乂♥ متفائلة ♥乂
23/9/1428 هـ, 08:29 مساءً
صح عليك يامنوووله ماشاء الله ذكيه طالعه علي

تصلحين مدرسه!!
خيالة المذنب
23/9/1428 هـ, 09:33 مساءً
وش معنى ::

اتمردغه...؟!!

ربيتسه...؟!!

متراول...؟!!!

آراسيل أكيد عنده العلم...

موسوعة على ماقالوا..!!

:113:

متراول يعني غير متوازن

هذا والله اعلم

باحتراء اراسيل تعلمنا الباقي
اه بس
24/9/1428 هـ, 12:05 مساءً
خياله المذنب وين الكلمه

زييينن اجل انا باقووووووول

امسطبه
سوآلف حرف
24/9/1428 هـ, 09:42 مساءً
تعني اجدعك
مسفهل
cool girl
24/9/1428 هـ, 09:44 مساءً
السلام
والله انكن تضحتسن........



اوول مشاااركة لي
والظااهر ان معناااه

******مستانس****مبسوط



والكلمات اللي عندي ......* اجلديه لما تبعرص!!!!
*ابعليه!!!!
*كودوه!!!

وابقولكن سالفتن عن كووودوه يقولون ان قبل مايفتح مطعم كودو انووه بوه واحدن قرقر <<قرر
انوه يفتح لووه مطيعم<<تصغير لمطعم المهم انوه قال لاموووه يبشره انوه فتح مطعم قالت اموه ::كودوه
وحلف هالواحد انووه مايسميه الا كودو وانتهت السالفه خخخخخخخخخخخخخ



مشكوره ع اللعبه خيتووو ويالله يابنات نبي عاد العابن مثل ذيي...


تقبلي مشاركتي
cooooooogirlooooooool
درة القصيم
24/9/1428 هـ, 10:14 مساءً
اجلديه لما تبعرص!!!!
يعني اضربيه الى ان يتشقلب من الوجع :D

*ابعليه!!!!
البلع يعني الاكل بسرعه وبدون هضم علطول للبطن :S

*كودوه!!!
يعني ليته
......................................

طيب
وش معنى:
اتسفيه!!

يتدودل!!

متعنقط !!
ايـ ق ـاع الزم ـن
25/9/1428 هـ, 04:48 صباحاً
كلماتي ياحبايب هاذي معناهن:


اتمردغه.اجلده جلدن مبرحاً(شكلكن ماتفهن اجل بعض الحتسي بمطبات..!!)

ربيتسه.صفة للسمينة اللي كله شحم وجسمه مهب متناسق...

&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;&#215;

وكلماتك يادرة:

اتسفيه:::اقلبيه



يتدودل:::يتأرجح...

متعنقط :::متعلق



وبعل اتوقع انه خطأ عليك يادرة ومعناته امليه....


كلماتي::

زام..او زامات؟!


محرول..؟!!


متسندر..!!!
manal
25/9/1428 هـ, 04:57 صباحاً
أبعليه<<<<معناه زوديه
يعني إذا جبتي ماء بارد مررررررررررره تقولك جدتك أبعليه
يعني زوديه ماء حار

ياحبيلكن بعد:rolleyes:
ღ الفتاة الحنون ღ
25/9/1428 هـ, 05:34 صباحاً
هع هوووووووووووووووووع .. المفروض يحطون برنامج .. الوافي القصيمي ..ههههههههههههه


;)


زين والله تقولين النكته وتضحكين عليه .. ;)

يله على ايدك ... سويلنا البرنامج ..:113:

..

تشكراتي لصـــاحبه الموضووووووووووع ..:41
ح ـايلـــيـة
26/9/1428 هـ, 10:25 مساءً
Stop

يــقفل ..

تم فتح لعبــة جديدة ..

http://www.buraydahcity.net/vb/showthread.php?p=760515#post760515

:)