ما هو شعورك يوم دخلتي منتدى بريدة ستي و حصلتيه مغلق للتطوير !!

[حمامة بريدة]

السلاااااااااام عليكم و رحمة الله و بركاااااااته


http://www.buraydahcity.net/close.gif

ما هو شعوركِ يوم دخلتي المنتدى و نطت بوجهك هالصورة اللي فوق !
نأسف المنتدى مغلق للتطوير لمدة 24 ساعة

أنا بتكلم عن نفسي ... طبعاً صارت معي قصة الله لا يعيد الشر: ...

أهلي يبي يروحون لخالتي و أخوي عنده اختبار و يبي يجلس بالبيت يذاكر ..
و أنا لأني مبطيه عن المنتدى و مبطيه عنكن كلكن جلست أفكر ....
أنا أروح مع أهلي لخالتي ؟ و إلا أجلس بالبيت و أفرغ شوقي للمنتدى بالردود و المواضيع ؟..

فكرت و فكرت ... قلت أجلس بالبيت عند المنتدى أحسن من بيت خالتي .. بس وشلون أخلي أمي توافق .؟

أممممممممم ، لقيت الحل
قلت لأمي أنا أبجلس عند أخوي عشان اصلح له شاهي و أصير حوله <<< يقالي أكبر همي أخوي
أمي فرحت و قالت خلاص الله يعافيك يا حمامة بريدة و الله انك طيبه ... و تقول لأختي الثانيه شوفي أختك اللي موب أنتي ...

و ألبس أخواني الصغار ثيابهم و أحتري أهلي يطلعون عشان أدخل المنتدى و لا يصير عندي لجة بزران ..
يوم صك أخوي الصغير الباب و سمعت صوت السيارة مشت على طول رحت للكمبيوتر فوق
و أدخل المنتدى ... و ليتني ما دخلت ....

نطت بوجهي هالصورة :
http://www.buraydahcity.net/close.gif

:eek:
:(
:i121

<< معناها : أندهشت ثمن ضاق صدري ثمن حمقت :D


يا ربيه و الساعة اللي تحت توه تقول باقي 19 ساعة و يفتح المنتدى << يالله غربله
جان إحبااااااااااااااااااط
لا أنا اللي دخلت المنتدى و لا أنا اللي رحت لخالتي مع أهلي

وش السوات ... وش السوات بصراحة بلشت و قلت ليتي رايحه مع أمي لخالتي اصرف لي
بس ما أقدر أدق على أمي أقول تراي هونت أبروح معكم لأني قايله له أني بجلس عند أخوي
ما قلت له بجلس عند المنتدى ...

و أروح و أقضي يومي بالمطبخ مدري وش أصلح من الفراغ جلست أعد البيالات و الفناجيل ......

بس اليوم يوم دخلت و أنا متحمسه بالمرة بشوف وشو هالتطوير اللي قهرن أمس
يا سلاااام بصراحة يوم شفت شكل المنتدى الجديد طرت من الفرحة ..

أأأأأأألف مبروك هالتطوير و الحركات بالمنتدى صار المنتدى كشخه
لو أنا داريه أنه يبي يصير كذا كان اشتريت فستان زي لونه

عاد في هالمناسبة نبارك للجميع الشكل الجديد للمنتدى
و من حيني أموووت في هالقسم وش عاد يوم سوو له تجديدات و حركات
يا سلاااااام يا بريدة ستي


مبروك علينا جميعا هالحركات
و ألف شكر لإدارة المنتدى
و هذا أول خيرات مشرفتنا الجديدة : بنت الشماسية


يالله عاد علمونا عنكن أنتن بعد يا بنات وش صار معكن يوم شفتن المنتدى
مغلق .؟؟

[شهد العسل]

وعليكم السلام ورحمة الله وبركاته

ياهلا بقوقسيتنا من طول الغيبات جاب الغنايم
وش دعوى القطاعه
أمس الله يسلمتس دخلت العصر ولا جلست كثير على طول طلعت
لأن علي إختبار نحو
ورحت أنوم إلى المغرب وأول ماقمت على طول للنت بسوي توديع له عشان أبد بمعركة مع النحو
وتطلع لي ذي الصفحة وضاق صدري وأستانست بنفس الوقت
وفرحت شوي قلت شكلهم دارين ان علي إختبار
لاكن يوم شفت كم باقي من ساعه بغى يغمى علي
وأستلم الجوال تباشير أنهم بيغيرونه وأعطيهم خبر موش حلو لأنهم سكروه اليوم

يوم خلصت وتروح حضرتي وتستلم المطبخ وكل شوي أعد كم باقي ويفتحونه
هع
المهم رحت عاد بذاكر وأدور كتاب النحو ولا لقيته وأتصل على صديقتي وأقوله
قالت ياسلام كتابك معي ياالدافورة
عاد أنا أستانست على طول طن براسي الغياب وغبت

وأخيرا ما أستفدت من المنتدى ولا من المذاكرة

هع هع

الله يبارك فيك
وجزا الله الإدارة خيرالجزاء
تطوير جميل جدا ماشاء الله

:)

[تغاريد نجد]

النت ماله داعي بدون بريدة ستي

[الغريبه]

هلا والله بحمامه
انا دخلت قبل مايسكرونه وطلعت علا طول بس بعد صلاه الاخير رتبت الجوعشان ادخل
يوم دخلت اهئ اهئ مسكر والقط وجهي من الكسحه
واسحب رجليني للسرير علا طول وانام من الكسل ولا اقوم الا وهو يأذن الفجر اول مره اقوم صاحيه
بس ماشاء الله المنتدى بعد التطوير صاير يهبل

[سكره]

اقول ياحمامه ساده هاذي الي ما تسمع كلام امه
اما انا انقهرت خصوصا اني توي طافه باالمنتدى0

[أشيقرية]

ماهو بالشيء العجيب ان يغلق منتدى ...


انا واعوذ بالله من كلمة انا ... يوم قريتها استانست لانهم بيطورونه ...


ولاضاق صدري ولا شي ...


هم بيسعدونا عشان كذا اغلقووه ...


ليش اضيق صدري ... :rolleyes:


جزاهم الله خير الجزاء على هذا التطوير ...


أشيقرية ...

[ح ـايلـــيـة]

وعليكم السلام ورحمه الله وبركاته..

هلا والله بقوقسيتنا على قولة شهد:D
وش هالصوره..:eek:
اشوني ما شفته وهو مصكر..
كان يجين تشنج برموشي<<خكريه :p

المهم..
انا كان علي اختبارات..
واليوم اللي صكر به المنتدى كان (اوف)..يعني مافيه اختبار..

امر يخرب المودم ..
قلت وش هالحظ..
مادريت ان ربي يحبن وما خلان اشوف الصوره وانصدم..

المهم قلت الهى بشيء مادامي فاضيه ..
ورحت اتقهوى مادريت الا جوالي يرن من اشيقريه تقول ادخلي بريده فيه مفاجأه لتس.!
قلت هو وشو؟وش مفاجأته..؟؟
قالت اغلقوه..
انصدمت..
قالت بس 24 ساعه
قلت اشوا ...
عاد بعد 24 ساعه زان المودم ..ودخلت وشفت تطوير رائع...<<موقته:p

الله يجزا الاداره عنا كل خير على جهودهم..

تشكراااااااات حمامه على هيك موضوع ..

تحياتي..
:)
حايليه وكرم طائيه

[حمامة بريدة]

أهلاااااااااا بالجميع


شهد العسل

الله يسلمك لا و الله مو قطاعة بالي دايم معكن
بس تحصل بعض الظروف تخلين مقدرش أدش المنتدى :) ..

ماشاء الله اشوفس كتبتي قصة حياتس :i128
طيب وشلون اختبار النحو .؟

يالله بشوف انتي مذاكرة كويس و إلا لا ..
أعربي الجملة التالية :

شهد العسل تغرد فوق الشجرة و حمامة بريدة في الشجرة اللي جنبها

:D



تغاريد نجد

اي و الله انك صادقه
النت ماله طعم بدون بريدة ستي


الغريبة

اجل المنتدى صار يهبل
بسم الله علينا من الهبال ما علينا نقص هبال


سكره
اي و الله انك صادقه بس الشكوى لله
كله عشان اجي للمنتدى
:o


أشيقرية وأفتخر

يا حليلس شكلك لابسه نظارات
مدري ليه احس كذا
قول لي صح و إلا لا ؟


حايليه

:(
ليش تكسفين بنا ...
كبري الخط شوي عشان نقدر نقرأ
تهئ تهئ