الشين شين ( احد الروايات المليئه باالسمرمد)

[الجوري]

السلام عليكم
وشلونكم , عساكم بخير
هذا الموضوع ليس موضوع <<---- اقول رح ارقد
اتمنى لكم قراءه سعيده مع هذا الموضوع الذي هو برعاية شنبات صرصور
و آسف على الاطاله



كنت منبطح بفراشي و رايح بسابع طعش نومه و شوي الا تدخل علي امي و قمت على عادة اي شاب سعودي متروع بعد ما كبت امي علي سطل ماي باااارد و قالت امي : قم رح جب جوازاتنا انت و خشمك لوحة " انتبه معبر جمال " !! .. قلت : طيب .. و رحت دخلت الحمام و غسلت وجهي و شلت الغمص اللي تقول باتكس متعلق بعيني .. و يومني شفت وجهي بالمرايه تروعت !! <<------ يعني وش رايك منتب متروع دامك شفت هالخشه اللي تقول جحه صاقعها الشمس

رحت مكتب الجوازات ذاك اللي على الشارع العام بالزاويه و فيه لوحه كنها خشم سواق الجيران ( ما عليك زود يالطيب ) !! .. سميت باسم الله و دخلت و قلت : السلام عليكم .. كلٍ سكت و لا احد عطاني وجه .. عاد والله ما هموني .. دخلت على الموظف اللي عنده جوازاتنا و يوم شافني الموظف قال : يمه !! .. قلت : خخخخخ وش تبي بامك لا يكون الى الحين ترضعك .. قال : على شحم انت و وجهك تقول مزهريه كاسرها بزر .. قلت : طيب عطني جوازي الله لا يهينك !! .. قال : و جواز امك ما تبيه ؟ .. قلت : الا ابيه .. و عطاني الجوازات و يوم فتحت جوازي قلت للموظف : يالطيب وين الصوره ؟ .. قال : اقر وش مكتوب مكان الصوره .. قلت : مكتوب " الصوره محجوبه " .. قال : هذي للي هم مثلك وجييههم تقول حمار سكران .. خذت الجوازات و طلعت من المحل و ركبت السياره و وصلت البيت

دخلت البيت و انا مكتئب نفسياً و معنوياً .. قالت امي : وش في وجهك تقول بزر ماكل فلفل !! .. قلت : لا ابد مافيه شي يمه و هذي هي الجوازات .. خذت امي الجوازات و فتحت جوازها و فتحت جوازي و يوم شافت اللي داخل الجواز قالت : اثر ذا اللي مكتئب منا الله يعينك يا ولدي .. خذت جوازي و يوم شفت العلامه الفارقه حقتي كاتبين فيها " اهم شيء الاخلاق " !! ..

طلعت من البيت و يوم مريت بالحاره قامو اعيال الحاره يضحكون و اللي يقول : هههههههه شوفو وجهه كنه ضب مفغوص و اللي يقول وجهه تقول ظاطور متوحم على عنز و اللي يقول وجهه هندي يصيح !! .. و انا ما هموني و ركبت سيارتي و على فكره ترى ما عندي سيت قدام شايلينه المرور و حاطيني ورى لأن خشمي كل ما جلست قدام يدق بوري من حاله و عشان كذا اجلس ورى و اسوق بخشمي و مريح يديني !! ..

رحت لقهوة ابو هيثم و طلبت واحد معسل و يوم جابه الهندي قال لي : يا صديق انتا لازم يعسل مع خشم انتا .. يعني يقصد لازم تعسل مع خشمك .. قلت له : اقول الفقا .. قال : اس كلام فقا والا توحيد .. و انا اللي اشوت عليه الزبيريه و ينحاش .. و عقب دقيقتين جاو عراااااابجه و جلسو قريب مني .. قال واحد منهم : يالاخو .. انا ما تكلمت و شوي الا قال : هيه انت ياللي خشمك صفارة حكم .. يوم سمعته قال كذا عرفت انه يناديني و قلت : سم .. قال : سمك الله بس بغيت استفسر ان كان الزبيريه اللي عندك هي وجهك والا وجهك هو الزبيريه ؟ .. قلت : التفاحه ( احسبه لغز ) ..

طلعت من القهوه و يلحقني الهندي و هو ماسك معه زبيريتي و يقول : تعال شيل وجه مال انتا !! .. و انا اللي آخذ منه زبيريتي و اجلده فيها و طلعت حرتي التي تجري في خشمي ( الخشم عنده الكل بالكل ) ..

رحت البيت و دخلت على امي و هي اللي تقول : اصبر لا تدخل خل خشمك يدخل و عقب جبهتك و عقب ادخل انت !! .. و نفذت كلام امي و دخلت و كل شوي تجي الشغاله و تعلق الملابس على خشمي و تروح و و عقب تجي تشيلها و هلم جرا .. جلست مع امي و قلت : يمه ابي اتزوج .. قالت : نعم وش قلت .. قلت : ابي اتزوج .. قالت : لا سويت عملية تجميل تعال تكلم معي .. قلت : يمه ترى عمليات التجميل ما يسوونها الا الشيون مره .. قالت : و انت الحين مستحلي وجهك ذا اللي تقول كبدة حاشي مسويها زول ما تروش شهر !! .. قلت : هههههههه طيب الكبده نص استوا والا مستويه كلها و الزول اللي تقصدينه هو ذاك اللي يقدم برامج بالسودان اللي وجهه كنه قرد يفرش ضروسه والا ذاك الزول اللي يسوي الكبده ببوفية الرحمه اللي وجهه كنه قطو طايحه ضروسه ؟ ( والله الفاضي من جد ) .. صفقتني امي طراق و رحت غرفتي و تكشخت و يوم شفت وجهي و انا متكشخ قلت : اهم شي الاخلاق !!!

شغلت السياره و مشيت و انا بالطريق وقفت عند الاشاره و يجيني الشرطي يقول : وش ذا اللي بوجهك ؟ .. قلت : مافيه شي و قسم !!! .. قام مسك خشمي و يفغص بوجهي و قال : هالكينود اللي مركبه بوجهك وش هو ؟ .. قلت : قسم انه مهوب كينود هذا خشمي يالطيب .. قال : وش يثبت لي انه خشمك ؟!! .. قمت و نغفت و وريته النغافه و قلت : شفت انه ذا خشمي .. قال : طيب خلاص اذلف انت و اثباتاتك و لا عاد اشوفك منغف عندي انت و جبهتك تلفزيون سينما !!! ..

و انا بالطريق للراشد قام واحد يشر وقفت له قلت يمكن انه يبيني اوصله معي والا شي من هذا القبيل .. ركب معي هالواحد و يوم شافه وجهي نزل من السياره و قال : ما عاد الا اركب مع ضفدع مزكوم !!!

وقفت سيارتي بمواقف الراشد و جاني العسكري و قال : فيه مواقف للمعوقين رح وقف فيها !!! .. قلت : لا والله يالطيب منيب معوق .. قال : و هالعضو الزايد اللي بوجهك وش هو .. قلت : لا والله هذا خشمي هو كذا من الاصل .. قال : لالا منيب مصدق انه خشمك ذا يمكن عكرة ضب !! .. قمت اناظر فيه بخشمي ( قايل لكم هالخشم هو الكل بالكل حتى لا جا يناظر يناظر بخشمه ) !! ..

دخلت الراشد و سويت رعب عند البوابه .. عقب ما دخلت من الباب بعد صراع بين خشمي و الباب على طول رحت للمصعد و دخلته بلحالي بس اني طلعت لأن خشمي يطلع برى و الباب ما يرضى يسكر و لو سكر يبي يسكر على خشمي .. طلعت من المصعد و رحت لذيك البنت اللي كنها غزال و قلت : معقوله القمر يطلع بالليل ؟ ( افدغ ) .. قالت : اقول رح لا اقوم اجلدك بالكعب انت و خشمك ذا طفاية حريق انت ما عندك خوات والله مدري وشلون متحملينك اهلك انت و وجهك ياخي الله يحلل الحمار الوحشي عندك .. طلعت من الراشد بعد ما طيحت وجهي هالبنيٌه قدام خلق الله و دقيت سلف و مشيت و انا افكر بوجهي .. و فجأه خطرت ببالي فكره جهنميه قويه لا تفسد للود قضيه ( كل تبن لا اقوم و اقشع وجهك هاللي كنه تكروني يطل من دريشه ) !! ..

رحت لواحد من الشباب يقال له " سعيدان " جلست بالملحق حقهم و عقب السلام و الكيف الحال قلت له : شف يا سعيدان انا داري ان وجهي كنه تيس عربجي بس المشكله تكمن في وشلون اصير حلو ؟ .. قال : والله فيه حل و هو عملية التجميل لكن انت ما ينفع معك عملية تجميل انت ياخي لو يسوون لك مليون عملية تجميل ما تنفع يالجاموس .. قلت : شف انت و وجهك الحفله انا ما جيت عشان تذب على انا ابيك تعطيني حل أو انك تنسيني على الاقل .. قال : طيب انت تشم .. قلت : ايه و ربي اني اشم .. قال : حلو عندك الحين ؟ .. قلت : وشو ؟ .. قال : اللي تشمه .. قلت : ايه و قسم اني امس شميت الكبسه اللي بالمطبخ و انا بغرفتي و ذاك اليوم بعد شميت ريحة تكروني ياهو عليه ريحه تقول ريحة فم ضب صايم !! .. قال سعيدان : اقول اها بس اثرك دلخ والله ما وراك الا الدجه انت و خشمك ميدالية مفاتيح .. قلت : طيب عندك حل ؟ .. قال : لا بس رح عند المشعوذ خرتوش يمكن ينفعك .. قلت : لاااا وش مشعوذينه انت .. قال : احسن لك يالدلخ والله مهوب نافعك الا هم .. قلت : امرنا لله ابروح لهم ..

و ادق سلف سيارتي و انطلق لبيت المشعوذ و قابلني واحد عند الباب وجهه بكبره كنه عزبة زيود !! .. قلطني الرجال و قلت له اني ابي اقابل المشعوذ خرتوش .. قال : طيب يلا رح مع ذا الباب و صف سرا .. قلت : طيب .. و مشيت .. و وقفت سرا آخر واحد و قدامي حول العشرين واحد بس خشمي الكريم واصل قدام عند اول واحد !!! .. و يوم وصلت قدام عند المشععوذ خرتوش قال : وش بغيت يالطيب .. قلت : ابد انا مشكلتي اني شين بس ابي اتزوج .. قال : هههههههه يا حليلك انت و خشمك قوطي ببسي .. قلت : ههههههه الله يرجك انا ذاك اليوم دخلت بقاله و اخترع اللي يبيع يحسب خشمي مسدس .. قال : اها بس لا يكثر مسوي تمون انت و خشتك جب فلوسك بس .. قلت : ابشر كم تبي ؟ .. قال : عشرطعش هههههههههه .. قلت : اها بس لا يكثر .. قال : وشو ؟ .. قلت : لا ابد الله يرجك يا خفيف الدم و الظل !!! .. قال : يلا جب ميتين ريال و الباقي بعدين .. عطيته ميتين ريال و قلت : طيب الحين وش اسوي لمشكلتي .. قال : امسك هالورقه اقرى اللي فيها زين و لا قريته يبي يطلع لك جني و علمه بمشكلتك ..

رحت البيت و قريت الورقه قرايه منتازه و جيٌده و طلع لي جني جثه الله يحلل اندرتيكر عنده !!! .. تثاوب الجني و قال : هاااااااه وش بغيت مقومني من نومي و مخرب علي هالنوم .. قلت : ابي اتزوج .. قال : كخخخخخخخخخ اما تتزوج طيب انا وش دخلني ؟ .. قلت : ابد ابيك تساعدني .. قال : وش شايفني جني ليمتيد انا ؟ .. قلت : بلا لكاعه انت و وجهك هاللي كنه خروف خرمان زقاره .. قال : ترفق على عمرك يالمزيون ترى وجهك انت بلحاله كنه وجه بزر يشرب رضاعه !!! .. قلت : طيب تكفى ساعدني .. قال : طيب بس يلا خل نروح عند هاللي بتتزوجها .. قلت : اصبر خلك بالغرفه و انا بروح عند امي بقول لها .. رحت عند امي و قلت : يمه خلاص هالمره من جد ابي اتزوج .. قالت : و من هي ؟ .. قلت : انتي الله يطول بعمرس اختاري لي .. قالت : مافيه الا بنت الجيران و عساها تقبل فيك انا مدري وشلون تبي تقبل فيك .. قلت : ليه وش فيني ؟!!! .. قالت : ابد مافيك شي بس وجهك كنه وجه باكستاني يبني عماره بعز القايله و بيده اليمين غرشة ببسي فيها ماي و بيده اليسار غرشة ماي فيها ببسي !!!!!!! .. و بالنهايه اتقفنا اننا نروح عقب ساعتين نخطب البنت ..

رحت للجني و قلت له : يلا انا بروح البس و اتكشخ .. قال : نعنبو ابليسك وشلون تتكشخ ياخي شكلك عقب ما تتكشخ كنه بعير شايب !!! .. ناظرته و رحت تكشخت و لا علي فيه و يوم رحت له عقب ما تكشخت قال : ما قلت لك ان ووجهك عقبت التكشخ كنه بعير شايب بس ما صدقتني .. قلت : انا جايبك ابيك توسوس ابو البنت عشان يقبلني مهوب عشان تذب !!! .. قال : طيب وين بيت البنت ؟ .. قلت : البيت اللي على يميننا على طول .. قال : خلاص انا من الحين بروح اوسوس الرجال و اخليه يفكر ببنته هالعانس .. قلت : خلاص الله الله بالشغل السنع انت و وجهك اللي تقول عنز مسترجله !!!!! ..

يوم رحت لامي لقيتها جاااااهزه و خليتها تجي معي و خليتها تروح عند ام البنت و انا رحت عند ابوها و فهمته بالامر و اني ابي اتزوج البنت و لا عليك من الشكل لأن اهم شي الاخلاق و انا ماغير الا افكر بهالجني اللي جالس يوسوس فيه .. قال ابو البنت : شف يالطيب من ناحية الاخلاق انا ما اقدر اقول عنك الا كل زين اما من ناحية الشكل ياهو عليك وجه كنه شاشة تلفزيون مشلوخه !! .. قلت : بس يالغالي بنتك عانس و الزواج يسترها .. قال : اقول مستعد اخلي بنتي تموت و لا تتزوج واحد وجهه كنه تفاحه ماكلها بزر .. قلت : طيب خلاص مع السلامه .. و طلعت من البيت الين ما طلعت امي و جلست امي تهدي فيني و انا مسوي معصب !!! ..

دخلت غرفتي و قابلت الجني و قلت له : وين الشغل السنع اللي وعدتني فيه هاااااه ؟ .. قال : ياخي انت وجهك ما يساعد احد يتزوج انت عليك وجه كنه صدام ددسن !!! .. قلت : تكفى يا ابو وجه زين حتى انت وجهك كخه مهوب حلو <<------ ذبة بزر !!!!! ..

انطلقت للمشعوذ خرتوش و قلت له كل اللي صار و انا الجني ما فاد قال : عطني ثلاثمية ريال و انا اعلمك السبب اللي ما خلاه يفيدك .. عطيته فلوس و قلت : اسلم قل السبب .. قال : لأن وجهك كنه عقرب متهاوش مع ضب و لو تروح نيجيريا محدٍ بيقبلك و قام طلعني من بيته و خذ الثلاميه و الميتين اللي من قبل و صار عنده خمسميه على الفاضي !! ..

انتهى

:D :D :D :D منقول