لا تفكر بعرق الطرفية بعد اليوم

[saleh1]

طلعت أنا وأعيالي نبي نفرح نغير جو عقب نزول هالامطار وهالخيرات لكن صراحة تمنيت أني في بيتي جالس وملعنن ابو خامسي ولا طلعت تنقهر إذا شفت شىء يمسك ولا تقدر تسوي حاجة له وهذا الشىء يمسنا كلنا اللي هو احتكار الاماكن في عرق الطرفية من قبل اصحاب المخيمات يحمي له مساحة بحدون عشرة الاف الى عشرين الف متر ويضرب بها الخيام أمهات ويالله الي يبي يكشت يجي يستأجر مني قريب للخط وقريب لتأجير الدبابات وقريب للخدمات وإذا ما تبي رح اكشت بعيد لحالك و لوحدك بعدين صدقني والله تمنيت إنها الارض ليتها مملوكة لأحد غير البلدية على الاقل يقدر يتحكم وياحفظ عليها أو ليتها لسمو الامير متعب من ضمن حماه أنا واثق مئة بالمئة انهم ما راح يطبون ذيك المنطقة ولا يحلمون بها وقولو آمين والله لا يوفق من راح يطالب فيها منتزة ما دام ما يجيي منه الا المغثة إذا لم يوضع حد لهذا الموضوع بعدن وين اللي انتخبنا بالمجالس البلدية عهودهم ووعودهم بما يخدم مصلحة المواطنين وليس مصلحة مواطن على حساب مواطنين أخرين !!! حاسوا المنطقة كلها لكن الشكوى لله ما أدري من الامر متعلق فيه هي وزارة السياحة والآثار والا هيئة حماية البيئة والثرة الحيوانية عندنا والا نوصل الامر لهيئة حقوق الانسان وجمعية السلام الاخصر يمكن ينفعون !!!! لأن الامارة والبلدية أكبر من أن تضع حد لهذا الامر .وإذا أستمر الوضع على ما هو عليه وهذا ما أنا متأكد منه فلا يلوم عريق الطرفية الا نفسه لأني صراحة رايح ادعي عليه بالعجاج والجفاف والغبار والبرد والحر ويمكن يصل الأمر أن ادعي عليه بالزلزال إذا تطور الامر .

[المستشار]

لأني صراحة رايح ادعي عليه بالعجاج والجفاف والغبار والبرد والحر ويمكن يصل الأمر أن ادعي عليه بالزلزال إذا تطور الامر .


تهديد قوي :)

يا بعدي يا صالح ..
الدنيا مليانه برّان ..
و إذا و دك تطلع بعيالك ..
إطلع به للركية و الصريف و ما جاورها ..
أو نفود الخضر اللي وراى الوجيعان ..
أو الجهة الغربيه ..

او الهديّة ..
الدنيا كله ( كثبان رملية ) ..
الطرفية بالنسبة لي ما أطلع و لا أكب به الزبالة ..
مع الأحترام لأهلها .. لكن عروق الطرفيه الأرض من كثر ما تاطاه المواتر
صارت ريغا .. و لا ينبت به الربيع .. لأن السيارات تعفله عفل ..



و سع صدرك يستاسع .. <== حكمة مستشاريه

[الــنــهــيــم]

اذا كنت تبي كوع ينسف لك المخيمات ..

ارسلي رسالة خاصة ..

ولك سعر خاص ..

خخخخخخخخخخخخخخخخخخخخ


<--- عضو خلية ارهابيه هههههههههه

[الوسيــــــم]

الطرفية ياصالح للخكر .. وراعين السيارات الصغيرة _ مع إحترامي لهم :) ..



يا أخي الركية .. من أفضل مايكون ..

والكثبان الرملية ماليةٍ الأرض ..
مهب مثل الرياض اللهم لاشماته ..


:)

[saleh1]

استاذي وعزيزي / المستشار

حبيبي صحيح كلامك الدنيا مليانه بران ولا عليه غبار لكن تقول الركية والصريف كلها حبوس وعقوم ونفود الخضر اللي وراء الوجيعان حبيبي هذيك الاماكن كلها استراحات والجهة الغربية كان هناك في الزمان الماضي مكاشيت ايام حسو بن سويد والمليدا وأم خيس واللسيب وامهات الذيابة و.. الخ أما الان اصبحت مزارع واما من ناحية الهدية ما تنطب ذيك المنطقة اولا من زيادة النظافة ثانيا من قلة الذبان هناك . صراحة أو مرة اشوف ذباب يعض ؟

اليتيمة ، العائلة ، خشم علي ، الحصاة ، الوادي ، الزهرة ، ابلق ، العصفوريات ، الدغمنيات ، القويطير ، الوطاة ، حسو ابن سويد ، المليدا ، أمهات الذيابة ، المندسة ، أم خيس ، لغف أحمد ، المحابل ، المضباعة ، البشمة ، الراشديات ، المتينيات ، عين حمزة ، عين سعود ، عين عبدالله الفيصل ، عين شقران ، عين عطيشان ، عين هوطان ، عين ابن عيسى ، عين الربعي ، أقصد الاماكن التى قرب هذه العيون وأماكن كثيرة لا تحضرني الآن . سبب خرابها ودمارها مرتاديها بسبب عدم المحافظة عليها لاننا صراحة حنا ما نطب محل الا ندمره ونحوسه طبع بنا اكتسبناه من قل التربية بالبيوت قبل المدرسة !! صراحة لا تزعل الصراحة ما تزعل. اضرب لك مثال على عدم وعينا بيئيا وصحيا : الآن بيتنا نظيف بالمرة ونحافظ عليه بالترتيب والنظافة وبيت جارنا كذلك وجار جارنا هم كذلك يعنى كل الشارع بيوتهم نظيفة لكن الشارع التى فيها البيوت وسخ !! والحارة تتكون من شوارع وبيوت والحارة كلها وسخة !! المدينة تتكون من حارات والحارات وسخة !!! إذا من المسئول عن هذه الوساخات ؟!! طبعا تبي تقول أنها أمريكا وألا إسرائيل صح كلامك نعم هم جابوا زبايلهم وكبوها بطائرات بالليل وحنا نايمين الله لا يعطيهم عافية ، معليش كثر كلامي الى كذا ويكفي لا نفجر راسك بالكلام اللى مارايح يجيب نتيجة .

ليت الكوع يجيب نتيجة كان بحثت عن كوع 16 بوصة حق ماسورة كيسي .

[مدحت شوقي بريده]

ا
مهب مثل الرياض اللهم لاشماته ..


:)

وش به الرياض يابو عبدالله ..

كله مكاااااااااااشيت يالله من فضلك ..

وخاصه ( القمامه ) عفوا الثمامه ..
اللي اذا حفرت حفره يطلع لك حفاظه وانت بكراااااامه .. والا سماااااط فيه بقايا عشاء ..
طبعاً بقايا العشاء تدري وش هي .. اما كراتين هامبورقر والا بروستد والا كنتاكي ..


لاتسب الريااااااااااااااااااااااااااااض يابو عبدالله ..
مثل ماحنا بالرياض نحترم بريده ..
فيجب عليكم انتم في بريده تحترمون الرياض ..
والا وش خانة الدخول في منظمة التجاره العالميه ..

[بـــارق]

يارجال لاتدقق
ولازم إذاطبيت هالأماكن
هاذي انك تغمض عين وتسكر عين(وش بقي نشوف به)
لكن هالأماكن لاتهمك واذكر
كلمه قاله لي الوالد
الله يحفضه :المكان اللي به قوطي صلصه لايهمك والصلصه ماتجي إلامن برابيس الحريم والحريم يبن يحيبن عيالهن
اكيد وعيالهن يبون يجيبون
وصخهم وبلاويهم.....

إلاغمض كل عيونك لكن انتبه
لاتاطاشي تبلش بقشعه
من رجلك

[مدحت شوقي بريده]

يع .. يع .. يع ..

الله يرجك يابااااااااااااااارق ..
اتخيل وهو واقف عند حصااااااة ويسحب رجله على الحصااااااااااااااااة ..
والا عند شجرة يقطع منه ويمسح اللي برجله ..

همن اذا وصل عند اخوياااااه .. ماتشوف رجله من الذباااااااااااان ..

[ممدوح الشدادي]

للتنبيه :

عرق الطرفية اللي فيه نفذ التحدي مخصص للشباب فقط ... والعوائل يجب أن تبعد عن الشباب لأن من حق الشباب توسيع صدورهم أفضل من الدوران داخل المدينة فياليت مثل هالكلام مايقال ...

( أما بالنسبه لأماكن العوائل فهي قبل مكان تطعيس الشباب على اليسار ... ويجب أن يكون المكان مستتر عن أعين الخلق لأنهم عوائل ... لأنه إذا صار شيء حطوه بروس الشباب)

ولكم جزيل الشكر .

[الوسيــــــم]

ابو ابراهيم .. سم وآمر ..


:)


من حقنا نحترم سكان الرياض .. ونتشرف بمعرفتهم ..

مع إحترامي للرياض .. كـ مدينة .. مكشاتية ..

:p

[المتفاني]

: 12 السلام عليكم

(((وإذا أستمر الوضع على ما هو عليه وهذا ما أنا متأكد منه فلا يلوم عريق الطرفية الا نفسه لأني صراحة رايح ادعي عليه بالعجاج والجفاف والغبار والبرد والحر ويمكن يصل الأمر أن ادعي عليه بالزلزال إذا تطور الامر.)))

ما نالومك بس الله يجزاك خير لاتدعي عليهم ، أنا مثلك رحت كم مرة وطفشت منهم تصدق إني بغيت أصدر فتوى بتحريم عرق الطرفية (( الناس طافين ها الأيام بفتاوي الأسهم))

رح بعيد مثل صعافيق ولا الجراد بارك ولا نفود الشماسية ولا المستوي ولا قبه ومثلك عارف ما يحتاج أعدد أبعد عنهم هم وصجتهم ولجتهم ودباباتهم ومخيماتهم .
وعلى فكره كل المكاشت وسخه لكن رح بالليل لمنه أضلمت العين تراها تزين لأنك ما تشوف شئ تكرهه بالليل ،:s :s هذي حكمتي الي أتبعها قبل أختار محل للكشته. وشكراً

[المتفاني]

للتنبيه :

عرق الطرفية اللي فيه نفذ التحدي مخصص للشباب فقط ... والعوائل يجب أن تبعد عن الشباب لأن من حق الشباب توسيع صدورهم أفضل من الدوران داخل المدينة فياليت مثل هالكلام مايقال ...

( أما بالنسبه لأماكن العوائل فهي قبل مكان تطعيس الشباب على اليسار ... ويجب أن يكون المكان مستتر عن أعين الخلق لأنهم عوائل ... لأنه إذا صار شيء حطوه بروس الشباب)

ولكم جزيل الشكر .

بس الي نشوفه إن الحابل مختلط بالنابل والدعوى كلها حوسه بالله عليكم يسمى هذا منتزه ، يذكرني(( بالشفاء بالطائف كله دبابات وحمير وخيول وناس مطولة على الأغاني ولا تراعي أحد وشحاذين)) وعلى ها الوزن كما يقولون شلق .

[مزعل الضبان]

لمشاركة الأصلية بواسطة * أبوفياض *
للتنبيه :

عرق الطرفية اللي فيه نفذ التحدي مخصص للشباب فقط ... والعوائل يجب أن تبعد عن الشباب لأن من حق الشباب توسيع صدورهم أفضل من الدوران داخل المدينة فياليت مثل هالكلام مايقال ...

( أما بالنسبه لأماكن العوائل فهي قبل مكان تطعيس الشباب على اليسار ... ويجب أن يكون المكان مستتر عن أعين الخلق لأنهم عوائل ... لأنه إذا صار شيء حطوه بروس الشباب)

وانت ياصالح

الامطوله بايدك طلوه برجلك

[أبونادر]

الصراحة بعض العوايل تقل مابه بر غير الطرفيه

[الوسيــــــم]

أبو نادر :
صحيح كلامك ..
بعض العوائل .. تريد الاختلاط .. واللجة والصجة ..
وكما قيل : عش رجب ترى عجب ..

!!!!

[الفارس الملثم]

السلام عليكم ..

أوافقك أخي الحبيب على أغلب ما قلت ..

وأنت رايح مع الطريق حق الطرفية .. وإذا بدأت المخيمات تظهر ..
أمش شوي ورح شماااااااال .. أعوذ بالله ..
تقل بشوارع العجيبة من الضيق .. ما تلقا لك مطلاع ..

غريب والله هالشيء .. أقل شيء أن يحدد لكل صاحب مخيم طول معين لا يزيد ولا ينقص ..

إذا أردت الربيع والونااااااااسة .. وأنا شفت الربيع بعيني الأربعاء الماضي .. 26/11

جنوب عسيلان .. تسنك رايح لم الحصاااااانة .. الحق أني استغربت جدا من الربيع ..
مااااشاء الله .. مناظر روعة . .. لعلي إن سمح الوقت أجيب صور إن شاء الله ..

وأما الطرفية فأصبحت قحطا .. ولا أزيد على كلام أخي أبو محمد المستشار شيئا ..

به الركية .. مكشات خيال .. تستطسع السيارات الصغيرة الدخول ..
إذا خليت نفود التطعيس بيسارك وأنت رايح جنوب .. سهل الدخول للركية من تلك المنطقة ..
وأيضا به الحطب وجذوع الأرطى اللي يحبه قلبك ..

اللهم اكتب ما فيه خيرا .

والسلام عليكم .

[أبوجبل]

أخوي شكلك من العام وأنت تجمع وجيت وأنفجرت بذا ... الله يكون بعونك !!


معروووف إن الطرفية مكان شباب ....

رح عنه منا وإلا منا تلقى وين تحط عائلتك به ...
تحياتي لك ....

[المتحرك]

عندك الروضة والركيه الصراحه شي ..!

[أبوراشد]

عساك ماتكشت الا بسطح بيتكم

خل العالم يترزقون الله


الله لايضيق علينا

ليت كلامك هلى حبس مشعل اللي مساحته اكبر من بريده

ولا به إلا بدويين ودلتهم



,,,,

[الفارس الملثم]

إخوتي مع احترامي الشديد لكم ..
إلا أن أخالفكم في ما تقولون ..

الطرفية منتزه القصيم الوطني ..
ون حقي أنا وأولادي أن نتنزه ونستمتع ..

وليست محصورة فقط على الشباب ..

حفظكم الله ..

[مــازن]

كلامك صح .. ولا تشرح .. ولا تجمع ولا تطرح ..

.....................