وش رايكم بقضاء فتره النفااس قي بيت الزوج

[ام الكتكوت]

السلااااام عليكم


حبيت اطرررح موضووع واشوف رايكم فيه :rolleyes:

صاار من المتعااارف عليه ومن العادات الي مو راضيه تنقررض عندنا وخاااصه هنا في بريده ان الوحده لازم تولد في بيت اهلها وتقضي الاربعين كلها او جزء منها عندهم :confused:

وماتبدا تولد في بيتها الا بعد 4 او 5 اطفاال وفيه بعضهم تجيب الثامن والعاشر عند اهلها :confused:

السؤاااال الي يطرح نفسه ليييييييييش ماتكون الولاده من الطفل الاول او الثاااني عند الزوج ؟؟؟

وليش دائما الي تبغى تولد في بيتها نظرات المجتمع ماترحمها ولازم تقدم الاف المبررات للناااس وخاصه (الحموله ) عشان يقتنعوون بسالفه نفاسها ببيتها

وليش الرجال مو قادرين يتحملوون غثاااء حريمهم فترره النفااس واسهل شيء يسويه انه يرميها عند اهلها وهم يبلشوون فيها

انا هالموضوع شاغلني لاني مفكره اقضي نفاسي في بيتي وخااايفه من كلام الناس للعلم هذا الطفل الثاني

(f)(f)(f) هذي لأول وحده تررد:)

[المهرة]

شكرا على الورد ياوردة:p

بالنسبه لي لااؤيد اطلاقا ان النفاس يكون ببيت الزوج لإنك تحتاجين الى عناية خاصة مايقدر زوجك يوفرها لك الا اذا كان (مصري) ;)

وكمان المرأه في النفاس تبي سعة صدر ووناسه وزوجك بيقضي نصف وقته برا البيت :oo

وكمان لاتنسي ان العنايه بالمولود راح تصير زود عبء عليك:i125

واخر سبب غيري جو وخليه يشتاق لك وانتي تشتاقين لبيتك ...:rolleyes:

[**((الحنونه))**]

أنا من أكبر المؤيدات لقضاء النفاس من الطفل الاول في ببيت الزوج ..
بعدين مافيه عيب ان الوحده تقضي نفاسه في بيته وتترك العادة القديمه
الآن صار النفاس أشد من ليلة الزفاف بالخسائر وأنفاق الاموال الطائله التي ما أنزل الله بها من سلطان
وهذه بعض الخسائر التي على عاتق الزوج المسكين
أستئجار خادمه بــ2500 ريال
جوال من 1500إلى 2500 ريال
مفرش من 500فمافوق
سلااااااال حلى 500فمافوق
وبعض العوائل زوج البنت لازم يدخل معيشتهم ,, من رز , ولحم ووووولو نبتل نعد تقل ميتين من الجوع قبل تالد بنتهم
بعدين طلعة الروح الطلاعه خخخخ مايدفع أقل من 3000 ألف ريال
تراي ماعديت كل شيء كان تنفجرروسكن الله يستر

الله يكون بعون الشباب اللي مالهم وظائف


موضوعك راق لي ألف شكراً لك

[ديوان]

طبعا ما اؤيد النفاس بالبيت وعند الزوج ,,

والسبب ان النفاس فترة نقاهة ومرحلة فيها تغيرات نفسية كبيرة وتحتاج بهالفترة اهلها من ناحية التنفيس عليها ومساعدتها بالبيبي والجلوس معها اغلب الوقت وهذا طبعا منعدم ببيتها ..

طبعا اذا توفر ببيت الاهل الراحة والخدمة لها ولطفلها ..

وربي يسهل عليك ..

[المهرة]

.
الآن صار النفاس أشد من ليلة الزفاف بالخسائر وأنفاق الاموال الطائله التي ما أنزل الله بها من سلطان
وهذه بعض الخسائر التي على عاتق الزوج المسكين
أستئجار خادمه بــ2500 ريال
جوال من 1500إلى 2500 ريال
مفرش من 500فمافوق
سلااااااال حلى 500فمافوق

اذا على المصاريف فهي ماراح تفرق يعني اذا كانت بتحتاج لشغاله في بيت اهلها فمن المؤكد والضروري أنه في بيتها بتحتاج لشغالتين بدل الوحده

ولزوم الضيافه برضه ماراح يفرق لان الناس راح يزورونها في بيتها أو عند اهلها ...


لذلك لازلت لااؤيد وبشده .

[**((الحنونه))**]

88888
أكيد حبيبتي أن المصاريف ملزومين بها حتى لو في بيته لكن تجلس ببيت زوجه حتى هو يستفيد من الخساره
ولا يكون سكنه بالإستراحات أو عاله على غيره


نسيت أقول لك يا ام الكتكوت الله يحل كربك ويهون عليك <<ولا تنسين بشرينا عشان نزورك

[ام الكتكوت]

مشكوورين على اثرائكم لموضووعي ....
اتفق معكم ان الولاده عند الاهل افضل في حاله كانو مستعدين وقادررين على خدمتها

لككككن لو صار الوضع عكس ذلك وماتوفرت العناايه الازمه من الاهل !!!

احيانا تكون الأم تعباانه وماتقدر عالخدمه ومع هذا تجي البنت وتبلش امها بولادتها

واحيانا تكون الام متزوجه رجل غير ابوها ومع هذا تجي تجلس عند امها

وفعلا انا استغررب من نظره الناس للي تتنفس في بيتها واسئلتهم الي ماتنتهي ليش ماتروح لاهلها ؟؟؟

اهلها مايبونها؟؟؟ ولا هي ماتبيهم ؟؟؟؟ رغم انه الوضع الطبيعي ان الوحده تبلع العافيه في بيتها
___________________________

الحنونه== تسلمين على الدعووه وانتظر زيارتك طبعا بعد ماأرسي على بر في مكان نفاسي

[مهاااااااااااوي]

انا ماعلي من كلام الحموله ومن على شاكلتهم
اهـــــــــــم شي راحتي النفسيه وراحة اطفالي وطبعا ولاداتي كلها بداية من الثاني في بيتي ويازينها من راحه لا ازعج اهلي بااطفالي واكون حره في بيتي
الله يقومك باالسلامه ولايهمك كلام احد

[غــــ م ــــوض]

أنا مؤيده بأن الزوجه تقضي نفاسه ببيته ..

بس يكون من الطفل الثاني .. لأن البكر صعب شوي من كل نآحيه

لآزم له عنآيه خاصه من الأم وكذا لأنه شي جديد على اللي والده .. إلا إذا هي تعرف عآدي وافضل له بعد


ومآعليك من كلآم النآس إذا أنتي قآدره توفرين لك خدامه وتعرفين تدبرين عمرك

كثير اعرفهن كذا ولآ اسمع النقد إلا من الحريم الكبار .. والحريم الكبار زي مانتي عارفه

عآدات قديمه وأفكار غريبه ..

[Sweet Moon]

الله يعينك الوحده ببيت اهله وشغاله وخواته
وعساه عابره
وشلون لحاله ماااااااااساه
علعموم اهم شي راحتك ولا الناس لايهمونك عادي اصلا الناس كلش يحتسونبه مايخلون شي ولا احد يريح ولايستريح




الله يسهل عليك......

[شًقِـــآؤٍة صًِغَآرٍ]

شكرا على الورد ياوردة:p

بالنسبه لي لااؤيد اطلاقا ان النفاس يكون ببيت الزوج لإنك تحتاجين الى عناية خاصة مايقدر زوجك يوفرها لك الا اذا كان (مصري) ;)

وكمان المرأه في النفاس تبي سعة صدر ووناسه وزوجك بيقضي نصف وقته برا البيت :oo

وكمان لاتنسي ان العنايه بالمولود راح تصير زود عبء عليك:i125

واخر سبب غيري جو وخليه يشتاق لك وانتي تشتاقين لبيتك ...:rolleyes:

نفس الرأي :)

[عذووووب]

طيب واللي تكون في منطقة ثانية بعيدة عن اهله والحموله يعني ماحوله احد

بهالحال وين تنفس تروح لاهله او تقعد بيته ؟؟

أنا بكر وابدخل التاسع ومنطقة ثانية ماحولي احد ابدددد ولي عن اهلي شهر مارحت لهم وابنتظر لين ينتصف التاسع واروح لهم ...

يعني لو قعدت بيتي نفاس انا ابي الناس ابي احد يجين يوسع صدري وخلينا نبعد نجدد الاشوااق
يالله تهوووون علي وعلى ام الكتكوت وكل حامل الولادة

انا اللي ودي هو اني اولد بديرتي اللي انا به لان دكتورتي جدااااا روووعه لكن مااقدر ابروح لبريدة والله يعين على مستشفى الولادة خااايفة منه

[انثــــى كلاسيـــكية]

انا من رايي تكون عند اهلهاابرك واصرف
بقولك شي نفاسك بالبيبي الاول راح يختلف عن نفاسك بالبيبي الثاني

والله اعرف لك وحدة اهلها انواع الاهانات والكدة عليها حتى الكهرب يحسبونه عليها ومطلعين روحها بالنفاس

مع ذالك متحملة عشان نظرت زوجها لها


وتقول اذا صار لي شهر يلمحون لي ضفي قشك وانقلعي ومع ذالك تتحمل

وتقعد كل الاربعين



الله يهون عليك ويقومك بالسلامة يارب

[ابتسامة تواضع]

اول شي اهم شي راحتــــــــــكـ

بس انا افضـــل تقضيـنـه بيت اهلـــك لانك تــوكـ

الحيــن لو فــرضا احملــت امــي اكيــد تبــي تقضــي نفاسه بيته
لان لــه بنات اكبــر وعيال

بس انتي توك كتكوته مثل بنوتس
عاد انتي ابخــص مير الله يهــون عليتــس ويهون على اللي كل حامل
وترزق للي يتمنون ياحي ياقيوم

[•°انكسار الأماني°•]

واسهل شيء يسويه انه يرميها عند اهلها وهم يبلشوون فيها

حلوووه يرميها عند أهلها وهم يبلشون فيها ....
هي خبرت الأهل يبلشون ببنتهم ؟؟؟
وهي خبرت الروحة للأهل تسمى رميه ؟؟؟

طال عمرك أنتِ ماأخترتي البقاء في بيت زوجك فترة النفاس إلا لتضايقك من بيت أهلك ,
ربما يكونوا شاذين ولايعاملونك معاملة بنت يحبونه ويغلونه ويدورون راحته ,
وربما إنك تسمعين بتأديب الزوج وجعله يتحمل غثاء زوجته على قولتك ,
خلي هالهواجيس الخرباطية وأولدي عند أمك وإذا أمك مش موجودة روحي عند جدتك أو أختك الكبيرة ,
بلا بيت زوج بلا بطيخ صيفي , سيبي هياط بني تالي ورا ظهرك لإن مصلحتك أثناء التعب عند أهلك ياشيخة .

.

[متصفحة]

شوفي يالغلا ..

إذا أمك مو قادرة تواليك يكفيك منها الحنااان والعناية

أنا ومعي أربع أطفال ماأفكر أولد ببتي مع العلم أنه الحمدلله عايشه عيشه زينه ولكن .. لآغنى عن الأم

مهما دلعك و دللك تبقى الأم غير يالغالية

ويكفيك لاقالت كولي هذا وخلي عنك هذا .. يعني تدلعي وكأنك طفله وصيحي عليها وقولي لايمه أبي هذا وماأشتهي ذاااك ..
مع العلم أني سمعت أنه فترة النفاس يزيد الأقتراب بين الزوجين ولكن مهماااا صار غير أمي ماااابي ولا يمكن أرضى بغير بيت أهلي ..

دعواتي لك بالسلامة إن شاءالله

[السنافيه]

أهم شي الراحه أنا جربت اتنفس مرتين عند امي والله اني ارتاح وقت الصبح لاقعدت اسولف مع اميمتي عكس الحين انا نفاس ببيتي لان اهلي يرممون بيتهم امي جت عندي بس الحين راحت عشان اخواني يدرسون واحيانآ تجيني ضيقه مع أن زوجي مو مقصر بشي بس عند مامي اريح بقوه.....

[ام الحنان]

"
الحمدلله على كل حال

,
انابقولك وجة نظري ولكـ الخيار غاليتي،

اناتوقعها على حسب الضروف اذا كانت امك لوحدها في البيت وعاجزه عن نفسها يعني كبيرة في السن
من الافضل انك تتنفسي ببيتك وياليت تجيك عشان تنور ببيتك واكيد بيكون عندك شغاله


عشان من امك تنالي الفوائد والممنوع والمرغوب اثناء النفاس وتوسع صدرك
:
اماان كانت امك وسط في عمرها وعندك اخوات لاوالله الافضل عندها

عشان تعرفي الاميمه بتهتم فيك وبتغذيتك
وعشان تعرفي النكهات الي تاكليها<<<افهموها
واذاكان اهلك بيخدموك حلوووو وانتي اهتمي بنفسك ونظافتك اثناء النفاس لانه من الضروري
واحرصي تكون ريحتك طيبه وخاصه اذاكان زوجك بيجيك
واحسن لك عند اهلك عشان تتفرغي وتهتمي ببشرتك وشعرك وطفلك
"
والله يكوووووووون في عونك ويسهل دربك

[ورود المساء]

الله يسهل عليك الولاده........اتوقع اريح في بيتك حتى ماتزعجين اهلك وانا ماجربت ولادة البيت....اولد عند امي الله يجمعني واياها في جنات الفردوس الاعلى.....

[رويدا]

والله يا أخيتي أقضي فترة النفاس عند أميمتك إذا كانت موجوده
يكفيك قهوة الضحى معها لا خلى ولا عدم أن شاء الله
والله يسهل عليك وعلى كل مسلم

...........................

[ألوان وتناتيف]

والله غريبة في أحد مايتحمل بنتهم وعياله وأصلا البيت بيت أبوي يعني ماحد له منه أجي متى مابغيت وأقعد قد مابغيت وأمشي من مزاجي ..

وبعدين حتى لو عندك شغالة ببيت زوجك ماراح تناظرك مثل أمك وأكيد بتقومين وتحركين كثير أقل شي لعيالك الثانين وبالليل من بشيل معك البيبي إذا قام يقولون إنهم متعبين بنومهم بالاربعين ..

أنا ماتزوجت وإختي على وجه ولادة ومخططة إن شاء الله أحط البيبي عندي بالليل علشان تقدر إختي تنام ..

[مستنكره نت]

عزيزتي الله يقومكـ بالسلامة

وتجيبي كتكوت اخر


حنا حبيبتى مانعرف ضروفكـ عشان نفيدك ايهم احسن
انتى شوفي ايهم اصلح لك وامشي عليه

اما بالنسبه لنضرة الناس ولله هاليام كل وحد مشغول بضروفه ولا أحد سأل عن أحد اما اللي يتصيد لك لو تسكنين قصر بيعرف يطلع عليك كلام

اما بالنسبة للعادات
ففيه عادات يشكرون اهلنا على وصولها لنا

فهذى من العادات الجميلة@

[تمره]

اهم شي راحتك انتي
لاتفكرين في الناس بكيفهم مارح يوسونك اذا جتك ضيقة صدر او اكتاب
واظروف تختلف من وحده لثانيه
بس انفاس في بيت الاهل لها طعم غير
ولا عاد قهوة الصبح تجنن مع امي
واشياااااااء كثيره
انصحك انه تقضينه في بيت اهلك اذا امك موجوده
الله يهون عليك ويفرج لك

[انسانه]

انا مالي دخل بالولاده بس اشوف انه احسن ببيت اهلك لانك محتاجه مساعده لك لطفلك واللي يجهزلك الغداء والعشاء واللي يهتم بالبزران اذا صرتي ببيتك وعندك شغاله مارح تلحقين على شي بزرانك ولاالاكل والبيت والرجل ولاالناس اللي داخل طالع غير نفسيتك وراحه مافيه ماتقدرين تنامين انا اشوف اختي اذا ولدت تجي عندنا ولله ماتنام رغم اننا عندنا شغاله وامي وخواتي بس مانلحق الله يكون بعونك ويسهل عليك وعلى المسلمين يارب00

[*قمر]

أم الكتكوت شوفي ياعمري سوي اللي يريحك لا تنتظرين رأي أحد ترا كل وحده لو يحصل له اي شي غيرت رأيه بالموضوع وفقا للي يصير له هي شخصيا
اعرف لك وحده كانت تقول لا عيب مايصلح من الافضل ان الوحده تقضي فترة النفاس عند اهله
وفعلا قعدت ببكره عند اهله ويوم حملت بالثاني بدت تعذر بالزوج انه وده تقعد عنده لانه اذا راحت يحتاس واكتشفت ان كل هذولي مبررات تبين الصراحه ملت ببيت اهلها (ادري انهم اهلها وعلى العين والراس ) بس هي تحب تطرب روحه تبي وسائل الترفيه اللي كانت بيته مثل ( قنوات فضائيه-نت-............وغيره وغيره
لأن أغلب العوائل وخصوصا الكبار بالسن البيت يكون مقيد شوي وكل وحده له اسبابه الخاصه فيها
شوفي اللي يناسبك وسويه والله يقومك بالسلامه اللهم امين.................

[(خـ ج ـل النواعمـ)]

واااااااااااااوك :i125 تخيل ؟:confused:

مستحييييييييييييييييل !! جد عذاب

والله عند اهلك طبعا لأنك تحتاجين عنايه واهتمام وزود عليك بزرك اللي معك

وزوجك مهما كان ماراح يكون مثل امك أو اختك ولو جاب لك عشر شغالات

أقول بس لا تتوهقين وتقوليين بعدين ياليتي ..


وبعدين وشلون تبي تتدهنين وتحوسين بخلطات الشعر والوجه والجسم ورجلك عندك :113:

بس جد تراه صعبه فكري زين ترا السالفه مو هينه <<اللي يسمعه يقول مجربه :d

بس جد حالياً اختي نفاس عندنا واشوف انه بلشه :cool:

[الصمت الهادئ]

لالالالالا أنتبهي والله راح تهملين نفسك وتشقين ورا زوجك وش ياكل وش يلبس

وين راح ليش تأخر والله لك ناصحه لان وحده من زميلاتي ولدت عند زوجها والله تعذبت المسكينه

ولاتحملت وبالأخير راحت تكمل نفاسها عند اهلها

أهم شي راحتك عند أهلك على الأقل تهتمين في نفسك وطبعا الراحه النفسيه أهم شي

والله يهون عليك

[هايين]

الي تقدر تقعد عند اميمتها تقعد
واذا صارو اعيالك كبار غصب بتقعدين
بنتي بغيت اموت من ضيقه الصدر لحالي
بس اعيالي كبرو مايبون الا بيتهم
وضحيت بصحتي ونفسيتي عشانهم

..

[! ۉرۉدگ تذبـل !]

بعيد عن العنايه والاهتمام بالنفاس .. ودك الوحده تغيب عن زوجها فتره معينه عشان يشتاقلها وتشتاقله مو اجلس بوجهه اربع وعشرين ساعه كل ما ابعدت فتره راح يوله علي ويحس بوجودي بالبيت
والشي الثاني اني اجلس عند امي ارتاح نفسياً واجلس اضبط عمري عشان اطلع لزوجي بشكل ثاني اذا انفست عنده ماراح يتغير شي بشكلي
تخيلي جالسه ببيتي واذا جا زوجي البيت ريحته ادويه والاكل اكل نفاس وشكلي تعبانه ماتزينت له ولا شي تقل احد حالفن علي
يازين بيت اهلي بس اتزبط على كيفي واذا رجعت لزوجي اكون بكامل زينتي مب شهباء وريحتي ادويه

[مقآمُي عَاإلٌي]

والله أنا للحين لو تحمل أمي أحبلي نروح عند خوالي >> أحلفي

بس عن جد يعني

ببيتك أوم الكسل !

مافي احد من خواتك او اخوانك يمر علييك بالليل يسولف لاصآر الصعنون صآحي !

ولا في احد الصبح يجي يسولف معك !

ولا الضحى مع امك

ولا الظهر تناميين وتخلينه مع امك او ابوك !

ولا العصر تتقهوين مع كل اهلك

ولا المغرب لآجاكم احد انتي بس تقوميين ترتزييين !!

يعني أزين ببيت الاهل ولا بالفرق !!

أنا من أكبر المؤيدات لقضاء النفاس من الطفل الاول في ببيت الزوج ..
بعدين مافيه عيب ان الوحده تقضي نفاسه في بيته وتترك العادة القديمه
الآن صار النفاس أشد من ليلة الزفاف بالخسائر وأنفاق الاموال الطائله التي ما أنزل الله بها من سلطان
وهذه بعض الخسائر التي على عاتق الزوج المسكين
أستئجار خادمه بــ2500 ريال
جوال من 1500إلى 2500 ريال
مفرش من 500فمافوق
سلااااااال حلى 500فمافوق
وبعض العوائل زوج البنت لازم يدخل معيشتهم ,, من رز , ولحم ووووولو نبتل نعد تقل ميتين من الجوع قبل تالد بنتهم
بعدين طلعة الروح الطلاعه خخخخ مايدفع أقل من 3000 ألف ريال
تراي ماعديت كل شيء كان تنفجرروسكن الله يستر
>> يعني هي تحمل وتولد وتشووف الموت ولا تستاهل يحط له شي هي واهله !

شسمه عااد كل واحد وادرى بحياته وابخص وش يسوي وش مايسوي

الله يفرج لتس ويرزق مااماتي ,,~

[بنت البشر]

عند الاهل اونس

وبالبيت اريح لك يعني ماتفشلين من اهلك عيالك خربو وكسرو

لكن اذا كانت امك موجودة وطيبه ةتقدرين تجيبين خدامه تساعدك فااحسن ببيت اهلك

الله يقومك بالسلامه...

[بدويه والفخر ليه]

في بيت اهللك احسن عشاان تااااخذين راحتك في الخلطات والعنايه الشامله

ام في بيتك بتحااتين كل شي وتهملين نفسك لانك انتي المسووله

[=خطاهم ضيع غلاهم=]

اكيد ابيت اهلك

ولا بالفرق

وه بس يالله تخليهم لنا

[ســكـادآ]

صعبه خاصه لاصرتى بكريه