-*-*-*-(( كيف تحب أن تكون عزبت البر [ نقاش و سواليف ] ))-*-*-*-

[المستشار]

بسم الله الرحمن الرحيم ..


السلام عليكم ورحمة الله وبركاته ..
حيا الله الشباب ،،
شدو حيلكم و ولموا العزب ..
ترى وقت الكشتات قرب ،، أبد عقب الحج تشوف الكشتات ..
على أشده ،،



ما علينا ،،



أنا أشوف عند الشباب أنواع كثيرة من العزب حقات البر ..
يعني بدون ما بالغة ما تكاد تشوف عزبتين زي بعض ..
فيه من الناس من يحب عزبة الشاهي و القهوة بلحااااال ..
و الطبخ بلحاااااااال ..
و فيه من الناس من يحطهن جميع ..


و بعضهم يحط الشنطه كبيرة تقل تابوت ..
وتعال أدخل لأنواع الشنط ..

بعضهم يختار اللي لون خضراء زيتي
و بعضهم تنزاني ..

وبعضهم يحط الشنطه من الداخل بلاستيك و الخارج قماش
و بعضهم يحطه شبك حديد .. و بعضهم يختار الشكل الجديد الي تجي قماش مقوى ..
بدون شي ،، من الداخل


و لا تنسى إختلاف المقاسات ..


ولا أنسى الطبخ وش يصير عليه هل على دافور ..
أو على عيون ( قز ) أو على الضو ..
و الدافور هل هو بوسط العزبة أو خارجها و لماذا و أين و متى و كيف و لكن ّ ..
و الطبخ هل هو على الكاتم أو على قدر ..
و البرقان هل هي عدن و لا النوع الغرش و لا الصفر ؟
و الدلال وش أحسن نوع ..

و هل نحط الملقاط بالعزبه و لا ما يلزم ملقاط بالبر ؟



أسأله كثيره صح ..



يعني باختصار أبي كل واحد يحط مكونات عزبته ..


شيكرن ..
بـ يراع المستشار ..

[أبو محمد النجدي]

... أما الآن ماهناش عزبة عقب سرقة عزبتي الشتاء الماضي والسبب إني حطيت العزبة بالصندوق حق الهلي ...
في القريب العاجل نضبط لنا وحده

لكن ماعلمتنا وشي عزبتك يالبي ؟؟

[الذهبي]

والله العزبة اللي تجي جميع الطبخ والقهوة ,,,

هذي هي العزبة ,,

[إكلــــيل]

اففففت لو معي هلّي ..

المشكلة سيارتي صغيره ولا تدخل البر ولا كان فصلت عزبه يحبه قلبكـ ,,

ولكن بالنسبه للرغبه ..

فـ أرغب العزبه حقة الشاهي والقهوه لحال وحقت الطبخ( عشاء ، غداء ، فطور ) لحال ..

اما الطبخ يكون على قز عينين من النوع المزبوط .. والبرميل الغاز الأزرق الوسط ..
ويكون الغاز خارج العزبه ..

بالنسبه للبرقان وانواعه فلا أدري .. كذلكـ الدلال ..

والملقاط احس انه مهم بالبر .. لو بغيت تطبخ على الضو الاكـ تواسيلكـ مكان بالملقاط .. ولا تنسى الكرسي السنع ..

والطبخ على الكاتم اذا كنت مستعجل .. وعلى التسدر لاصرت رااايق .. (راعي طويله ) ..

أما نوع العزبة ..

اعتقد الشبك مهم ولا تنسى تــتسثر المخابي حقاته ..

ابوفهد ،،

[في البداية]

مكونات عزبتي بارك الله فيك
انامثل أخوي ...إكليــل مشكلتي سيارتي صغيرة ولامعي إلا عزبة شاهي وقهوة

أما من وجهة نظري فمكونات العزبه على رغبة الشخص, وعلى متطلباته(يعني مابه شي ناقص)
وحبذا لوصارت وذفه وماهنا حليله.......

[المستشار]

أبو محمد النجدي ، الذهبي ، إكليل ، في البداية /
=======================
أشكر لكم هالتفاعل ،،



و بالنسبة لي فأنا أفضل أن تكون العزبه صغيرة قدر المستطاع
حتى يسهل حملها ،، أذكر أنا كان عندي عزبه كبيرة بدون ، شبك الي تجل قماش مقوى ..
كنت ما أشيله إلا إذا غلبت الروم لأن به سلبيتين في وجهة نظري ..


السلبية الأولى انه كبيرة و السلبية الثانية أنه بدون شبك ولاشي بس ،، قماش ،،
و طبعا أنتم تعرفون أن الشنطة الي بدون قماش ، عيبه أنه مع الوقت تترها و تصير رخوه ،،


فالأفضل عندي الشنطة أم شبك الصغيرة و أهم شي أنك تصغر العلب البرقان الي بوسطه على
شان تكون وذفه و لا تتعيجز بنقلها هنا أو هناك ،، و لا أنسى أنا أفضل أنها تكون عزبة طبخ
و شاهي و قهوة كلش جميع ..

[الفارس الملثم]

وعليكم السلام ورحمة الله وبركاته ..
الغالي أبو محمد ..

أما بالنسبة لي وما أفضل ..

إن كان فيه إمكانية تحط عزبة الشاهي والقهوة والطبخ جميع فأفضل ..

لكن إن تعسر الأمر .. فتفصل عن بعضهما ..

فتحط حقت الشاهي شنطة صغية زي حقت الأطفال الرضع .. رهيبة ووذفة ..

وحقت الطبخ اللي بدون شبك .. حيث أنه ما تأخذ حيز .. وتقدر تلفزه بأي مكان ..

وتكون أكبر من حقت الشاهي والقهوة .. تحط به الكاتم والدافور والعين ..

ولا تأخذ مكان كبير .. تقدر تلفزه بأي مكان ..


شكرا لاتصالك بمركز الجوال .. <=== هابلينه الشركة ..


مشكوووووور خلفهم ..

[الوسيــــــم]

شكراً ليراعاكم الكريم ..
عزبتنا على النحو التالي :
اللون :
أخضر زيتي , القماش مقوى ..
تخلصنا عن العزبة القديمة ذات البلاستيك وذلك لمساحتها الشاسعة ..
الطبخ على دافور ..
والدافور له شنطة خاصة منفصلة عن العزبة لونه اخضر زيتي تماماً نفس العزبة ..
( مطقمين :) )
اخذناهـ من السنيدي ..

وطبعاً الطبخ على كاتم ..


والقهوة والشاهي ..
بالقز الأزرق القديييم .. مطنا الدنيا موط ندوره .. والحمد لله حصلناه ببريدهـ ..
والدلة بغدادية .. يحبه قلبكـ ..

وماله داعي الملقاط .. للخكاري بس ..

ومن مكونات العزبة :
بلاستيك قابل للصفط لغسل البيالات والفناجيل .. من إنتاج السنيدي ..
وشنطة واحدة للبيالات والفناجيل .. ( الفناجيل بالوسط , والبيالات على الجوانب ) ..

وياربي براد الدنيا والجنة ..
استغفروا ياجماعة ..
علّ الله أن يرحمنا برحمته ويغيثنا وينفع به البلاااااد والعبااااااد ..

ربي استغفرك واتوب إليك ..

شكراً ..

[النجاح]

قدوم سعادة الأستاذ /عبدالله بن صالح العيَّاف المدير التنفيذي لمركز الإحسان الخيري والمشرف بالإدارة العامة للتعليم بعد إنهاء دورته المقامة بالرياض فنقول له الحمدلله على سلامتكم ونفع الله بكم الإسلام والمسلمين ....:i125 :i125

[الــنــهــيــم]

منهو عبد الله العياف ؟ هههههههههه

[المستشار]

قناص الروس // الوسيم //
أشكركما على التفاعل و أبا رك لكما و لجميع الشباب ..
على هالسيل الذي رزقنا الله به قبيل فجر يوم السبت 22/1/1426هـ ..
و أسأل الله أن يطرح به بركه و أن يجعله نافعا للبلاد و العباد ..


و أشكركم على التفصل بأنواااااااااع العزب ،،
و لا زلت انتظر بقية الشباب ..

[المستشار]

انتماء // النهيم ..

=========
الحمد لله و الشكر يالله لك الحمد ..
الرجال شكله صادمن جداااااااااااااااااار ..
وش دخل عبد الله العياف ،، شكله ،، أول حياته ذرايه ..
هههههههههههههههههههههههههههههههه

[إكلــــيل]

منهو عبد الله العياف ؟ هههههههههه


ابو صالح ياحبي له ماتعرفه ..

لا شفته بس على طول

تحبه .. << مب تجغفه يعني يأتيك الشعور << أقوول تلايص .. سم طال عمرك

بس مادري وش جاب طاريه ..

وعلى فكره الحمدلله على السلامة ..

المستشار ..

عز الله راح دهنه موضوعكـ ،،

:)




..


..



..



من خلف الكواليس :)

ابوفهد

[(<*أبولجين*>)]

ماشاء الله

موضوع ممتاز وجيد :eek: <<< أموت ع التقييم :D


أما عن عزبتي الله يحفظكم

1- الحجم كبير ...

2- قماش نوع غريب شوي يشبه البلاستك وهو زين مره ضد الماء والوسخ ...

3- كل من قال أنا يا طبخ فيه ....

يعني عدة الطبخ كاااااااااامله مع خرابيط ثانيه ( صاج حمسة الكبده والمقلقل وووو :rolleyes: ) ..

وأيضا كل من قال أنا يا شاهي فيه ...

يعني شاهي ( نوعين ) عدني وعادي

والحليب والقهوة ...

طبعا في داخل العزبة قدرين ( قدر ظغط من نوع ( seb ) والثاني قدر عادي نسيت وش أسمه) ...

وأيضاً يوجد فيها صحنين رز ( أرضي ) وصحن واحد مرتفع ( مثل حق المطاعم ) بس عيب الثاني يبرد أسرع ولكن يبقى إرتفاعه عن الأرض له فوائد كثيرة ...

هذا بشكل عام ...



.
.
.



وأنا كان بودي إني أفرق بين الطبخ والشاهي ...

بس للحين ما قدرت .. لأني ما أحب أجيب العزبة إلا إذا صار فيها جلسة وونااااااسه

خاصة مع جلسة شباب الطيبين ( شرواكم ) :cool:


وأما عن النار ...

فأنا ما عندي دافور ...

لأني ما أحبه مرررره

ما يطول وينتهي

علشان كذا ... :re

( يقولون إذا كلت بصل فكثر ) :i125

أنقل معي دبة الغاز حق البيت دايم :p

عاد تخيل عزبة كبيرة ودبة غاز عز الله تقطقت السيارة ... :eek5





محبكم في الله

فادي

[المستشار]

أبو لجين ،،
ألف شكر على المشاركة الحلوه ، يا بعدي ،،
و الله شوقتنا ، للعزبه حقك يا فادي ،، هههههههههههههه


طيب ممكن الله لا يهينك نشوف صور بسيطه ،،
للعزبه ؟ و لا عليك أمر ؟


و ياليت أي واحد من الشباب عنده عزبه يطق له كم من صورة ,,
و يلحطه بذيا ،، وشيكرن ..

[شيخ بريدة]

88
88
88

طيب اللي ماعنده جوال كمره وش يسوي؟؟؟ ولا عنده التقنيه الحديثه يعني أسلاك وخرابيط.

اجل الوسيم طير بر ياحبي لوه يقول الملقاط للخكاااري ياحليلك ياابو وسم...اغدين اشوفك نوبتن من النوبات وأرضّك رضّ لما تكسر عظامك وتعرف شلون تدّعي قدامنا.....

الوسيم ياحبي لك اسمح لي اقوله لك على بلاطه :" اترك الإدعاااا الله يحفظك تراي ملاحظن عليك ان بك شوفة نفس ودعدعة زايدة عن اللزوم ".

وبس ومشكورين............

اخوكم: محب النقد.

[المستشار]

الوسيم ياحبي لك اسمح لي اقوله لك على بلاطه :" اترك الإدعاااا الله يحفظك تراي ملاحظن عليك ان بك شوفة نفس ودعدعة زايدة عن اللزوم ".

و جنبني النصيحة في الجماعة ..
فإن هذا نوع ٌ من التوبيخ لا أرضى سماعة ..

شيكرن ..

[إكلــــيل]

ابو محمد لقيت صورة مع احد الشباب ..


فأخذته وشرحت عليه .. وشن اللي بالصوره ..

بس عاد ترى به اللي بالوسط ماعرفه لا تشرهون مادري وشو ..

يمكنه عزبة شاهي .. ولا زي اللي قلت انا بالصورة ..

بس صغير ماظنه عزبة شاهي ،،

عموماً ..







إليكم الصورة في المرفقات ..

ملينا من مراكز التحميل .. عطاهم الصلاح ..





ابوفهد ،،

..

[الوسيــــــم]

شيخ بريدة ..

.

خذ راحتك ..
واشكرك على نصيحتك ..

.

وهذا طبعي ..
ثقتي بنفسي عالية جداً ..
:cool:
.

ولذلك الناس يحسبونها غرور وإدعاء ..
وإلا ماهي إلا ثقة بالنفس الحبيبة ..


:)


.

والشكر موصول للأستاذ المستشار ..
حفظه الله ..

[الفارس الملثم]

أكليل يا خلفهم .. المسدوحة ذي عزبة الشاهي والقهوة ..

إنتظروني الليلة إن شاء الله ..

سأطرح صور لعزب مختلفة ..

[الفارس الملثم]

السلام عليكم ..

بعض الصور لبعض العزب ..

الأولى : :: عزبة الشاهي .. مفصلة بـ 45 ريال ..
من الخارج ..

http://www.buraydahcity.net/vb/attachment.php?attachmentid=7433&stc=1


من الداخل ..

http://www.buraydahcity.net/vb/attachment.php?attachmentid=7434&stc=1




الثانية :: عزبة الطبخ أم شبك أو بلاستيك ..

من الخارج ..

http://www.buraydahcity.net/vb/attachment.php?attachmentid=7435&stc=1


من الداخل ..

http://www.buraydahcity.net/vb/attachment.php?attachmentid=7436&stc=1



طبعا من الواضح كبر حجم أم شبك أو بلاستيك .. وأنه تأخذ حيز كبير ..
ولا يمكن تلفزه منا ومنا ..


وترقبوا إن شاء الله .. صورة لعزبة الطبخ ( بدون شبك ) ..

حفظكم إلهي .. :)

[إكلــــيل]

ماشاء الله ,,

جزاك الله خير ابو الوليد ..

الا عزبة الشاهي والقهوه ونهوبه مفصله تكفى .. ؟

[المستشار]

حلو عليك يا قناص الروس ..
لكن عزبة الطبخ وراه تسذا فاااااااااضيه مابه شي ..

نبي عزبه مصفوفه صف ..

[الفارس الملثم]

الغالي أبو فهد ..

مفصلة عند محل فهد اللي بأسوااااااق الغد ..


الغالي أبو محمد ..

حق الدعدعة بس يا ألبي ..