== أمـي وسوق الحريم ==

[سعفة]

السلام عليكم ورحمة الله وبركاته،،،،، الهرج باللغة العامية
جاز لك هرجي ولا ضف وجهك لا أحب راسك <<== :D

داخل سوق الحريم / أنا وأمي وعمتي

هذا هرج أمي وعمتي بسوق الحريم
اختلفن بالهرج واسمعوا
أمي / يا ؟؟؟؟ أمشي منا خل نمر من عند المواعين
عمتي / لا يا أم سعفة خل نروح نبيع الشغاب لا يصكون
أمي / الذهب رخيص يا أم ؟؟؟؟ خل نلف بس للعليان مسوين تخفيض
ايوالله ياخيتي خل ناقف عند هالوليد يبيع فيري
أمي / على كم الفيري ياولد
الولد / ثلاث بعشرة يا خالة
أمي / عطن ثلاث بخمسة يا وليدي
الولد / ما طلع علينا يا خاله
أمي / إلا والله إني جايتك خطوا النوبة وآخذتن ثلاث بخمسة
الولد / يالله ياخاله علشانك زبونه عندنا ... يالله
أمي / خذ يا سعفة حطهن بالكيسة ولا تآخذ شيء أمردك
أنا / يوه بس واحد لكفرات موتري
أمي / والله لا أعلم أبوك ما يعطيك قروش للمدرسة باسر وأخليه يجلدك
أنا / يووه يووه تراي بديت ما أشوف من الاكياس شيلي بعضهن ==> الدعوى زحمه
أمي / فرقعين ،، انت ما تستحي تآمر أمك ،، يالله رح حطهن بالسيارة وتعال
أنا / طيب ......
عمتي / يا أم سعفة هولمي فرقعين جدي تذكرت ان معي كرت من الحسون مرجعتن بهالفايت فنايل البنات وابآخذ بهن قمصان
أمي / ايوالله ذكرتين يا اخيتي أبشري لوليدي نعيلات وبدله
أنا / === مدودل الدميجة وراهن شايلن آخر المشتريات

_ _ _ قبل دخول مركز الحسون _ _ _

رجل الهيئة / وين يالحبيب ممنوع دخول الرجال
أنا / ايه بس هذي أمي وهذي عمتي
الهيئة / إيه الله يجزاك خير لا ازدحم المحل ممنوع دخول الرجال
أنا / طيب .................. الله يجزاكم خير

_ _ _ أذن المغرب ............ طلعن الحريم _ _ _

أمي / يالله يا سعفة رح جب السيارة نبي نحتريك بذا بسرعة
أنا / طيب .......... شوفن اطلعن قدام الهيئة علشان أسرع نركب
الحريم / ايه خلاص هولم بس

_ _ _ _ بعد ركوب السيارة بخمس دقايق متجهين للبيت _ _ _ _

أمي / شفتي يا أم ؟؟؟؟ يا حسافة البنطلون السكري ليتي آخذته
عمتي / ايه بس يا بعدي هذاك غالي
أمي / ايه ما يظر مثلس خابره مانب طالعه مثل هالمرة
عمتي / وراه
أمي / تعرفين أبونا يعيي ولا يبي السوق الا للضرورة
عمتي / شفتي التنانير وش زينهن
أمي / ايه يالله لك الحمد أخذت لي واحد لبنتي الكبيرة ( ؟؟؟؟ )
عمتي / أقول يا أم سعفة
أمي / سمي يا حلالي
عمتي / يا حسافة الصانع ما مريناهم زين .. والله إني ابشري كومة مواعين
بس العصر شوي ياحسافة ،،، كود ولدي يودينا باسر الصبح

- - - - - - قبل وصول البيت بكيلو - - - - - -

أنا / يووه يووه ميخالف أفك باغة الفيشار آخذ واحد
أمي / مهيد ،، والله ما يطب ايدك ... وين العشرة الي عطيتك
أنا / والله اني شريت به فصفص وبليلا من راعي العربية
عمتي / ياخيتي عطيه من هالفشار كثر خيره ألي ودانا
أنا / إيه يا عمتي يا خلفهم
أمي / والله ياوخيتي جايبتن هالفشار للبزران ما دريت ان هالشايب يبي
أنا / إيه يوه والله إن العيال الكبارين يآكلون فشار هكليوم
أمي / خذ عساك للي ما ياويلك

- - - - - - وصلنا البيت - - - - - -

أمي / يالله نزل القش
أنا / طيب
البزران / واقفين عند الباب
جت امي جت امي جت امي جت امي ( كل الحارة يسمعون ملاغاتهم )
أمي / اسكتوا تراي ما اعطيكم من الفشارات
البزران / خلاص خلاص خلاص خلاص ،، نتوب نتوب نتوب

- - - - - داخل الصالة - - - - - -

بزر رقم 1 / يوووه آآآآ آآآآآ آآآآآآ (يصيح) وراه ؟؟؟؟ معه فشارين وانا لا
أمي تنادي بزر رقم 2 / تعال منين لك الفشارين
بزر رقم 2 / والله انه هذا فشار أنتي معطيتن إياه وهذا شاريه بقروشي من البيقالة
أمي / خلاص يا ( بزر رقم 1 ) شاريه من قروشه
(( وأخيرا اقتنع ))
أنا / يووه يووه .... (( خايف ))
ميخالف آخذ من الريكو الي بالباغة
أمي / لا لا فرقعين و مهيد ... هذا مغبيته لخالتك لا جت لمنا
أنا / زين زين

- - - - - بعد يومين من رحلة السوق - - - - - -

أمي / سعفة يا سعفة
أنا / سمي يوه وش تبين يا ألبي
أمي / والله إن المقاطع والتنانير الي شريناهن ودي أرجعهن
وان النعال الي شاريته لعبدالرحمن هدية مهيب مقاسة
ودنا يا بعدي نروح لو ربع ساعة نرجع ذولي ونرجع
أنا / خلاص يا خلفهم ميخالف
أمي / طيب اجل اصبر خل اسأل أبوك

... طق طق طق طق ... ادخلي
أمي / هلا ابوسعفة
أبوي / نعم وش عندس
أمي / والله إني عندي هالمقاطع ودي أرجعهن والنعيلات ألي شاريتهن يوم نطلع أنا وسعفة قبل يومين ودي أرجعهن صارن صغار وودي يجدعن أبآخذ خمس أمتار من الحسون أبفصلهن عند الخياط تعرف قرب عرس ريم ولازم نفصل ثياب
أبوي / طيب وش المطلوب
أمي / وأقولك إن الثياب ألي هكليوم بعرس فاطمة شافو الثوب ألي علي
وودي نغيره ____ والله إني يوم أروح إنا وسعفة وعمته شفنا هكالمقطع والله ما هنا ملحه بس والله إني نقصن 200 ريال وأغديك تعطين
(((((( وكل هالقرق علشان تآخذ 200 زود )))))))) أدوووخ على أم سعفة

_____ قسم بالله تنسيم أم سعفة _____

أبوي / طيب خوذي ولا تتأخرون تراه نص ساعة

- - - - - - طبعاً الوقت بعد صلاة التراويح مباشرة - - - - - -

= = شغل الموتر
وبالطريق أمي شافت حلويات الأرياف
أمي / ياوليدي مدام على طريقنا نبي لنا بخمسين ريال حلى
أنا / خلاص هاتي الدراهم ..... يالله
وبالطريق وحنا بشارع الصناعة
أمي / ياوليدي هذا محل خابرته يبيع نعال وأنا محتاجة نعال لختك الكبيرة
تذكر يوم بالاستراحة حصة دخلت بهن بالحمام وانقطعن وأبي له نعال ياويلي
أنا / طيب يوه همانا بس نبي نرجع الثياب بس ونعال عبدالرحمن
أمي / ايه ياوليدي ما صدقت ان ابوك يطيعن __ على طريقنا الله يهديك
أنا / طيب طيب يا ألبي ،،، كلشي على طريقنا
أمي / عيب عليك أمك
أنا / فرحتن انس امي لا أشلق وجهس عاد
أمي / وش تقول يالفاجر
أنا / والله اني ادعي لس أقول يا خلفهم
أمي / يالفاهر وشي يا خلفهم
أنا / يوووه شوفي شوفي افهمي صح اولاه _ يعني كل هالهنود الي بهالسوق وهالحريم والرجال والبياعين وهكالهندي ذاك الي يطير المطايير__ يعني أنتي أحسن منهم كلهم يعني وش اقولس بس _ أنتي افهمي أولاه
أمي / إيه فاهمة أنت امش بس

---- مرينا من عند العمرو للدراجات ----

أمي / ياوليدي أوقف عند حق السياكل ان أم الجيران أم عبدالله مضنية وودي أجيب له هدية هي ووليده الجديد خله تفرح
أنا / يالله ما نقول شيء يا وزارة الداخلية
أمي / شف ياوليدي قدم بس شوي عند الصانع ابآخذ علب زنجبيل ان اخوك الصغير يوم اني انسب السحور كسر السبيرة
أنا / لا حول ولا قوة الا بالله ....... يالله ما نقول شيء
أمي / يالله عاد بقا الثياب والنعيلات رح اجدعن عند العقاب حقين الذهب خل ادخل مناك
أنا / طيب يايوه طيب ... يالله تراي احتريس
أمي / يا وليدي ما أغديك تروح وتجين عقب ساعتين
أنا / يوه هماس قايلتن لي نص ساعة
أمي / ايه ياوليدي مته يطيعن ابوك بالعزر والغرابيل
أنا / زين خلاص

- - - - بعد ساعتين - - - -

يالله يارب مته تجي مته تجي مته تجي يارب يارب يارب
أمي / طق طق طق طق
أنا / وين القش والثياب يوه
أمي / ايه شف الوليد هالصغير ألي وراي خذهن منه شايلهن بالعربية وعطه خمسة
حطهن بالغمارة الي وراء بس المواعين خلهن قدام والهدوم غطهن بالشراع
أنا / لا حول ولا قوة إلا بالله ... كل ذولي شاريتهن يايمه
منين لس القروش يوه ... والله انتي غنية
أمي / ايه ياوليدي ما فذ شيء معي وبعت مجاولي ،، وأنا مانب بحاجتهن
أنا / والله ما نتب بسيطة تدهرين اثرس

- - - - باقي ربع كيلو على البيت - - - -

أمي / والله يا وليدي إني ماشريت شيء ... ما أمدان يكافي
أنا / يوه هالحين كل الليل ولا شريتي شيء
أمي / والله وش اسوي يا بعدي لكن أغدي أبوك يطلع بنا باسر نوبة ثانية
أنا / والله انس وسيعتن صدر يا ألبي


- - - - - - وبعد أسبوعين - - - - - - -

أمي / سعفة يا سعفة يا وليدي يا فلذة سبدي
أنا / سمي يايوه __ أكيد تبين شيء
أمي / والله ياوليدي ودي اطلع للسوق
أنا / يوه وش تبين للسوق ما مليتي
أمي / والله ياوليدي ما عمري طلعت إلا هاكنوبة وقنيزة
أنا / عجيييييييييييييييييييييين
أمي / وش رايك ياوليدي

- - - - - وهكذا تدور الأيام وكل أسبوعين ودن للسوق - - - -

- - - وبعد شهر - - - -
أمي / يا أبوسعفة والله إني ما عمري طبيت السوق يكافي ودي أطلع
أبوي / الله يغربل عدو الظالم .. ما عمرس طلعتي وأنتي كل أسبوعين تطلعين
أمي / ايه يكافي __ مرة وبالعمر وقنيزة
أبوي / خلاص بس لا تشغليننا ... يالله يا سعفة وده لا صليت التراويح
أنا / زيييييييييين زين ما أقول شيء يا ألبي
يا خلفهم يا ابوسعفة والله إني أموت بك
بس أهم شيء يا يبه تسدد فاتورة التلفون .. ما تصير علي
أبوي / أنت وده هالحين ويصير خير __ أعوذ بالله شغلات هالبزران
((((( طااااير من الفرحة الفاتورة مهيب عليه هالشهر ))))))

- - - وهكذا تدور الأيام - - - - - - -

وأنا هذا شنبي وهذا كبري ومن عمر الدنيا وأنا أودي أمي للسوق
وكل ما قالت ودون .. قالت والله إني ما عمري رحت

عاد يجن خواتي الي مابهن ملح ___ سبحان الله مثل أمهن
لكن لا بغن يروحن للسوق ولا شي .. علطول يروحن لأمي
علشان تجي لمي يقاله واسطة لا أدحه مع جدايله

___ بداية البنات وشلون .... لا صار عقب حدا هالعصريات

يجن لامي .... يوه يمه يوه يمه ..__ تكفين ياحبيلس نبي السوق واننا نبي نرجع ونآخذ
وعرس بنت الخال قرب والشباصات شافنهن البنات علينا والسكري الي تقولين زين نبي نشوفه
والروج الي عند الربدي ودي اجيبه لس دامس ما تقدرين تطلعين اليوم
تكفين ساحري سعفة يودينا تكفين هاه ها تكفين __ طيب اصبري خل أروح اسحاره وأشوف عنه
أمي / طق طق طق .. ياوليدي البنات يبن السوق وودهن يرجعن بعض الحاجات
ما أغديك لو انت واقف بس تجدعهن ربع ساعة __ هاه وش قلت
(((((( طبعاً البنات واقفات عند باب الغرفة ،، كل وحده تقول للثانية ادعي الله انه يطيع
طبعاً مع المناقز ويارب يارب __ تقل صلاة استسقاء ))))))
وبعد الحاح شديد ((( وافقت إني أوديهن )))
أمي أول ما طلعت من الغرفة // (( ابتسامة ))
البنات // هاه يوه وش قال
أمي / يالله بسرعة يابنات البسن عبيكن بسرعة

______ صورة داخل غرفة البنات وهن يلبسن عبيهن _____

بنت1/ يالله يابنات من الي آخذتن غدفتي
بنت2/ ما ادري يمكن تلقين امي ناشرته مع الخلاقين
بنت3/ روحي خوذي من الوصخات ميخالف همانا بس نروح
بنت1/ لاه _ ما تكلفتي يالدبية
بنت2/ انزلعي بس يالقزما
أنا / هيييه هييييه يالله يابنات تراه اذا احتميت السيارة وانتن ما طلعتن تراي أبروح
بنت1/ يالله بسرعة اختبن يالله لا يروح عنا

أمي تحت الدرج / يالله يا بنات هولمن بسرررعة لا يروح سعفة عنكن
وقبل ما تنزلن جيبن الرضاعة والديد ،، وجيبن باغة الفشار الي مغبيته حدر هدومي

___ صورة للبنات بالدرج ____

بنت2/ ههههههههههههههههههههههههههههههه
بنت3/ وراس تضحكين هو
بنت2/ يالهدرة لابستن عبات أمي
بنت1/ هههههههههههههههههاهاهاهااااايييي
أمي / طق طق طق (( حديد الدرج )) يا بنات مهيد بسرررعة لا يروح عنكن

_ _ _ _ ركبن البنات ومشينا _ _ _ _

((( وبعد ما لفينا يسار من عند مستوصف العجاجي ، رايحين للسوق مدحدرين )))

____ صورة للبنات وهن يهرجن بوسط السيارة ____
بنت2/ شوفن يابنات هذا الخياط الي تقول الجوهرة انه مفصلتن ثيابه عنده
بنت1 / اييييه صح تذكرين ،،، خلاص ابقول لأبوي يفصل الثياب عنده
بنت3/ ياي = = أنا يعععع ما تعرفن تختارن _ أنا بفصله عند الراقية
بنت1/ لاه _ الراقية غالين
بنت3/ ايه اصلاً ابوي مواعدن





**** وبعد كل هالقرق يا شباب
ودي تكفون واحد يقولي أمه وخواته سذا ولا لا
أنا داري إني مصّخت الهرج وطولت السالفة
بس تحملون الله يجعلكم تعرسون كلكم ولا يبقى ولا عزوبي بهالمنتدى
وقولوا آمين __ بس على فكرة يا ألبي دورو لي علاج أحب روسكم
تكفووووووون تراي إلى هاللحظة هذي وأنا ___ يقال لي
( ود ، جب ، رجع ، اكفز ، جب مثله ، جب اصغر منه ، جب اكبر منه ، ما نبيه ، خذ الباقي )



وترقبوا الموضوع القادم بعنف <<=== أثولث على عنف
موضوع موضوع إلى هالحين ما جهزته
لأن تجهيزه يبي تفصيل ،، ولازم يمر على ( قيطان ) <<=== متأثر بامه


يالله سلامو أليكم

[الوسيــــــم]

ههههههههههههههههههههه
الله يرج امك ياسعفة
والله ياهي منسمه مثل اولده بس ولو امك تأخذ حقه مهب مثل ولده الحبيب


اقوول والله ياانت علىالشيله تطيعهم بس انت اخلاق ماشاء الله عليك منتب مثلي اطقه بوجيههم
اذا قالولك شيء خلك مثلي اقول لامي لامشغول خلوه بعدين وعلى هالكلمه كل يوم ادوووووخ على كلمة مشغول
ولا اذا جن خواتي اقولهن(لأ لايلوي حنوككن)

اجل يمكنه امك اللي دايم اشوفه تقطع الشارع معه كيَس الدنيا تحلفوون مصلوخه
اجل من بريده هالحريم اللي كاسراتن السوق انا منول احسبهن من الضليعه ماعمرهن شافن العيشه


لا وبعد يعيون يعطونك فشار والله يانا رحمتك يوم الريكو والله ماشاء الله عليك دابة سليمه ماغير تدربي هالدميجه ياحبيل ميده
اقول عندي لك حل والله ياهو مووت

شف احلت امك بالسوق بعد صلاة العصر مباشره انت واياه صلوا بالجامع الكبير وهي صايمه
وماتأخذه الا بعد صلاة التراويح فرض انك تصلي بالجامع علشانه يصلي عشر اكيد هي تبتصلي خمس همن تلهث فرصته
همن اذاقضيت مصلي ازهم عليه همن تجيك مقطعه بااخر نفس جوع ولهثان او صح هي اعلم بنفسه مثل ماباعت المجاول تشري من هلي باسطين وتروح تفطر بالجامع او يمكنه عساك مانتب هي مزينتله هاللقيمه من صلاة الظهر وحازمته بباغه برقبته علشان ماتنساه
من اللهثان تنسى روحه تخاف يفوته شيء<== تحلفون انه من افريقيا.

ولاهي وده تكمل من بعد التراويح الا الساعه حدعش بس انه مقطعه من الجوووع.

استغفر الله اللهم اني صايم بس هماه تسذب
اقول قل لأمك تحللن والله يانا حشيت به .

اما خواتك عطهن الخامس من كثره اسهجهن سهجةالعمر
خلك مثلي اذا قالن لي
نوبة اقول لا ونوبة اقول تولمن ابطلع شوي وأجي ادامكن تلبسن عبيكن و
اقعدن عند الباب خلن الباب مطرف واذا سمعتن صوت سياره اطلعن ولا تراي ابمشي واخليكم همن اذا طلعت اديور على البيت وااقف دقيقه
وهن ماامداهن يحسبنن اببطي شوي
ويزهمن علي يقولن وينك يالله تولمنا اقول توا وقفت عند الباب ولاطلع احد قالت تخسى واقول هماي انا قايل اذا شميتن صوت سياره اطلعن وانا اللحين بعيد ومنب ماركم وقفت لمين مليت ولااحد طلع
ايه خلوه نوبة ثانيه<== تسنه رحوم
واقطعه

وابتل على هالحال
والله يانا كتبت قصة حياتي


وخلاص انت جرب وعلمنا

وعذراً على هذا الصك


والسلام علاكم

[الطيــــر]

لا تعليق ....!!!

[عطش الرمال]

ههههههههههههههههههههههههههههههه
عاشت ايامك ياسعفه

والله يانت رهيييييييييييييييييييييييييييييييييييييييييييييييي ييييييييييب
وش هالمقابله

عفواً
وش هالطهبله
واله يانت نكككككككككككككككتة

اعلمك اني فطسسسسسسسسسسسسسسسست
من الضحك
والله ياهن مهسترااااااات
اجل الدعوى كله ببريدة
مير وش رايك بخياط الراقية <<<=== بيفصل لأخته ثوب
مشكوووووووووووووووور سعفوة

تحياتي اخوكم مستر عطووووووووووش
ابوعمر

[ولـــدأبـــوه]

اها اها اها
قطعت قلب ميدي من الضحك
اقول اسمع اذا حضرزواج اخت ميدك ريم قلي والكبيرة احجزها لي
زين.........................
أ.هـ كلامه رحمه الله

[أبوخلق]

قرق كثير

والله كثير



انت وأم انتا كل عائلة سعفه














خربانه

لأنه قرق كثير


الصمت خكمة

[هاني كريم]

لا حول و لا قوة إلا بالله ،، حسبي الله و نعم الوكيل ،،


و الله أني أرحمك يا سعفة قلبي ،، ترحم و الله أني أو يلك ،، يا بعد سبدي ،،


لكن الوالده ما لك عنه غناة .. بس و لا يهمك أنا عندي لك حل لخواتك على الأقل

يخففن من الروحات و الجيات ،،، لا تشيل هم أنا أدبره لك ،،


-------( في فصل الصيف )--------

أذا ركبن معك ،، صك الدرايش مع الأزره ،،، همن صكر المكيف ==> على شان

تغمتهن بالحر ،، و شف لا تسرع ،،، أمش على هونك .. قل و راه ؟؟ ؟

يا لذيب على شان يطول المشوار !! ===> مخ !ّ

هيك يا ألبي يغلسن أغلاس من الحر و يقولن بلاي هالسوق ..


------( في فصل الشتاء )--------


أذا جأ موعد السوق أزبن عمرك بفروه من النوع الي هو همن طق اللطمة الدولية

و أذا ركبن معك قل الدرايش خربانات ما ينصكن .. طبعا أنت أخذ أحتياطك

همن جلعد بهن جلعده و أكنس بهن كنس ،،، خلهن يرقلن من البرد


====> هو رقل !! الله يسمت ،،


هيك خو ما عم بيؤولوا غير هيك مرة



يا حبي لك يا سعفة ،،،

[زهور برية]

االله يرجك ياسعفه بس انت شئ يحفظك ربي
الوسيم وعطش الرمال ووووووووووووجع وش ذا الكلام :i121
انتم مش تمام عساكم ماتعرسون ( استغفر الله) بس غثيتوني ليش تحرضون حراام يودي خواته من يوديهن اذا ماوداهن هو .
والله لو حريمكم ماقلتم كذا بس علشانهن بنيات وضعيفات :( :( :(
سرررررررررررررر الي الامام سعفه الله يزوجك بنت حليلة مثلك.

[العمدة]

وصف لحال وواقع لأغلب الناس إلا من رحم الله ..

المرأة تطلع للسوق ومن محل لمحل ، وتشتري كل الي يطيح بإيديها ، وتجي من بكرى وترجع أكثر من اللي شرت اليوم !! وتلقاها رايحة تشتري الحاجة الفلانية .. ومن مكان لمكان وكل محل يجوز لها ، وكل بضاعة تعجبها ، وكل شوي يطري عليها أمر ، حتى أحياناً تبيع مجاولها وترجع بأكياس الدنيا وفي النهاية تنسى حاجتها الأساسية !! والله حالة .

ومن الخطأ - بصراحة - إخراج البنات الصغار للأسواق ، مع وجود من يمكنه القيام بخدمتهن وقضاء حاجتهن ، كأمهنّ ، ولو كان معهنّ ولي أمرهنّ ، خشية فتح الباب عليهنّ ، وإذا زاد الخروج قلّ الإحساس ؛ فليتنبه لهذا ..

بس بصراحة .. تصوير للحال ولا أروع ..

مبدع يا سعفة ، وبانتظار إبداعك القادم ..

إلا ما تصير واسطة خير ما دام عندك كل هالخوات مشاء الله :)

بعض المصطلحات تحتاج شوي تعريف مثل : خطوا .. مهيد .. السبيرة .. ؟

[الصارخ]

ياأبو اصرقعة


أجل شريت بالعشرة بليلة
وفصفص عسا الفصفص زين

عاد تصدق أمس شاري فصفص من السوق عند القبة

إيه عسا الفشار زين يالشايب

ياحول ياأخوك الصغير

شكلك ناهبه كله هههههههههه





مير وش أخبار سعفة

أختك مهب مسجلة ((أخت سعفة )))

أتوقع يبي يجي ((ولد عم خال جدت سعفة ))







يبي يعطونك الوسام عشانك تعلن عن المنتدى


لاتنسى بالعيد تقولهم >>>>>> إن شاء الله







سلامتكم

[مدحت شوقي بريده]

هههههههههههههههههه

بس وين الصور ... (((( جاب العيد مدحت ))))

تنسيم يابو ( ..... )

اومال لاتروح يوم احد للخبيب مع ام مصطفى ...

ابشرك اروح انا وهي للسوق ومعانا 73ريال تخصيص للشراء ...

بتسدق ياراجل ... نرجع ومعانا 173 ريال ... وكمان اغراض ...

ازاي مأعرفش .........................................

[سعفة]

==================================================
== الوسيــــــم ==
الوسيم رادن علي ،، أعلمك أبقعد يومين مانب مهارجن أحد
ياحبيلك يا الوسيم ياخي أنت مهبول <=== تراه مدحه هع هع هع
أقول يا خلفهم انت بك عرق مثلي ،، تحب القرق الواجد الله يسفينا الشر وشر من به شر
شف ياوسيم قلبي أشوفك تخطي على أمي مرة ثانية أشلق وجهك
أجل منسمه ،، على كيفك يا حبيلك
أقول بعض ناس خلو حريمنا مصاليخ وش السالفة
هههههه يامنسم انت
الا اقول يا بعد ألبي صعبة أطلع بمي من العصر من يحوف اللقيمات لأبوسعفة إلا أم سعفة
والله يا عليه نثرية يحبه قلبك <<=== ولا حرف السالفة ______ يا حبيلك
بعدي الوسيم قلت شيء صعبة أنفذه
أنت تقول اسهج خواتك لا توديهن
أنت شكلك ما تدري وش السالفة
قل وشي
شكلك قلت صح هع هع هع
أصلاً خواتي كلهن يدرسن ولهن رواتب
بالعربي الفصيح لا طلع الراتب أحتك معهم
الي تجدع ميه والي تجدع ميتين والي ثلاث
وأنا أنواع الوناسة ،،،
يعني لا جبتهن من الجامعة وانتشيت ريحة استلام المكافئة
قلت يا بنات مته تبن السوق <<=== المصالح تشتغل يا ألبي
أقول // أعوذ بالله ما يزوجونن مدرسة :D:D:D


== الطيــــر ==
ههههههههههههههه لا تعليق
حلوه لا تعليق
العالم فوقك كاتبين قصص حياتهم وانت لا تعليق
أدوخ عليك يا محمد البكر لا تعليق هع هع هع ههههههههههه
تقبل جغفاتي يا بعد سلوتي أنت وهالعصفور الي تحت اسمك


== عطش الرمال ==
هلا بألبي
عاشت ايامي ،، ياروحي عاشت أيامك أنت
هذي مهيب مقابلة أنت ما تفهم أنت خلاص مزاعلينك ما نبيك اطلع برا هع هع هع هع
شف يا سلاي ومصاريني لا عمرك تفطس من الضحك ____ إفهميت
أقول تقل سمعت بقرقك مهسترات ،،، وش السالفة أشوف بنات الناس صارن مضحاكات
عندك يا مل الدقم ____ أقول الله لا يغير علينا
ذكرت في سؤالكم يا فضيلة الشيخ وش رايك بخياط الراقية
أجاب سعفة رحمه الله قائلاً
(( الحمد لله والصلاة والسلام على رسول الله ، هذا السؤال ليس لي به علم )) والله أعلم
تشكرات سثيرات عطوش ابوعمر الـى آخر كلامه عاشت ايامهو


== ولـــدأبـــوه ==
هع أشوفك تمون تبي تزوج وحده من خواتي
قالو لك فاتحين بذا راغبين زواج ولا حاجة
أنا ما فتحت معرض لخواتي لا والله هالحين أشلق وجهك تشليق
اسمع ،، خلك ما سكن سرا وهين
أما ريم تزوجت وقضت ،، خلاص دور غيره
صارت هالحين مهيب وكالة
دور لك بس وكالة أحسن لك يا خلف موضي <<== هذي فنانة خبوبية
الصراحة يا ولد أبوه ودي أقول لك حاجة بس اني مستحي
هالحين انت ولد ابوه يعني ابوك الي مضنيك ولا امك
تراي ما ادري يمكنك نازلن من القمر ولا حاجة الله يستر يارب
هع هع هع هع هع هع أول مرة اشوف واحد يضنيه أبوه


== أبوخلق ==
هلا ابوخلقان
زاد يارب وانا من اول ما دخلت على الموضوع وانا انتشي ريحة صنان
وانا قاعدن اقرا تحت اشوف قطع سميت طايحاتن علي
وش السالفة ما ادري
اثره منك ،، أقول وراه ما تحط بتوقيعك كريك هع هع هع
الا يا بعد سلوتي كلنا قرق كثير
هين يا ابوخلق تبي من يجلدك بذيا لمين تعاف الدنيا
والله ياعليك مثل مهب معقول
هع هع هع (( الصمت خكمة ))
أقول أنطق خكمة ثلاثين مرة والله ان ينتثر مخك قدامك
خروج الخاء وبعدها الكاف يسبب غليان كريات الدم الحمراء مع البيضاء
واصطدام أنزيمات ثاني اكسيد الكربون مع بكتيريا النخاع الشوكي
وينتج عن ذلك فتح باب بايكه من الخشيم العلوي ثم ينكب مخك
فلذلك نصيحة طبية لازم تآخذ به ...............
ألبي على هيك خلقان
أجل أنت الي لا بغيت تسبح تقعد نص ساعة بالحمام
خمسين دقيقة تفصيخ وعشر دقايق سباحة
الله لا يبلانا بمثلك شكاك


== O بطل العالم O ==
هلا بألب ألب ألب ألبي
أنا أشوف الموضوع صايرن قوي بالحيل اثرك راد يا سلاي
ايه والله يانت كاتبن قصة حياتك اصبر خل اروح اقرا قرقك واجي اعلق
<<========= أدوخ على غازي صدقة :D:D
شف يا بعدي سويت الحركة الي تقول بفصل الصيف
يا ابن الحلال البنات أوسع منك صدر والله لو يقعد عشر ساعات بالسيارة
أهم شيء يآصلن السوق ............. صاز انت
وحتى بالشتاء يا ألبي
لو تحطهن بصندوق سيارة وتخليهن يآقفن علشان يلخفهن الهواء ماهمهن
وصول السوق حتى الموت ........... معليش با بتل الآلم يا ألبي
يا حبيلك يا بتل الآلم يا ألبي
خلاص لا عمرك ترد أأأأأسذب صاز انت انت النور والحلا والبيتزا هع هع هع


== زهور برية ==
وش هالرد
صراحة خيااااااااااالي أقول انا اليوم دايخ اثرس داعيتن علي ان الله يرجن
الله يحفظني آمين وإياس وكل مسلم يعيش على ويه الارض
تشكرات سثيرات يا زهور بحرية
آآآآآآآآآآمين على كل الدعوات المرفقة بالموضوع
شوفي عساس تطيحين بالجنة قولي آمين وأهلس وعيالس وكل المسلمين


== العمدة ==
ياخي انت لا عمرك ترد على مثل هالمواضيع
ياخي يجين كبر
أحس اني مهم لأنك رادن علي .... انا مش مصدء بئه <<== هلا واله بالطعمية
شفت كلامك يا عمدة يا قلبي
تراك صاز صاز صاز يا بعد قلبي
الموضوع صار قمة بردك
لقد وضعت النقط على الحروف <<=== يدعي يقاله لغة
الا يا عمدة أشوفك تمون تبي واسطة
شف بناتنا يستاهلن رجال مثلك وشرواك
بس واحد غيرك لالالالالالا معليش ياشباب أنتم عرابجة
بس هذا الرد يحبه قلبك
لا شافه أبوي جنح على جنب قال جبه لو سلف <<== متأثر بالبقالة
اسمع يا خلفهم
البنات واجد بالحيل
بس لا بغيت تتزوج اختفن سبحان الله
العمدة ألبي على هيك رد ياخي احراجات ماله داعي
المصطلحات الي تقول يا ألبي سهلات
طبعا انت عارفه أكيد لو ما تعرفه سحبت الموضوع على وجهه
بس يمكن قصدك بعض ناس يعني
شف المعاني //////
خطوا .. دايم تجي خطوا مع ( خطوا النوبة ) يعني شيء ماضي أو سبق فعله
يعني أقرب لكم ،، يعني انا جبت دفتر للمجلس حق قلينزي
وجاء أبوي دخل علي بالمجلس من باسر ... قال جب دفتر القليزي ،، أقول له
(( جايبه خطوا النوبة )) __ الي ما يفهمه عاد يضف وجهه لا عاد أشلق وجهه
مهيد ///
هذي كلمة عجز هذي وقديمة بالحيل
بس هي تراه بتشديد الياء (( مهيــّــد ))
معناه يهيّد عضامك يعني ما تقدر تمشي الا بالعزر والغرابيل
يعني تصير متطروخ وعضامك باليته وتصير تعبان
السبيرة .. هذي واضحة قووه يعني ( الكبيرة )
شكراً يا عمدة على التنبيهات يا خلفهم


== الصارخ ==
ايه لا تفضح <<=== يقاله ماقال شيء
العشرة الي عطتن اياه امي كله بليلا وفصفص
ويمكن حلقوم بثلاثة ان فذ شيء
وان ساني جوعان شاورما من الي بالزاوية هع هع هع هع
اسمع يا الصارخ
قسم بالله العلي العظيم الغالب الطالب رب البيتين
ان اختي ولا أمي ولا أبوي ما سجلو بالمنتدى
وش قالو لك بس هذولا ناس يستهبلون
أخت سعفة ما عاد الا هي خواتي يدخل الانترنت
هع هع هعه هع هع هع هع هع
أخاف لا دخلن يموعن على كلامك <<== صارن مارس ما صارن بنات
<<=== مارس ولا أبريل هع هع هع


== مدحت شوقي بريده ==
ههههههههههههههههههههههههههههههههههههههه
هههههههههههههههههههههههههههههههههههههههههههه
هههههههههههههههههههههههههههههههههههههههههههههه
<<============ تمزع من الضحك
خلاص انتهيت صلاحيته :D:D:D:D:D:D:D:D
مانتب مضبوط يالمصري
وشلون ترجع من السوق وزايدات الدراهم
اقول انتبه للحلال <<=== صارت غنمة
وين يا ألبي لا تصير تسير على الخرابات الله يستر ههههههههههههههه
مهبووووووووووووووووووووووووول مدحت
والله يالغيرة عندك صفر ههههههههههههههههههههههههههههههههههه

[هاني كريم]

أهااااااااااهههههه يا حليلك يالمصري ..


هذي و اااااضحه و أنا أخوك ،، أزاي ما بتعرفش !!


أنتم تروحن للسوق بكياس فاضيه همن ترجعون ما شاء الله ما لينهن


عاد أفهمه يالذيب

[هاني كريم]

سعفة ،،، عااااااااااااااااشت أيامك


و الله العظيم أني يوم أرد الرد الي فوقي ذا

ما لقيت ردك ،،


مشكور على ردك و الله يا اااااا أنت خليتن أنقط عرق من الفشيله

و اااااااخزياااااه







أموووووووه ======> لسعفة فقط لا غير

[الداعية]

يا مسكين هبلتبك امك وانتبه لشباصات اخواتك وانتبه ثاني مرة تودي تودي امك للسوق الحريم خلاص

[الجارح البطل]

رايع وليس رائع






والله ياهي قصة العمر





تدري وا لاتدري

[أبوخلق]

كاتب الرسالة الأصلية سعفة
==================================================

== أبوخلق ==
هلا ابوخلقان
زاد يارب وانا من اول ما دخلت على الموضوع وانا انتشي ريحة صنان
وانا قاعدن اقرا تحت اشوف قطع سميت طايحاتن علي
وش السالفة ما ادري
اثره منك ،، أقول وراه ما تحط بتوقيعك كريك هع هع هع
الا يا بعد سلوتي كلنا قرق كثير
هين يا ابوخلق تبي من يجلدك بذيا لمين تعاف الدنيا
والله ياعليك مثل مهب معقول
هع هع هع (( الصمت خكمة ))
أقول أنطق خكمة ثلاثين مرة والله ان ينتثر مخك قدامك
خروج الخاء وبعدها الكاف يسبب غليان كريات الدم الحمراء مع البيضاء
واصطدام أنزيمات ثاني اكسيد الكربون مع بكتيريا النخاع الشوكي
وينتج عن ذلك فتح باب بايكه من الخشيم العلوي ثم ينكب مخك
فلذلك نصيحة طبية لازم تآخذ به ...............
ألبي على هيك خلقان
أجل أنت الي لا بغيت تسبح تقعد نص ساعة بالحمام
خمسين دقيقة تفصيخ وعشر دقايق سباحة
الله لا يبلانا بمثلك شكاك






والله قرق كثير

ارحم ملائكتك يأخي
:D :D

[سعفة]

== بطل العالم ==
أدوخ على هيك رد ___ أنت تبي من يمسك بزاوية الموضوع ويبطحك أرضاً
ويمطخ هالدميجة

== الداعية ==
يا ابن الحلال خله على ربك __ صايرن سني مره من كثر ما اسمع هرج الحريم
بتله معهن بهالسوق __ شباصات وتنانير والبلايز والبلوزة الجنز والسترتش
والمشكلة البنات يطلعن ألوان ما أدري منين جن ___ ( اقحواني ، مايو ، ومن هالخربطة )
انا لا سمعت الالوان أموت من الضحك __ توليف هالحريم .. بس ولو تنسيم


== الجارح البطل ==
تسلم يا ألبي عساي أحضر عرسك <<=== صار دعوة عجوز ... اثولث على هيك عجوز
شف يا ألبي منهو العمر الي انت تقول هذا
اشوفك تقول قصة العمر ___ عطنا قصته ولد العمر ذا
يا حليلكم يالعمر صايرتن لكم قصص وحنا ما درينا هع هع
تراي اموت واموع واثولث لا سمعت عائلة العمر
ما أدري علشان الشيخ ناصر العمر من أحد طلابي ولا ما ادري <<==يسمع لا أشلق وجهه



== أبوخلق ==
شكرااااااااااااااااااا قرق كثير
علم نفسك لا أمحطك بطراق بذا
_____________________ عاشو عاشو يا خلقان
انت بس لو تفك نفسك من هالخلاقين سان قدرت تكتب
أعوذ بالله من ابليس


يا شباب وانا ارد طاحن علي قشور فصفص منهو الي يقنم وجع
ترا به زبالة بس يمكن ما شفتووه مغبينه المشرفين تحت كراسيهم
شوفوووه ======> http://www.buraydahcity.net/vb/images/sendtofriend.gif
تلقونه تحت كل رد ......... تراه زبالة مهيب حقت الدخان

الي يدخن أصلاً يطلع برا مابه زبالة له
وأصلاً العيال هكليوم يقولون الي يدخن ما نحبه ولا نهارجه __ نخاف يخربنا

[مجنون بس عاقل]

سعفة


تبي الحل



ركبهن وامسك بهن الشارع تجديع وتربيع

ليييييييييييييييييييييين توريهن الصمرقع <<<<<اتقطع وادر وش الصمرقع


خلالالالالاص واذا ما فاد

دق على جوالي النوكيااااااااااااا

واعطيك

الخطة 3300575/ بب/ هععهعه//مجنون


خلاص

يالله بمانه


بس يا حظك بارن بامك

الله يخليه لك

ولي <<<<<<<<<<<<<<هاااااااااااااااااجتن به




يالله سلالالالالالالام

مجنونبسعاقل

[صدى الصمت]

(تنسييييييييم×تنسيييييييييم)

هههههههههههههههههههههههههههههههههههههههه

والله ياقصتك رهييييييييبييييييه والله انك موووت ياسعفه:41 :41 ..

تصدق انى تمزعت من الضحك :D :D :D

لا اله الا الله عليك ياسعفه ابد تقولون وايدزن(وايق)علي الناس...مصورن حالتك تسنك ايانا...

اثرك مثلنا ياسعفوه تصدق انا مااعيي على امى بس اعيي على خواتى بس لاتذكرت انهن مايطلعن من البيت ومحجورات اويلهن همن اوديهن للى يبن بس كل شي بحقه==>خربه

وننتظر المززززززيد ياشعلة المنتدى ;) ===>ماشالله عليك لااله االا الله توووووف==>بس لاتفهم غلط:D


"ودمتم بخير"
: 12

[@@ عاشق بريدة @@]

عاشت ايامك




ولله انك منسم
هههههههههههههههه

[قلب الأسد]

ماشاله الحرجه [[[[[[ قحط ]]]]]]]] هههههههههه:

[(أبوبدر)]

الاخ سعفه ,,,
عندك خير وعندنا خير ياخلفهم ,,,
وهذا حال اغلب الناس ,, وبعدين ياخي الحين ابو سعفه وام سعفه
ماتعبوا عليك :mad:
نسيت الله يهديك ابوك يوم يروح كم مره يفصل لك ثياب وكم مرة انقطعن نعالك ويروح يشري لك غيرهن :rolleyes:
وكني داري شكلك إذا بغيت تغير النعال:confused: تروح تصلي وترجع
وتخليهن عند باب المسجد وتقول ,,, يبه انعالي سرقن يوم صليت
وطلعت مالقيتهن :eek:
ولا تنسى امك كم مرة عيا ابوك يشري لك حاجة تبيه :(
وبفضل الله ثم الحاح الوالد ه يجيبك اللي انت تبي ooo1

وبعدين تعال تعال :i121 منهو اللي شاريلك السياره :mad:
او بس تبيه لهاالمطاير والدوران :i121
وبعدين ترا اخر مره تشكي من اهلك :i121 والا ترى ابنسخ كل اللي
انت كاتب :re وعقب صلاة التراويح تلقان متمدد بالمجلس
عند ابو سعفه:cool: واعلمه بكل شي :S وخليه ياخذ منك السياره
,,,,, لا وبعد ياخذ جهاز الكمبيوتر اللي عندك :D ويالله عاد مايصير عندنا
سعفه بالمنتدى :( :(

وبعدين تصدق اتصور شكلك وانت موديهم:confused: شكلك معك هايلوكس ولا تلبس شماغ بس طاقيهooo1 ولا مشفوح تاكل وانت تسوق وفيشار بعد:p

(( ياخلفهم الله يخليك لهم ويخليهم لك ,, والله من عائلة يتمنون ان عندهم
احد يقضي حوائجهم ويوديهم ويجيبهم ,, ))

تحياتي لك وللجميع والف شكر لك على الموضوع ,,,

[النمر]

ههههههههههههههههههههههههه


والله من الطهبلة وش هل أم وجع

والله من الكزكزة
مخفه لكن واجب عليك



هههههههه

[أم سعفة]

:i121 :i121 :i121


فاضحني بالنت أوريك اليوم لا تجي البيت روح نام عندهم خليهم ينفعونك


اليوم إذا جيت رايح تلقاني كذا


:bad :bad :bad :bad :bad

[كتيـبة الأهواال]

سعفه ,,, وش هالخرااااابيط .. الله يرحم وااالديك .. الكي بورد تشتكي والله الله لا يجعلنا كي بوورد عندك,,, بس مسكته والله

للأعضاااء الكراام الي مايعرفووونن ..ترا وانا سعفه عيااال حاره وحده : 12 : 12 : 12 ,,,,,

<<<<< كتيبه اســـــــــــتعد:mad:

[كيش إشمنت]

الإنشان لابد من التشحيه بش مهب التشحيه يعني نشبح خروف بالعيد
لالالالالالا شّح العيد خلّش حنّا يوم قمنا الشبح بالعيد شاء أبوي وشبح بعير
يحشبه عيد الشحيّه ياحول أبوي فقد الشاكره إهئ إهئ إهئ
وشاء أبوي وقالي رح وشع اللحم على الشيران يوم وشعت اللحم على الشيران
قالي أبو الشيران وشوله تعطينا لحم قلت عشان اليوم عيد الشّحيه
وشيت وأشرع وأشرع قّووووووه وأشرع قوه أكشر وأقول لبوي ترى العيد عيد
الفطر مهب عيد الشّحيه أشل أبوي ماكمّل شلخ الشبيحه وقال بشرعه ياكيوشي
خلنا نشيل الشبيحه ونغبيه بالشلاشه إشا شار بعيد الشّحيه نكمل شلخه ونآكله
واشرع مّره شانيه والبش شوبي والبش بشت عرشي يوم أعرش على شوجتي
إيه شكريات أيام لاتُنشى ياشلام
بش خلاش ياشعفة مشل ماقلت لك الإنشان يشب يشّحي وهاشي أمك وطاعه الشوجه شّي شميل

لكن إشا كنت مشتاشي قوه
فانشحك إنك تشري علبه دبابيش مهب دباّشه لالالالالا دبابيش
وإشا قالت أمك يالله شعفة قوه للشوق قله إشبري أبغشل الشياره لش
وبعدين رّح لشّق الدبابيش بالمرتبه وإشا إشلشت أمك بالشياره
تبي تشمع شرخه كبيره بعدين أنت إشرخ وقل يوووه يوه هاشي آشار نفش
وعيّن قويه وعقوبة يالله لليعيش يقرأ عليش وبكشا ترتاح من الشوق ووشع الراش



مع الشلامه شق الحمامه

[سعفة]

== مجنون بس عاقل ==
يارجال والله تبتل تفحط بالبنات والله ما يدوخن
شرط تلقاهن يقولن أحلىىىى أحلىىىى صاز انت
والله لو تقلب ان يضحكن ... أنواع الاستهتار بس خله على ربك يا البي
انت يا خلفهم تبي وش معنى الصمرقع .. معناه ان الواحد يشرب ميرندا حار
وكتكات ابونص ويقعد الظهر بالشمس حافي ،، هذي الصمرقع <<== والله ويحوف التوليفة
يا حبيلك يا النملة .... <<<==== جاب معيارته


== صدى الصمت ==
معليش خليتن آقف وأضرب سلام ... خابرك مثقف ولا تعطينا وجه
مير يا حبيلك والله انه الساعة الخراشية الي نشوفك فيذا ......... ايوالله يا ألبي
أجل أنا موت يا صدى الصمت ... أقول خلك من المشفرات يا خلفهم
وشي موت .... عيب ياولد <<==== فاهم غلط الاخ
أصير ضحك لا صرت أنت تمزعت من الضحك .. صرنا نلعب كورة بالصالة // الهرجة تمزيع
ايه ايه ايه يا خلفهم اجل انتم زينا .. كلنا في الهواء سواء
يارجال مير قل لأمك تتعرف على أمي وخلك مير تمرهم جميع وتفكنا
يوم علي ويوم عليك ... يالله مخالف
عاشت ايامك يا ألبي عندي اني ابلقا الحل عندك .... .... أمووووع


== @@ عاشق بريدة @@ ==
أعوذ بالله وراك محجر لأسمك بهالكلبشات ذولي حقات البريد
والله انك انت المنسم ..... عساك تحت ترلية تلعب أونو مع ولد عمك حصة



== قلب الأسد ==
هلا بالفتوه ،، انت يا خلفهم جاين تقيوا علي شايفن قلب بس هع هع هع
تراي يا ألبي مافهمت من هرجك شيء ما أدري انت تهرج لغة عربية ولا اندونسية
يا روحي عليك يا ابو احمد والله يانا اموت بك بعد هع هع هع
قلب الاسد وبس وآكل خس وأعطيك بوقس <<== والله ياهو قديييييم


== (البركان) ==
زاد أقول منين الحر والله يانت تنزع البستم
أنواع الحر ... .... كله منك أنت وهالبركان الي لعوزنا
أزين مابك ردك <=== قل يعني أنا كرتون هاه
ياخلفهم أبوسعفة أم سعفة تاعبين علي بس يوم يضنون ما اتفقنا انهم يذلونن سذا
وأبوي ماسد شرالي نعال أنا الي اشريهن بس القطية النص بالنص
يا حبي لك يا البركان .... أنت تحسبن قايلن لأبوي لا ولا حاقة ولا حاقة
لا بس انهم يطولونه .... ذولنا بالعربي الفصيح
يا حياة الشقا يا البركان ،،، هذا الرد الي يبرد السبد ... أموع عليك يا سلاي انت


== النمر ==
والله من الطهبلة وش هل أم وجع <==== أم غنما هذا أم أم بقرا هذا
كيف الحال يا ألبي
وين الغيبات تونا نشوف ميدك
الا اقول يا النمر يا خلفهم ،، والله ياعليك هرج يحبه قلبك تسلم والله
اجل الكزكزة ... على وزن رزرزه على ميزان اللغويين فعلله
يا ألبي منور الموضوع بوجود ميدكم <<==== ميد ولا المبارك


== أم سعفة ==
أقول الاثل يا أم سعفة ....... قسم بالله انس مهب امي <=== بزر مصدق هههههههـــ
عاشت ايامس يا أم سعفة ... قسم بالله لا أعلم وش اسمس الصززي
تراس مرة وعيب عليس وان صرتي أمي .. أقول تغطي تراه به رجال
أو مثل قولة المرة الي دخلت على حمامات الرجال وقاله واحد يامره هذي حمامات رجال
قالت به اسامة بن لادن قاله لا .. قالت مابه رجال .... تنسيم المره هذي


== كتيبة الأهوال ==
الله يجعلك كبيورد عندي ، شكلك ما تدري اني امسحه كل يوم
يعني لو انت عندي كيبورد ان سان بتله نظيفي مهب مثل راسك هالمصنق
اقول رح شف رويحتك بالمراية والله يانت شاسف أعوذ بالله
حتى يوم ترجع من البر هكليوم ما سبحت تراك زين
انا قايلن لك انا والعيال هكليوم يلزمك حمام بخار ،،،، ولا ياخي اقعد لك بالبانيو
وحط ماء حار ،،،، وثلاث ساعات والله ان تطلع تلق أعوذ بالله من ابليس وعيال عمه
كتيبة الأهوال ... أجل انا واياك عيال حارة وحدة
عاشت ايامك __ أجل أنت المذن حق مسجدنا .. بس طحت بك
يالله أجل المغرب الفطور عندك .. مدامك بحارتنا .....


== كيش اشمنت ==
هلا والله بطقطيقا البدلية .... هلا والله بالي بتله نشوفه بالعماير
هلا والله بزوج الشحنة ...
أعوذ بالله أنت وهالشين .. ذبحتنا تراك ياخي فكنا الله يرحم والدينك
والله يانت ذليتنا تراك
والله يانت تنسيم بعد أنت وأبوك يا كيش اشمنت
وش جاكم على هالضحية ،، الله يقلع ابليسك والله يانا بغيت أطرش يوم قريت ردك
والله يانت فاصخن العقل وجادعة على شوجك وجاين بذا ترد
خلاص ياكيش اشمنت لا ذبحتو حل الإحرام <<=== أفتا العالم المصري
الا أقول يا ألبي
تبين أحط دبابيس بالسيارة
أقول شكلك ما شفت البنات نازلات وملويات أول ما يركبن
بدال ما الواحد يشبك الريوس يصيرن البنات عشرين لمبه مريوسه من هالدبابيس
لا والله ما عندي طاري أشقق مرتبتي علشان هالبنات ... سلامك يا ألبي
يا خلفهم والله انك شيء بعد ..... الموضوع صار ماهنا ملحة بعد رد ميدكم
يا خلفهم سير علينا بتله .. أعوذ بالله يتغلى
ترا الشاعر يقول .. ما كل ما يتمناه العنز يلحقه ..... تجري التيوس بما لا تشتهي الغنم
وهذ مثل ينطبق على النجارين الي يقال عنهم المثل
باب النجار مكسور
وبابك الخرمي شاعر من أرض الموصل توفي سنة 1455 هـ
ويكنى بأبي فحص الدوسي

ومع الشلامة شق الحامة

[فـارس القبيلـة]

الله يفكك

[سعفة]

== على نياته ==
أعوذ بالله من ابليس وعيال عمه
وشو هالرد لك
والله يانت موت بعد على هالتكلف ياخي ،،، شكلك قاعدن لك نص ساعة وانت ترد
ياخي انا ما ادري الموضوع هو الرد ذا ولا التوقيع
والله ياهو ديره __ أدوخ عليك يا ألبي
شف يا ألبي أزين مابك انك رديت على الموضوع يعني فرعت معنوياته

ولا بلاك يا خلفهم ما تدري اني شاقين ورا هالحريم
أعوذ بالله _
يعني عادي تهرج معي تلق نشبن بشعري بكله
زي السلام عليكم أسولف معك سواليف حريم
الألوان حافضهن حفظ

بعد لو تشوف شكلي وانا اتدلع سني بنت
بس لو اصبغ روحي بويه سان شفت الشغل
أنا كود تودونن لورشة الحسون ولا الحربي وصنفرة وفرن وبويه،،، ويالله يالله
بس ولو الشين شين لو غسل بالصابون مع الفيري

الا على طاري الفيري انا ابعطيك معلومة عن الفيري
تراوه يشقق الكفرات لا صار كثير مع الشمس

________ أدوخ على هالمعلومات

يالله سلامو يا ألبيو

[فـارس القبيلـة]

وش قصدك






































تبي ازعل



س:-ايه


ع:-لا


س"بكيفك
++++++++++++++++++++++++


اجل التوقيع


ازين

اجل مثلك

فاضي


طيب

اقول


قل

لا

خلااااااص لايكثر

اجل ابزعل
يالله تبي شيء


ابزعل



تم فصل الخدمه موقتاً


طو ط طوط طوط طوط طوط طوط طوط طوط

طوط طوط طوط وطوط



تم شبك الخدمه الى بتله

طووووووووووووووووووووووووووووووووووووووووووووووووو ووووووووووو...الخ
هلا



ابيك ترضين

خلااص امر


اقول بنفسي "فرصه"

انا غمضت وقلت

ابي
1- سياره موديل 10000000000000
2- بيت
3-سياره ثانيه
4-ااا وشيء يارب
5-ايه صح تذكرت
6- ابي نسيت
تجيب لي كل ذولي
ست اشياء


لا
تنساء

يوم فتحت مالقيت احد وين الراجال

انا على اسمي

قلت يمكن راح يجيب قلم
او
راح يشرش لي الست الاشياء

المهم قعدت
10
ساعه
رجعت لم بيتنا
وانا متافأ ل بخير




_+_+_+_
+_+_+_+_+_+_+_+_
+__+_+_+_+_+_+_+_+_+__+_+__+_+_+_+




فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه فجأه
فجأه فجأه فجأه فجأه فجأه فجأه







7
7
7
7
7
7
7
77
7
7
7
قمت من النوم


اثري قاعد اخرط عليكم



وش يقول سعفه
ياخي
ما سمعت المثل اللي يقول

مادون الحلق الا البطن <==جوعااااان على هالصبحيه >==الصبحيه ولا الربوه (احذر تسلم)




سلامممو

[هاني كريم]

هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه
هههههههههه
ههههههههه
هههههههههه
ه



بطل العالم شكراعلى المشاركه الهادفه

[سعفة]

== على نياته ==
أقول تسحلت وانا ارد عليك
محلوفن عليك تهرج بعد كل رد ___ أموت عليك يا ألبي :D:D بل أتشقق إرباً إربا
شفت عاد تراه ان مغطت هرجك نوبة ثانية __ والله لا أشلق وجهك تشليق
فهمت ولالا ___ تقبل جغفاتي
أعوووذ بالله شكل ابوك يشتغل بالهاتف __ صدقن لا اذبحه استغفر الله العظيم
ههههههههـ وش هالطلبات الي انت حاط
يكافي يكافي __ قسم بالله يانت ذكرتن بالقصص حقات البزران
الي يصير أمير وبنته مريضة همن يقول الي يداويه تراه له ولا له نص ثروتي
ولو بك عرقن منه ،،،، عاشت ايامك __ شكلك تحب القصص
شكلك مثلي منول يوم انا بالمتوسطة ،،، الله على هيك قرايه
والله ما نفعنن ،،، مير خلك مثلي <<== خربه

ما دون الحلق الا البطن __ أقول مصيفين يا ابوسروال محلي
شكلك ما اخذت بالاحياء الامعاء الدقيقة والغليضة
هذولي فاصلات بين الحلق والبطن <<==== أدوخ على المحششين :D:D:D
الصبحيه ولا الربوه __ <<-- أدوخ على الصبحيه
تراوه الصبيحية مهب الصبحية _ شكلك متغدي الصبح بالصبيحية
عند السبرماركت الي بجنب المغسلة عرفته الي بالصبييحية __ بيتنا وراااا قوووه


== بطل العالم ==
لعنبو ابليس الضالم
صايرين بكل عاير مندعسين تردون
أعوذ بالله خلو الناس تنام ،،، والله يانتم تهقون الي ما ينتهق
تهقا بعض ناس فهم هقوتي
ومن الهقو ما يفهمه ضيف الموهقين
وكما قيل في فتح الموهقين
بطل العالم انشحط حلقه من الضحك
شكرا على المشاركة الهادفه

باللهي يا اهل الحي فكوني من ذا الصبي

تحياتي / سعفة بن هذال العتيبي

[غريم]

تحياتي / سعفة بن هذال العتيبي ههههههههه الله يخلف
دايم كذا أنت والى أحيانا

الله يخلف عليك وعلى ؟؟؟


غريم مرررره

[سيف الشجاعة]

أناء مرتاح واخوي الي اصغر من معه سيارة

[فـارس القبيلـة]

مشخور شخرا كثير

شعرة معاويه يوم اكتب كثير ويوم شوي

ههههههههههههههههههه

[(الخبوبي)]

..سلام..

..أزيدكم من الشعر بيت ..

..يقولون: المتفائل من يترك السيارة شغّـالة وهو ينتظرأهله في السوق..

..ثانكيو..!

[روح نجد]

ههههههههههههههههههههههه

[عابق الذكرى]

أقول ياسعفه شكل خواتك يبي ياخذن ارجال أبغض مايشوفون السوق
همن يقعدنبه

عاد تلقاهن يقولن أشوننا كرفنا سعفه وحللناو قبل العرس

[الــنــهــيــم]

هههههههههههههههههههههه

[النادم]

يا ليت يا شباب ما نرفع المواضيع القديمة .
http://www.buraydahcity.net/vb/showthread.php?t=25307
:p

[S n a k e]

النادم أخس على هالشده هههههههههههههههههههههههههههه

[الــنــهــيــم]

يعلم الله أنني كنتُ أضن أن هذا الموضوع في قسم المحذوفات !
ولكني تفاجأت بعد الرد أنه في كشكول وحصل ما لم يكن في الحسبان .
ولقد عزمتُ والله أعلم بنيتي ، أن أرسل رسالة للمشرف لحذف الرد .
ولكن سبق السيفُ العذل !

عذراً للجميع .

أبومعاذ النادم .

[النادم]

حياك الله أبو صالح .. :D
وش رايك عاد .. أصلح مشرف ؟ :p
بس ولو .. شكلي صدز شديد .. شف أبو نهيم صدّق ..

أبو معاذ النادم ..
آسف .. http://forum.ma3ali.net/images/smilies/az9.gif
أبو عبد الله النادم .

[S n a k e]

والله إني تلوذعت وآويتله أبو معاذ خخخخخخخخخ

يا حبنا له بعد ، لكن لا عمرك تغلط عليه يا بعد مصاريت نسلاي هع


ــــــــــــــــــــــــــــــــــــــــــــــــــ ـــــــــــــــــ

سعفه الله يخرشكـ ـ

تصدق إن بعض ناس حولكمـ هع

إلا وش جاب سالفة محلاتنا بموضوعك التسريم يالدب .. أنا عراف إنك تميلح علينا يالمروح لكن خله على ربك والمره الثانيه إن جت الوالده نسوي له خصم إن شاء الله إجحده عاد هع

طيب اللي لقى حل للسوق الحين يحطه وإلا لا ؟؟؟؟؟؟؟ هع الهع الهعااااااااااااااات

هذاهم يطرون يخلون الحريم يسوقن غدينا نصير معهم بس ونفتك من هالنشبااااااات .. شايلين هم اللي نبي نعرس عليه .. همن يجن ذولي يكملنه ؟؟ معصي والله << إيه يحول .. ضريبك ما هن مدورات لك وحدة تجوز لك :)

تشكراااااااااااااات سعفاونه << الأخ عماني قصدي طونسي هع

[السيد دكتـور]

خربانه

لأنه قرق كثير


الصمت خكمة

أبو خلق من الي منجحك بالأنقليزي.<<<<<

[الفارس المقدام2007]

حبيبي العزيز سعفه كيف أحمل القصص الحلوة هاذي وأخليهن بالجوال

[مجروح خلي]

ـهههههههههههههههههههههههههههههـ


يا حليلك يا سعفة انت وامك

[الفشقه]

ههههههههههههههههههههه

الله يرجك

هذي مشكلة الحريم والسوق

[بريداوية بالرياض]

تم الغاءالمشاركة بناءً على توجيهات اللجنة الشرعية بمنتديات بريدة ستي ..

[مشروخة القلب]

تم الغاءالمشاركة بناءً على توجيهات اللجنة الشرعية بمنتديات بريدة ستي ..

[~{ الوسـامـ ..]

اسمح لي والله يهي قلق بس تحمل هذي الوالده :bad


والله يعين ولا يضيق صدرك الحال من بعضه<<بس اخف شوي



تحياتي


محبك دحمحم

[بريدة العز]

خخخخخخخخ

يارجـــال تسذا الحريم لا تخــاف مب بس أنت يعنــي ســدد وقــارب مـب اذا قـالوا وديـتهم يعني ويعني ..!

أعـــانك الله ..!

[A N A S]

الله يعينك مع أهلك يالسعفه .


مشكور